រាជធានីភ្នំពេញ ៖ វេទិកាសេដ្ឋកិច្ចពិភពលោក ស្ដីពីអាស៊ាន គឺជាវេទិកាថ្នាក់តំបន់ដ៏សំខាន់ដែលមានរយៈពេលពីរថ្ងៃ និងមានការចូលរួមពីថ្នាក់ដឹកនាំនយោបាយ សេដ្ឋកិច្ច និងសង្គមកិច្ចនានា ដោយមានកិច្ចពិភាក្សាសំខាន់ៗ
រាជធានីភ្នំពេញ ៖ វេទិកាសេដ្ឋកិច្ចពិភពលោក ស្ដីពីអាស៊ាន គឺជាវេទិកាថ្នាក់តំបន់ដ៏សំខាន់ដែលមានរយៈពេលពីរថ្ងៃ និងមានការចូលរួមពីថ្នាក់ដឹកនាំនយោបាយ សេដ្ឋកិច្ច និងសង្គមកិច្ចនានា ដោយមានកិច្ចពិភាក្សាសំខាន់ៗលើប្រធានបទសេដ្ឋកិច្ច និងនយោបាយនាពេលបច្ចុប្បន្ន ដែលកម្ពុជានឹងធ្វើជាម្ចាស់ផ្ទះក្នុងការរៀបចំនៅរាជធានីភ្នំពេញ នាឆ្នាំក្រោយនេះ ។
កាលពីពេលថ្មីៗនេះ រាជរដ្ឋាភិបាលបានប្រកាសថា ខ្លួននឹងធ្វើជាម្ចាស់ផ្ទះរៀបចំវេទិកាសេដ្ឋកិច្ចពិភពលោកនេះ បន្ទាប់ពីកិច្ចជំនួបមួយរវាងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយលោកបណ្ឌិត Philipp Rösler អគ្គនាយកវេទិកាសេដ្ឋកិច្ចពិភពលោក ។
សម្ដេចតេជោ បានថ្លែងបញ្ជាក់ថា ៖ « តាមរយៈជំនួបនេះ នឹងផ្តល់ប្រយោជន៍យ៉ាងសំខាន់សម្រាប់ប្រទេសកម្ពុជា ក្នុងការរៀបចំវេទិកាសេដ្ឋកិច្ចពិភពលោកនៅឆ្នាំ២០១៧ ខាងមុខ ជាពិសេស តាមរយៈវេទិកានេះ ក៏បង្ហាញឲ្យឃើញថា កម្ពុជាកំពុងមានសេដ្ឋកិច្ចរីកលូតលាស់ជាបន្តបន្ទាប់ » ។
ប្រទេសកម្ពុជាបានបង្កើនវត្តមាន និងកិត្តិនាមរបស់ខ្លួននៅក្នុងវេទិកាសេដ្ឋកិច្ចពិភពលោក ក្នុងរយៈកាល៨ឆ្នាំកន្លងមកនេះ ។ ក្នុងនេះ សម្ដេចតេជោ ហ៊ុន សែន ថែមទាំងបានអញ្ជើញចូលរួមដោយផ្ទាល់ក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោកនៅឯទីក្រុងដាវ៉ូស ប្រទេសស្វ៊ីស និងនៅក្នុងកិច្ចប្រជុំកំពូលអាស៊ីបូព៌៌ាក្នុងទីក្រុងហ្សាកាតា កាលពីឆ្នាំមុនផងដែរ ។
លោកបណ្ឌិត Philipp Rösler បានមានប្រសាសន៍ដែរថា ៖ « យើងមានក្តីសោមនស្សរីករាយដែលកម្ពុជានឹងធ្វើជាម្ចាស់ផ្ទះសម្រាប់កិច្ចប្រជុំវេទិកាសេដ្ឋកិច្ចពិភពលោក ស្ដីពីអាស៊ាននៅឆ្នាំ២០១៧ ហើយនេះគឺជាព្រឹត្តិការណ៍សំខាន់មួយក្នុងចំណោមព្រឹត្តិការណ៍សំខាន់ៗនានារបស់វេទិកាសេដ្ឋកិច្ចពិភពលោក » ។
លោកបន្តថា ៖ « ប្រទេសកម្ពុជាមានរឿងរ៉ាវល្អៗជាច្រើនដែលអាចចែករំលែកជុំវិញបញ្ហាប្រឈម និងកាលានុវត្តភាពនៃកិច្ចអភិវឌ្ឍន៍សេដ្ឋកិច្ចដ៏ឆាប់រហ័សក្នុងសតវត្សរ៍ទី២១នេះ ។ រឿងរ៉ាវទាំងនេះ នឹងធ្វើឲ្យកិច្ចប្រជុំរបស់វេទិកាស្ដីពីអាស៊ាននាឆ្នាំក្រោយនេះ នឹងមានលក្ខណៈពិសេសថែមទៀត » ។
ការចូលរួមកាន់តែញឹកញាប់របស់កម្ពុជា ក្នុងកម្មវិធីនានារបស់វេទិកាសេដ្ឋកិច្ចពិភពលោក បានទទួលការគាំទ្រកាន់តែខ្លាំងឡើងពីសភាពាណិជ្ជកម្មអន្តរជាតិនៃកម្ពុជា (IBC) ដែលតែងបានជួយដល់រាជរដ្ឋាភិបាល និងប្រតិភូពាណិជ្ជកម្មរបស់កម្ពុជា ក្នុងការរៀបចំឲ្យមានការចូលរួមក្នុងកម្មវិធីនានាទូទាំងពិភពលោករបស់វេទិកាសេដ្ឋកិច្ចពិភពលោកនេះ ។
ប្រធានសភាពាណិជ្ជកម្ម IBC លោក Bretton Sciaroni បានមានប្រសាសន៍ថា ៖ « នេះក៏ជាដំណឹងល្អសម្រាប់កម្ពុជា ពីព្រោះវានឹងជួយពង្រឹងកិត្តិនាមរបស់កម្ពុជាបន្ថែមទៀត ក្នុងនាមជាដៃគូពាណិជ្ជកម្មដ៏សំខាន់ក្នុងតំបន់អាស៊ាន ហើយក៏ជាគោលដៅសម្រាប់ទទួលជោគជ័យលើការធ្វើពាណិជ្ជកម្មផងដែរ » ។
លោកបញ្ជាក់ថា ៖ « នេះជាសមិទ្ធិផលដ៏អស្ចារ្យកើតចេញពីកិច្ចខិតខំប្រឹងប្រែងរយៈកាល៨ឆ្នាំរបស់ IBC ដែលបានព្យាយាមកសាងស្ពានដ៏រឹងមាំរវាងរាជរដ្ឋាភិបាលកម្ពុជា និងវេទិកាសេដ្ឋកិច្ចពិភពលោក ជាពិសេស គឺតាមរយៈសមាជិកក្រុមប្រឹក្សានាយករបស់យើង គឺលោក Pierre Tami ដែលជាសហគ្រិនសង្គមរបស់វេទិកាសេដ្ឋកិច្ចពិភពលោក ឈានមុខគេ ហើយដែលតែងតែខិតខំក្នុងការជំរុញឲ្យមានទំនាក់ទំនងរវាងរដ្ឋាភិបាល និងវេទិកានេះ » ។
កិច្ចប្រជុំកំពូលនេះ គ្រោងនឹងរៀបចំនៅ ពាក់កណ្ដាលខែឧសភា ឆ្នាំ២០១៧ ប៉ុន្តែពេលវេលា និងទីកន្លែងនៅមិនទាន់បាន បង្ហាញឲ្យជាក់ច្បាស់នៅឡើយទេ ។ ជាធម្មតា ព្រឹត្តិការណ៍បែបនេះបានទាក់ទាញប្រតិភូឲ្យចូលរួមប្រមាណជា៧០០នាក់ ក្នុងនោះមួយចំនួនធំ គឺធ្វើដំណើរមកជាមួយនឹងស្វាមី ឬភរិយា ។
គួរបញ្ជាក់ថា ព្រឹត្តិការណ៍នេះក៏ជាឱកាសមាសសម្រាប់អាជីវកម្មនៅកម្ពុជាផងដែរ ដោយនៅពេលនោះ រាជធានីភ្នំពេញនឹងស្វាគមន៍ទទួលភ្ញៀវសំខាន់ៗជាច្រើន បើទោះបីជាពេលនោះជារដូវភ្ញៀវទេសចរមានតិចក្តី ។
GrowAsia នឹងរៀបចំវេទិកាដំបូងរបស់ខ្លួននៅកម្ពុជា នៅថ្ងៃទី១០ ឧសភា ហើយនេះជាសញ្ញាមួយទៀតបង្ហាញពីចំណងទាក់ទងកាន់តែរឹងមាំរវាងកម្ពុជា ជាមួយស្ថាប័នអន្តរជាតិសំខាន់ៗ ។ នៅក្នុងកិច្ចប្រជុំ IBC កាលពីឆ្នាំមុន GrowAsia បានប្រកាសថា ខ្លួននឹងបើកលេខាធិការដ្ឋាននៅក្នុងទីក្រុងភ្នំពេញ ដើម្បីជួយគាំទ្រដល់វិស័យកសិកម្មកម្ពុជា ៕
ចែករំលែកព័តមាននេះ