រាជធានីភ្នំពេញ ៖ កាលពីថ្ងៃទី២ ឧសភា កន្លងមកនេះ ប្រតិភូកីឡាប្រណាំងកង់់កម្ពុជាបានវិលត្រឡប់មកដល់ប្រទេសរបស់ខ្លួនវិញ ហើយដោយបាននាំមកជាមួយនូវកិត្តិយសយ៉ាងធំធេងមកជូនជាតិទៀតផង ។
រាជធានីភ្នំពេញ ៖ កាលពីថ្ងៃទី២ ឧសភា កន្លងមកនេះ ប្រតិភូកីឡាប្រណាំងកង់់កម្ពុជាបានវិលត្រឡប់មកដល់ប្រទេសរបស់ខ្លួនវិញ ហើយដោយបាននាំមកជាមួយនូវកិត្តិយសយ៉ាងធំធេងមកជូនជាតិទៀតផង ។
លោក ព្យែរ អីុវកាទ្រី ជាអ្នកដឹកនាំប្រតិភូកីឡាប្រណាំងកង់កម្ពុជាទៅចូលរួមប្រកួតក្នុងព្រឹតិ្តការណ៍ RHB Shimono High Way Rideលើកទី១នៅប្រទេសម៉ាឡេស៊ី កាលពីថ្ងៃទី២៩ មេសា កន្លងមកនេះ បានឱ្យដឹងថា នេះគឺជាលើកទី១ហើយដែលកម្ពុជាដណ្ដើមបានចំណាត់ថ្នាក់យ៉ាងល្អបំផុត និងមិនធ្លាប់មានពីមុនមកឡើយ ពីការប្រកួតកីឡាប្រណាំងកង់គក់ជាលក្ខណៈអន្តរជាតិ ។ សម្រាប់ការប្រកួតនេះ កម្ពុជាបានបញ្ជូនអត្តពលិករបស់ខ្លួនចំនួន៣រូប ទៅចូលរួមប្រកួត ហើយអ្វីដែលជាមោទនភាពបំផុតនោះ គឺអត្តពលិកកម្ពុជាទាំង៣រូបដណ្ដើមបានចំណាត់ថ្នាក់លេខ១ចំនួន២រូប និងចំណាត់ថ្នាក់លេខ៣ចំនួន១រូប ។
តាមការឱ្យដឹងបន្ថែម ការប្រកួតនេះមានភាពប្រហាក់ប្រហែលគ្នានឹងការប្រកួតដែលរៀបចំធ្វើឡើងនៅសៀមរាបអង្គរកម្ពុជាយើង គ្រាន់តែខុសគ្នាត្រង់ គេប្រកួតពេលយប់ចាប់ពីម៉ោង៨និង៣០នាទីថ្ងៃទី៣០ មេសា ហើយអ្នកចូលរួមប្រកួតមានចំនួនជិត៤.០០០នាក់ មកពីតាមបណ្ដាប្រទេសជាច្រើនទាំងនៅអាស៊ី និងអឺរ៉ុប ។ កីឡាការិនីកម្ពុជា ហេង ស៊ីវឡាង ទទួលបានចំណាត់ថ្នាក់លេខ១ ពីការប្រកួតជិះកង់ក្នុងរយៈចម្ងាយ១០៥គីឡូម៉ែត្រ និងកីឡាករ យឿន ភីយុទ្ធ ជាប់ចំណាត់ថ្នាក់លេខ១ពីការប្រកួតជិះកង់ក្នុងរយៈចម្ងាយ៧៨គីឡូម៉ែត្រ ។ ដោយឡែក កីឡាការិនីហេង ស៊ីវហ្គេច ជាប់ ចំណាត់ថ្នាក់លេខ៣ជិះក្នុងរយៈចម្ងាយ១០៥គីឡូម៉ែត្រ ។
កីឡាការិនីហេង ស៊ីវឡាង បានឱ្យដឹងថា ពីដំបូងឡើយនាងក៏មានការបារម្ភខ្លះដែរ ព្រោះថា ពួកគេទាំងអស់សុទ្ធតែជាជើងខ្លាំង មកពីអឺរ៉ុប និងអាស៊ី តែទីបំផុតនាងអាចយកឈ្នះពួកគេ មិនគួរឱ្យជឿ ។
គួររំលឹកផងដែរថា ថ្វីដ្បិតតែការទៅចូលរួមប្រកួតនេះ មិនតាមរយៈក្រសួងអប់រំ យុវជន និងកីឡាមែន ប៉ុន្តែយ៉ាងហោចណាស់ជ័យជម្នះនេះក៏ជាមោទនភាពយ៉ាងធំធេងសម្រាប់ប្រទេសជាតិយើងដែរ ដោយយើងដណ្ដើមបានកេរ្ដិ៍ឈ្មោះនៅលើឆាកអន្តរជាតិ ។ ម្យ៉ាងវិញទៀត ពេលនេះក្រសួងអប់រំ យុវជន និងកីឡា ក៏ដូចជាគណៈកម្មាធិការជាតិអូឡាំពិកកម្ពុជា កំពុងតែស្វែងរកអត្តពលិកឆ្នើម និងមានជំនាញច្បាស់ លាស់ មានបទពិសោធន៍គ្រប់គ្រាន់សម្រាប់ត្រៀមប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះទៀតផង ៕
ចែករំលែកព័តមាននេះ