ផ្ទះប្រជាពលរដ្ឋ ១៨ខ្នង រងគ្រោះដោយខ្យល់កន្ត្រាក់
ខេត្តកំពង់ឆ្នាំង ៖ ផ្ទះប្រជាពលរដ្ឋចំនួន១៨ខ្នង ក្នុងនោះ៤ខ្នងបានរំលំបាក់រាបដល់ដី ក្នុងហេតុការណ៍គ្រោះធម្មជាតិ ដោយភ្លៀង និងខ្យល់កន្ត្រាក់មួយ បានកើតឡើងនៅវេលាម៉ោង៥និង៣០នាទី
ខេត្តកំពង់ឆ្នាំង ៖ ផ្ទះប្រជាពលរដ្ឋចំនួន១៨ខ្នង ក្នុងនោះ៤ខ្នងបានរំលំបាក់រាបដល់ដី ក្នុងហេតុការណ៍គ្រោះធម្មជាតិ ដោយភ្លៀង និងខ្យល់កន្ត្រាក់មួយ បានកើតឡើងនៅវេលាម៉ោង៥និង៣០នាទីរសៀល ថ្ងៃទី០២ ខែឧសភា ឆ្នាំ២០១៦ នៅភូមិត្រដោក និងភូមិប្រឡាយមាស ឃុំប្រឡាយមាស ស្រុកកំពង់លែង ។ ទោះយ៉ាងណាមិនមានមនុស្សណាម្នាក់រងគ្រោះក្នុងហេតុការណ៏នោះទេ ។ លោក ប៉ាល់ ជឿន អធិការនគរបាល ស្រុកកំពង់លែងបានរាយការណ៍ថា នៅពេលកើតហេតុ ម៉ោងប្រមាណជាង៥រសៀល មានភ្លៀង និងខ្យល់ បានបោកបក់មកលើភូមិចំនួន២ គឺភូមិត្រដោក និងភូមិប្រឡាយមាស ក្នុងរយៈពេលប្រហែលជាងកន្លះម៉ោង ទើបមេឃរាំងភ្លៀង និងស្ងប់ខ្យល់ទៅវិញ ។
តែជាមួយគ្នានេះដែរបានបំផ្លាញផ្ទះឲ្យរលំបាក់រាបដល់ដីចំនួន៤ខ្នង និង១៤ខ្នងទៀតរងគ្រោះដោយរបើកដំបូល និងជញ្ជាំងក្នុងនោះ នៅភូមិត្រដោក បានរលំបាក់រាបដល់ដី៣ខ្នង និងរបើកដំបូល និងជញ្ជាំង១១ខ្នង ចំណែកភូមិប្រឡាយមាស វិញបានរលំបាក់រាបដល់ដី១ខ្នង និងរបើកដំបូលនិងជញ្ជាំង៣ខ្នង ។ លោក បានបញ្ជាក់ថា សំណាងប្រជាពលរដ្ឋទាំង២ភូមិមិនមានអ្នករងគ្រោះថ្នាក់នោះទេ។ លោក ប្រាក់ សោភ័ណ្ឌ នាយកប្រតិបត្តិសាខាកាកបាទក្រហម ខេត្តកំពង់ឆ្នាំង បានបញ្ជាក់ស្រដៀងគ្នាថា នៅថ្ងៃទី៤ ខែឧសភា នេះ សាខាកាបាទក្រហម នឹងយកអំណោយសង្គ្រោះបន្ទាន់ទៅ ចែក ជូនប្រជាពលរដ្ឋទាំង១៨ គ្រួសារ ក្នុងឃុំប្រឡាយមាស ស្រុកកំពង់លែង ដែលរងគ្រោះដោយធម្ម ជាតិខាងនេះ៕
ចែករំលែកព័តមាននេះ