រាជធានីភ្នំពេញ ៖ នៅក្នុងត្រីមាសទី១ ឆ្នាំ២០១៦នេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន៤៥គម្រោង (រួមបញ្ចូលទាំងគម្រោងពង្រីកផលិតកម្មចំនួន២គម្រោង) ដែលមានទុនវិនិយោគសរុបប្រមាណ
រាជធានីភ្នំពេញ ៖ នៅក្នុងត្រីមាសទី១ ឆ្នាំ២០១៦នេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន៤៥គម្រោង (រួមបញ្ចូលទាំងគម្រោងពង្រីកផលិតកម្មចំនួន២គម្រោង) ដែលមានទុនវិនិយោគសរុបប្រមាណ ១.០០៧លានដុល្លារ និងអាចបង្កើតការងារបានចំនួនប្រមាណជិត៥ម៉ឺនកន្លែង ។ នេះបើយោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ។
តាមសេចក្តីប្រកាសនេះគូសបញ្ជាក់ថា នៅក្នុងគម្រោងទាំងនោះបានបែងចែកតាមវិស័យ ក្នុងនោះឧស្សាហកម្មចំនួន៣៦គម្រោង ទេសចរណ៍៥គម្រោង កសិកម្មនិងកសិ-ឧស្សាហកម្ម៣គម្រោង និងហេដ្ឋារចនាសម្ព័ន្ធ១គម្រោង។ ចំពោះគម្រោងវិនិយោគទាំងនេះ វិនិយោគិនកម្ពុជាស្ថិតនៅលំដាប់ទី១ (៥៨,៨% នៃដើមទុនវិនិយោគសរុប) បន្ទាប់មកគឺវិនិយោគិនចិន ស្ថិតនៅលំដាប់ទី២ និងវិនិយោគិនជប៉ុន ស្ថិតនៅលំដាប់ទី៣ ។
លោក ស្រី ចន្ធី អ្នកវិភាគសេដ្ឋកិច្ចឯករាជ្យកម្ពុជា បានមានប្រសាសន៍ថា ៖ « នេះគឺជារឿងល្អដែលមានវិនិយោគិនមកបោះទុនវិនិយោគនៅក្នុងប្រទេសកម្ពុជា ។ ប៉ុន្តែយើងសង្កេតឃើញថា វិនិយោគិននៅក្នុងស្រុកមានកម្រិតខ្លាំងក្លាជាងវិនិយោគិនមកពីខាងក្រៅប្រទេស មានន័យថា វិនិយោគិនក្នុងស្រុកមានលទ្ធភាព និងតួនាទីសំខាន់ជាងនាពេលកន្លងទៅ » ។
ដោយសារតែកម្ពុជាមានបទពិសោធន៍ផ្នែកទំនាក់ទំនងការបរទេសល្អដូចជា ចិន ជប៉ុន និងបណ្តាប្រទេសផ្សេងៗទៀត ហើយកម្ពុជាមានស្ថិរភាព សន្ដិសុខ ក៏ដូចជាច្បាប់វិនិយោគមានលក្ខណៈអំណោយផលសម្រាប់បរទេស បានធ្វើឲ្យគេមានទំនុកចិត្ត ទើបកម្ពុជាក្លាយជាក្រសែភ្នែកក្នុងការវិនិយោគរបស់វិនិយោគិនបរទេស ។
អ្នកវិភាគសេដ្ឋកិច្ចឯករាជ្យកម្ពុជារូបនេះបានលើកឡើងថា ៖ « កន្លងមក បើតាមខ្ញុំបានដឹង រាជរដ្ឋាភិបាលកម្ពុជា ជាមួយរដ្ឋាភិបាលចិន និងជប៉ុន ក៏ធ្លាប់បានចុះអនុស្សរណៈយោគយល់រវាងគ្នានិងគ្នាផងដែរ គឺឲ្យកម្ពុជាគាំពារនូវផលប្រយោជន៍នៃការវិនិយោគរបស់ពួកគេ នៅពេលដែលវិនិយោគិននៃប្រទេសទាំងនោះចូលមករកស៊ីនៅកម្ពុជា ដោយផ្តល់នូវការការពារ និងយកចិត្តទុកដាក់ឲ្យដូចគ្នានឹងវិនិយោគិននៅក្នុងប្រទេស ក៏ដូចជាវិនិយោគិនមកពីប្រទេសផ្សេងទៀតដែរ ។ ម្យ៉ាងទៀត ដោយមានទីផ្សារធំទូលាយនៅក្នុងតំបន់អាស៊ាន ដែលកម្ពុជាស្ថិតក្នុងប្រទេសអាស៊ានទាំង១០, កម្លាំងពលកម្មធូរថ្លៃនៅឡើយ បើប្រៀបធៀបនឹងប្រទេសក្នុងតំបន់, កម្ពុជានៅមានផ្សារដែលគេបើកចំហឲ្យនៅឡើយដូចជា នៅសហគមន៍អឺរ៉ុប ចិន និងជប៉ុន ។ល។ អ៊ីចឹងហើយក្នុងរយៈពេល២ឆ្នាំទៀត យើងនៅមានឱកាសល្អអាចពង្រឹងវិស័យឧស្សាហកម្មធុនកណ្តាល និងធុនធ្ងន់បាន។ លើសពីនេះទៀត ស្ថានភាពនយោបាយនៅកម្ពុជាមានស្ថិរភាព នៅពេលបោះឆ្នោតខាងមុខ បើទោះបីការឃោសនាបោះឆ្នោតមានការរំខានបន្តិចបន្ដួចក្តី ក៏គ្មានបញ្ហាអ្វីដែរ ឲ្យតែយើងរក្សាស្ថិរភាពបាន » ។
លោកបន្ដថា ៖ « កន្លងមក កម្ពុជាមានការវិនិយោគតែទៅលើវិស័យកាត់ដេរប៉ុណ្ណោះ។ ប៉ុន្តែពេលនេះបានវិនិយោគខាងវិស័យឧស្សាហកម្មផងដែរ ដែលនេះជាការអបអរមួយ និងអាចឆ្លើយតបនឹងគោលនយោបាយឧស្សាហកម្មដែលទើបតែចេញបាន១ឆ្នាំ ។ ម្យ៉ាងទៀត ដោយសារប្រទេសយើងមានឱកាសវិនិយោគក្នុងវិស័យកសិឧស្សាហកម្ម វិស័យទេសចរណ៍ ដោយក្នុងមួយឆ្នាំៗភ្ញៀវទេសចរបរទេសដែលចូលមកទស្សនាកម្ពុជា បានកើនឡើងជាបន្តបន្ទាប់ » ។
យោងតាមរបាយការណ៍របស់ក្រសួងពាណិជ្ជកម្មបានបង្ហាញថា នៅក្នុងឆ្នាំ២០១៥ក្រុមហ៊ុនដែលបានចុះបញ្ជីនៅក្រសួងពាណិជ្ជកម្ម ក្នុងនោះក្រុមហ៊ុនក្នុងស្រុកមានចំនួន៣.៤០០ក្រុមហ៊ុន, ចិនមានចំនួន១.០៥៥ក្រុមហ៊ុន, កូរ៉េខាងត្បូងមានចំនួន២៧៨ក្រុមហ៊ុន, ជប៉ុនមានចំនួន២៥០ក្រុមហ៊ុន, ម៉ាឡេស៊ីមានចំនួន១៩៣ក្រុមហ៊ុន, វៀតណាមមានចំនួន១៨៦ក្រុមហ៊ុន, ថៃមានចំនួន១៧៩ក្រុមហ៊ុន, បារាំងមានចំនួន៩៤ក្រុមហ៊ុន, សហរដ្ឋអាមេរិកមានចំនួន៩៣ក្រុមហ៊ុន, អូស្ត្រាលីមានចំនួន៧៣ក្រុមហ៊ុន និងអង់គ្លេសមានចំនួន៦៤ក្រុមហ៊ុន ។
ក្នុងឆ្នាំ២០១៥ ការនាំចេញរបស់កម្ពុជា មានទឹកប្រមាណ៨,៩៩ប៊ីលានដុល្លារ ខណៈការនាំចូលមានតម្លៃ១១,៥៤ប៊ីលានដុល្លារ ក្នុងនោះទំនិញដែលកម្ពុជាបាននាំចេញដូចជា សម្លៀកបំពាក់ ស្បែកជើង កង់ អង្ករ កៅស៊ូ ពោត ដំឡូងមី ស្ករស ម្រេច ។ រីឯទំនិញនាំចូលដូចជា វត្ថុធាតុដើមក្នុងវិស័យកាត់ដេរ គ្រឿងសំណង់ ប្រេងឥន្ធនៈ យានយន្ត គ្រឿងសម្អាង និងឱសថបរិក្ខារពេទ្យ និងគ្រឿងយន្តកសិកម្ម ជាដើម ។ ដោយឡែក ការនាំចេញនាំចូលរបស់កម្ពុជាគិតជាទឹកប្រាក់មានតម្លៃ២០,៥៣ប៊ីលានដុល្លារកើនឡើងជាង១៣% បើធៀបនឹងឆ្នាំ២០១៤ ។ នេះបើតាមរបាយការណ៍បានបញ្ជាក់ ៕
ចែករំលែកព័តមាននេះ