រាជធានីភ្នំពេញ ៖ បន្ទាប់ពីមានផែនការដាក់បម្រាម របស់អភិបាលរាជធានីភ្នំពេញ កាលពីអំឡុងខែកុម្ភៈឆ្នាំ២០១៦កន្លងមកនោះ ពេលនេះមន្ទីរសង្គមកិច្ចអតីតយុទ្ធជនរាជធានីបានចាប់ ផ្តើមអនុវត្តន៍នូវវិធានការក្តៅគឺចុះចាប់ និងប្រមូលឧបករណ៍តន្ត្រីរបស់ជនពិការ ដែលបានធ្វើសកម្មភាពប្រគំរៃអង្គាសប្រាក់តាមចិញ្ចើមផ្លូវសាធារណៈ ដែលអាជ្ញាធរនេះបានចោទប្រកាន់ថា ធ្វើឲ្យប៉ះពាល់ដល់សណ្តាប់ធ្នាប់សាធារណៈ បន្ទាប់ពីអប់រំណែនាំតែមិនធ្វើតាម ។
លោក សន សុផល ប្រធានមន្ទីរសង្គមកិច្ចអតីតយុទ្ធជនរាជធានីភ្នំពេញ បានឲ្យដឹងថា អនុវត្តន៍តាមផែនការរបស់សាលារាជធានីភ្នំពេញ គឺមិនអនុញ្ញាតឲ្យជនពិការ មានការប្រគំតន្ត្រីនៅតាមចិញ្ចើមផ្លូវទៀតទេ គឺត្រូវលុបបំបាត់ឲ្យអស់ ។ លោកបន្តថា ការលេងភ្លេងនេះមិនមែនហាមឃាត់ឬបិទសិទ្ធិទាំងស្រុងនោះទេ ប៉ុន្តែត្រូវរកកន្លែងណាសមរម្យ ដែលមិនមានការប៉ះពាល់ ដោយមិនអាចឲ្យដាក់តាមការនឹកឃើញបានទេ ហើយអាជ្ញាធរក៏មានការពិចារណាផងដែរ បើជនពិការណាមានការលំបាក គ្មានទីពឹងពិតប្រាកដមែន អាចស្នើសុំឲ្យជួយបានដូចជាមានរបបប្រចាំខែ ។ លោកថា បើមានជាសមាគមគេមានមូលនិធិជួយ គឺមិនអនុញ្ញាតឲ្យដើររហេតរហូតឬអនាថាទេ ។ លោកថា អាជ្ញាធរក៏មិនចង់ធ្វើបែបនេះដែរ មុននឹងធ្វើមានការអប់រំនិងណែនាំជាច្រើនលើកច្រើនសារមកហើយ ។
លោក សន សុផល បានឲ្យដឹងទៀតថា កាលចាប់ផ្តើមដំបូងមានជាង១០ទីតាំង ក្រោយមកអាជ្ញាធរបានធ្វើការណែនាំ គឺបាត់អស់ច្រើន នៅសល់ប្រមាណ៣កន្លែង ដែលមន្ទីរបានចុះឃាត់គាត់ដែរ តែមិនស្តាប់ ។ លោកថា រហូតមកដល់ពេលនេះ ទើបសម្រេចចិត្តធ្វើការដកហូតឧបករណ៍និងសម្ភារតែម្តង ដែលអ្នកទាំងនេះមិនមែនជាសមាគមទេ គឺជាជនពិការឯកជនបានធ្វើសកម្មភាពខ្លួនឯងតែម្តង ។
ជាក់ស្តែង ខណៈ នេះ មន្ទីរសង្គមកិច្ចរាជធានី បានចុះណែនាំ និងដកហូតសម្ភារតន្ត្រីជនពិការ២ក្រុមនៅតាមបណ្តោយផ្លូវណតប្រ៊ីត ដែលរឹងរូសឲ្យបញ្ឈប់សកម្មភាព ដែលធ្វើឲ្យប៉ះពាល់ចរាចរណ៍ និងសណ្តាប់ធ្នាប់សាធារណៈ ដើម្បីជាការព្រមានឲ្យរាងចាលតែម្តង ។
គួររំលឹកថា លោក ប៉ា សុជាតិវង្ស អភិបាលរាជធានីភ្នំពេញ ក្នុងអង្គប្រជុំជាមួយគណៈបញ្ជាការឯកភាពក្រោមឱវាទ នៅសាលារាជធានីភ្នំពេញ កាលពីថ្ងៃទី៤ កុម្ភៈ ២០១៦ បានលើកឡើងថា ការប្រគំតន្ត្រីរបស់ក្រុមជនពិការនៅតាមភ្លើងស្តុប និងនៅតាមទីសាធារណៈនានា ដើម្បីរៃអង្គាសលុយដែលបាននិងកំពុងធ្វើរាល់ថ្ងៃនេះ គឺពិតជាធ្វើឲ្យប៉ះពាល់យ៉ាងធ្ងន់ធ្ងរ លើបញ្ហាសណ្តាប់ធ្នាប់សាធារណៈ ដែលក្នុងនាមអាជ្ញាធររាជធានីភ្នំពេញ មិនបណ្តាយឲ្យពួកគាត់បន្តសកម្មភាពបែបនេះបានទេ ។
លោកបន្តថា សូមឲ្យអាជ្ញាធរគ្រប់ខណ្ឌ ត្រូវបញ្ឈប់សកម្មភាពនេះជាបន្ទាន់ ។ បើខណ្ឌណានៅតែមានការប្រគំតន្ត្រី រៃអង្គាសលុយតាមភ្លើងស្តុបទៀតត្រូវទទួលខុសត្រូវ ហើយត្រូវស្វែងយល់ និងពិនិត្យស្ថានភាពរស់នៅ របស់ពួកគាត់ឲ្យបានច្បាស់លាស់ថា តើបងប្អូនពិការទាំងនោះ មានអង្គការណាជាអ្នកមើលការខុសត្រូវ ហើយពួកគាត់ខ្វះខាតអ្វីខ្លះ សាលារាជធានីភ្នំពេញនឹងដោះស្រាយជូនពួកគាត់តែម្តង ។
តំណាងអង្គការជនពិការកម្ពុជាធ្លាប់បានបញ្ជាក់ថា ការផ្តល់ជំនាញវិជ្ជាជីវៈដល់ជនពិការ គឺជាការវិនិយោគយូរអង្វែង អាចស្វែងរកប្រាក់ចំណូលបានជារៀងរហូត ។ ជាមធ្យោបាយចំពោះមុខនេះ សាលាក្រុងគួរតែរៀបចំកន្លែងឲ្យពួកគាត់ច្រៀងឲ្យបានត្រឹមត្រូវ នៅតាមតំបន់រមណីយដ្ឋានទេសចរណ៍ ផ្សារទំនើប ឬតាមរង្គសាលជាដើម ដើម្បីឲ្យពួកគាត់មានចំណូល ខណៈដែលសាលាក្រុងកំពុងស្វែងរកមុខរបរ ឬឱកាសការងារសម្រាប់ជនពិការនោះ ។
ចំណែកក្រុមជនពិការដែលច្រៀងនៅម្តុំភ្លើងស្តុបពេទ្យចិនធ្លាប់និយាយថា ការច្រៀងនៅតាមដងផ្លូវសាធារណៈកន្លងមក បានក្លាយជាចំណូលដ៏សំខាន់មួយក្នុងការដោះស្រាយជីវភាពប្រចាំថ្ងៃ អាចរកកម្រៃបានពី៣ម៉ឺនទៅ៥ម៉ឺនរៀលក្នុងម្នាក់ ។ ទោះបីជាមានការខ្មាស់អៀនឬធ្វើមិនសមនៅតាមទីសាធារណៈក៏ដោយ ប៉ុន្តែវាជាការងារមួយដោយសុចរិតបញ្ចេញកម្លាំង បញ្ចេញជំនាញតាមរយៈសំនៀងពីរោះ ដើម្បីស្វែងរកកម្រៃ ជាជាងការលើកដៃសំពះសុំទានគេ ។ ម្យ៉ាងទៀតទង្វើរបស់ពួកគាត់នេះ មានសប្បុរសជនបានគាំទ្រ និងអាណិតអាសូរ ដែលជាការចូលរួមលើកកម្ពស់ជីវភាពរបស់បងប្អូនជនពិការផងដែរ ។
សូមបញ្ចាក់ថា តាមការឲ្យដឹងពីអង្គការជនពិការថា មួយរយៈពេលកន្លងមកនេះ ក្រុមតន្ត្រីជនពិការបានដាក់ពង្រាយគ្នាច្រៀងនៅតាមភ្លើងស្តុប តាមផ្សារ ឬវិថីសំខាន់ៗ ក្នុងរាជធានីភ្នំពេញ មានប្រមាណជាង៣០ក្រុម ដោយក្នុងនោះមានទាំងសមាគម និងក្រុមជនពិការឯកជនផងដែរ ។
អ្នកតាមដានមានមតិថា បញ្ហាដែលត្រូវជួយដល់ជនពិការនោះ គប្បីស្វែងរកវិធីដោះស្រាយជាមុនសិន មុនពេលលើកតោកលើកហ៊ឹងរបស់គ្នាបែបនេះ ច្បាស់ជាធ្វើឱ្យជនពិការដាច់បាយមិនខាន ។ ទោះបីជាបែបណា របរនេះវាគ្រាន់បើជាងពួកជនពាល និងចោរទាំងឡាយដើរឆក់ប្លន់រាល់ថ្ងៃដែរ ។
មជ្ឈដ្ឋានខ្លះផ្តល់មតិថា ជនពិការដូចជាពិការភ្នែកជាដើម ទេវតាបានប្រទាននូវសំនៀងដ៏គួរឱ្យចាប់អារម្មណ៍ ទើបពួកគេយកសំនៀងដ៏ក្រអួនទាំងនោះទៅស្វែងរកការឧបត្ថម្ភតាមទីសាធារណៈ ៕
ចែករំលែកព័តមាននេះ