រាជធានីភ្នំពេញ ៖ នៅទីបំផុតរបួសធ្ងន់ធ្ងររបស់កីឡាករបាល់ទាត់ល្បីឈ្មោះ លោកគួច សុគុម្ភៈ ត្រូវបានជួយសង្គ្រោះហើយ បន្ទាប់ពីលោកត្រូវបានបញ្ជូនទៅវះកាត់របួសទទួលបានជោគជ័យនៅក្នុងប្រទេសវៀតណាមកាលពីថ្ងៃទី២ ឧសភា ម្សិលម្ង៉ៃ ។ អ្នកគាំទ្រកីឡាកររូបនេះ រំពឹងថា លោកនឹងឆាប់បានវិលត្រឡប់មកកាន់ទីលានបាល់ទាត់ជាថ្មី ក្នុងពេលឆាប់ៗនេះ ។
គ្មានអ្នកណាមិនដឹងនោះទេ បន្ទាប់ពីលោកជួបគ្រោះថ្នាក់ដាច់សរសៃកែងជើងក្នុងការប្រកួតឱ្យក្រុមណាហ្គាវើលនៅពេលប៉ះជាមួយក្រុមមជ្ឈមណ្ឌលសកម្មភាពកម្ចាត់មីនកម្ពុជាកាលពីចុងសប្ដាហ៍កន្លងទៅ ។ សភាពគ្រោះថ្នាក់របស់លោកត្រូវគេមើលឃើញថា នឹងធ្វើឱ្យលោកប្រឈមនូវពិការភាពប្រសិនបើការវះកាត់តសរសៃកែងមិនទទួលបានជោគជ័យ ឬអាចនឹងតភ្ជាប់ដែរតែស្ថិតក្នុងកម្រិតប្រកួតថ្ងៃក្រោយលែងកើតដូចមុន ។ អ្នកគាំទ្រជាច្រើនបានបង្ហាញពីការបារម្ភចំពោះសុវត្ថិភាពរបស់ គួច សុគុម្ភៈ ក្រោយពីមានការបង្ហាញពីក្ដីបារម្ភរបស់គ្រូបង្វឹក និងក្រុមគ្រូពេទ្យនៅពេលពិនិត្យមើលសភាពរបួសរបស់កីឡាកររូបនេះ ក្រោយការប៉ះទង្គិច។ ក្នុងនោះសូម្បីតែភរិយា និងក្រុមគ្រួសាររបស់កីឡាកររូបនេះ ក៏បង្ហាញពីការភិតភ័យផងដែរប្រសិនបើគេពិតជាភ្លាត់ព្យាបាលមិនបានដូចដើម ហើយបណ្ដាលឱ្យបាត់បង់អាជីពកីឡាករបាល់ទាត់ដែលជាទីពំនាក់របស់គ្រួសារ ។
អ៊ីចឹងហើយទើបក្រោយពីកីឡាករជម្រើសជាតិល្បីឈ្មោះរូបនេះ ប្រកាសឱ្យដឹងថា ខ្លួនឆ្លងផុតពីពិការភាព និងអាចត្រឡប់មកកាន់ទីលានបាល់ទាត់បានដូចដើមវិញ ហាក់ធ្វើឱ្យអ្នកគាំទ្រសាទរ ខណៈដែលក្លិបណាហ្គាវើលដែលលោកជ្រកកោន ក៏បង្ហាញពីការត្រឡប់មកវិញនូវខ្សែបម្រើដ៏ខ្លាំងរូបនេះ ដើម្បីឱ្យក្រុមនៅតែល្អនៅពេលប៉ះប្រកួតជាមួយគូប្រជែង ។
កីឡាករគួច សុគុម្ភៈ បានប្រកាសនៅលើហ្វេសប៊ុកថា៖«សួស្តីអ្នកទាំងអស់គ្នា ឥឡូវនេះ ការវះកាត់(កែងជើង)របស់ខ្ញុំបានជោគជ័យហើយ ! ជាដំបូង ខ្ញុំសូមអរគុណដល់លោកគ្រូពេទ្យទាំងអស់ដែលខំប្រឹងវះកាត់ជើងរបស់ខ្ញុំរយៈពេលជាង២ម៉ោងរហូតទទួលបានជោគជ័យ ហើយខ្ញុំសូមអរគុណដល់គ្រួសារខ្ញុំដែលបារម្ភនិងមើលថែខ្ញុំរហូតមក។ ខ្ញុំក៏សូមអរគុណដល់ថ្នាក់ដឹកនាំ និងក្រុមគ្រួសារបាល់ទាត់ណាហ្គាវើលដែលបានយកចិត្តទុកដាក់ចំពោះបញ្ហារបួសរបស់ខ្ញុំគ្រប់ពេល និងជាពិសេសសូមអរគុណដល់មហាគ្រួសារបាល់ទាត់កម្ពុជាយើង ដែលពួកគាត់តែងតែគាំទ្រ គោរព និងស្រលាញ់រូបខ្ញុំរហូតមក ដោយពួកគាត់បានបង្ហាញពីក្តីបារម្ភ និងលើកទឹកចិត្តដល់រូបខ្ញុំតាមរយៈការផ្ញើសារនិងទូរស័ព្ទជាដើម!» ។ លោកថា ជោគជ័យដែលលោកបានទទួលក្នុងការវះកាត់ គឺកើតចេញពីក្ដីបារម្ភ និងការចូលរួមលើកទឹកចិត្តយ៉ាងខ្លាំងក្លាពីសំណាក់អ្នកគាំទ្រដែលលោកយល់ថា បើគ្មានការឈឺឆ្អាលក្នុងពេលដែលលោកមានគ្រោះថ្នាក់នោះទេ ក៏ប្រហែលជាធ្វើឱ្យលោកមិនមានសង្ឃឹមគ្រប់គ្រាន់ក្រោយការវះកាត់នោះដែរ ។
យោងតាមការបញ្ជាក់ពីមិត្តរួមក្រុម គួច សុគុម្ភៈ នឹងមានសភាពដូចដើមក្នុងពេលឆាប់ៗ ប៉ុន្តែលោកក៏ត្រូវការពេលវេលាមើលថែកន្លែងភ្ជាប់សរសៃ និងត្រូវហ្វឹកហាត់មួយរយៈពេលផងដែរ ទើបអាចត្រឡប់មកកាន់វិស័យបាល់ទាត់បានដូចដើម ។ នេះមិនមែនជាគ្រោះថ្នាក់លើកដំបូងរបស់គេនោះទេ ដោយពេលកន្លងមកលោកក៏ធ្លាប់មានរបួសបាក់ជើង និងត្រូវផ្អាកការប្រកួតអស់ជាច្រើនខែផងដែរដោយសារការប៉ះទង្គិចធ្ងន់ធ្ងរក្នុងពេលប្រកួតលើទីលាន ។ បើទោះជាមានគ្រោះថ្នាក់ម្ដងហើយម្ដងទៀតបែបនេះក្ដី ក៏គួច សុគុម្ភៈ នៅតែបង្ហាញជំហរមុតមាំថាមិនបោះបង់វិស័យបាល់ទាត់ ដោយសារតែក្នុងអាជីពនេះ ក្រៅពីជួយឱ្យលោកមានប្រាក់ចំណូលមិនចាញ់អាជីពផ្សេង ក៏ជួយឱ្យលោកទទួលបានកិត្តិយសបន្ទាប់ពីបានក្លាយខ្លួនជាតួអង្គសំខាន់ក្នុងក្រុមដែលលេងខ្សែបម្រើបានល្អនៅក្នុងពិភពបាល់ទាត់ផងដែរ ។ ក្រោយត្រឡប់មកពីប្រទេសវៀតណាម គួច សុគុម្ភៈ នឹងត្រូវឡើងចុះទៅមើលសរសៃដែលបានតភ្ជាប់យ៉ាងហោចម្ដង ឬ២ដងបន្ថែមទៀត ដើម្បីឱ្យប្រាកដថា សរសៃកែងដែលទើបតភ្ជាប់គឺគ្មានបញ្ហា និងមានសុវត្ថិភាព១០០ភាគរយ មុនពេលត្រឡប់មកកាន់ការប្រកួតនៅលើទីលានវិញ។ យ៉ាងណាក៏ដោយ ដំណឹងវះកាត់ជោគជ័យក៏ត្រូវគេចាប់អារម្មណ៍ថា បានធ្វើឱ្យអ្នកស្នេហាកីឡាបាល់ទាត់ភាគច្រើនអស់ចិត្តផងដែរ បន្ទាប់ពីមានការអន្ទះសាចង់ដឹងលទ្ធផលថា តើកីឡាកររូបនេះនឹងអាចត្រឡប់មកប្រកួតបានទៀតឬមិនបានក្រោយដាច់សរសៃកែងជើងធ្ងន់ធ្ងរបែបនេះនោះ ៕
ចែករំលែកព័តមាននេះ