ខេត្តបន្ទាយមានជ័យ ៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងថា ក្លឹបម៉ាស្សាមួយកន្លែង ស្ថិតនៅក្បែរផ្សាររាត្រី ក្នុងភូមិបាលិលេយ្យ១ សង្កាត់-ក្រុងប៉ោយប៉ែត បានលួចបង្កប់លេងល្បែងបៀស៊ីសងទ្រង់ទ្រាយធំ ដែលអ្នកលេងមួយចំនួនជាមន្ត្រីសមត្ថកិច្ច និងអាជីវករក្រុងប៉ោយប៉ែត ។
សេចក្តីរាយការណ៍បានបន្តថា អ្នកលេងល្បែងបៀស៊ីសងរាប់សែនរៀលនៅទីតាំងខាងលើ ពីមុនធ្លាប់លេងនៅហាងគុយទាវយីហោ «តាំង ប៊ុនហេង» ប៉ុន្តែដោយសារតែហាងគុយទាវនេះ ត្រូវសមត្ថកិច្ចបង្ក្រាបឃាត់ខ្លួនអ្នកលេង និងម្ចាស់ប្រមាណជា២ខែមុននោះរួចមក ទើបពួកគេទៅលេងនៅក្លឹបម៉ាស្សា ហាត់ប្រាណនិងស្នុកឃើរ ដែលគេដឹងថាមានអ្នកមើលការខុសត្រូវនិងម្ចាស់ជាមន្ត្រីកងរាជអាវុធហត្ថខេត្តបន្ទាយមានជ័យ ។
ប្រភពបន្តថា ក្រៅពីទីតាំងក្លឹបម៉ាស្សាបង្កប់ល្បែងស៊ីសងខាងលើ ក៍មានការបើកល្បែងស៊ីសងជាច្រើនទៀតនៅក្បែរនោះដែរដូចជាហ្គេមបាញ់ត្រី ដែលគេស្គាល់ថាទីតាំងហ្គេមបាញ់ត្រីនេះជារបស់មន្ត្រីច្រកទ្វារអន្តរជាតិប៉ោយប៉ែតដែលមានអំណាចម្នាក់ ។
ប្រជាពលរដ្ឋក៍បានសំណូមពរឲ្យស្នងការរងនគរបាលខេត្តបន្ទាយមានជ័យទទួលផែនសន្តិសុខ លោក សិទ្ឋិ ឡោះ ចុះទៅបង្ក្រាបទីតាំងក្លឹបម៉ាស្សាបង្កប់ល្បែងស៊ីសង និងទីតាំងល្បែងភ្នាល់បាល់តាមអនឡាញជាច្រើនទៀតនៅក្នុងក្រុងប៉ោយប៉ែត ៕
ចែករំលែកព័តមាននេះ