រាជធានីភ្នំពេញ ៖ តារាចម្រៀងឆែលី ដាឡែន ដែលចេញទៅសម្ដែងនៅអាមេរិក រួមជាមួយសិល្បករមួយចំនួនទៀតនោះ បាននៅបន្ដរហូតដល់ចុងខែកក្កដា ឆ្នាំ២០១៦ លើសកំណត់ពីមុនយ៉ាងយូរត្រឹមចុងខែមេសា ។
រាជធានីភ្នំពេញ ៖ តារាចម្រៀងឆែលី ដាឡែន ដែលចេញទៅសម្ដែងនៅអាមេរិក រួមជាមួយសិល្បករមួយចំនួនទៀតនោះ បាននៅបន្ដរហូតដល់ចុងខែកក្កដា ឆ្នាំ២០១៦ លើសកំណត់ពីមុនយ៉ាងយូរត្រឹមចុងខែមេសា ។ អ្នកនាងឆៃលី ដាឡែន លោកមាស សាលី និងកញ្ញាលីលី បានចាកចេញពីកម្ពុជា កាលពីខែមីនា ឆ្នាំ២០១៦ ។ ដាឡែន ដែលនិយមឈុតសម្លៀកបំពាក់សិចសុីនោះបានរៀបចំខ្លួនបែបស្រគត់ស្រគំ ដើម្បីជៀសពីមតិរិះគន់ និងប៉ះពាល់ដល់អាជីពរបស់ខ្លួន ។ ស្រមោលអាក្រក់នាពេលកន្លងមក ធ្វើឱ្យនាងបាក់ស្បាត ។
ឆ្លងឆ្លើយជាមួយអ្នកយកព័ត៌មានកោះសន្ដិភាពតាមរយៈប្រព័ន្ធសារអេឡិចត្រូនិក កាលពីថ្ងៃទី១ ឧសភា ឆៃលី ដាឡែន បញ្ជាក់ថា នាងត្រូវបន្ដសម្ដែងនៅអាមេរិករហូតដល់ខែកក្កដាឯណោះ ។ ពីមុនគ្រោងយ៉ាងយូរចុងខែមេសា ត្រូវត្រឡប់មកស្រុកវិញ ។ ដាឡែន និងក្រុមរបស់នាងបានសម្រេចចិត្តទទួលយកកិច្ចសន្យាបន្ដ តាមសំណូមពរជនរួមជាតិខ្មែរនៅទីនោះ ។ ទោះជានឹកស្រុក ក៏ពួកនាងបង្ខំចិត្ដបន្ដនៅសម្ដែងដែរ ។ ឆៃលី ដាឡែន និយាយថា «ការសម្ដែងរបស់ខ្ញុំលើកនេះ គឺប្រើរូបភាពបែបស្រគត់ស្រគំជាងមុនស្ទើរតែទាំងស្រុង គឺប្រើឈុតសម្លៀកបំពាក់បិទជិតបែបបុរាណប្រពៃណីខ្មែរ ក៏ព្រោះតែមិនហ៊ានស្លៀកពាក់សិចសុីដូចលើកមុនឡើយ ។ កន្លងមកនាងខ្ញុំមិនបានគ្រឈុត យេៗផងនៅមានអ្នកបង្ហោះរូបចាស់ជាន់ពន្លិចនាងខ្ញុំ ។ នាងខ្ញុំឆ្ងល់ណាស់នៅស្រុកខ្មែរមានតារា ថ្មីៗមួយចំនួនគេលេងខ្លួនចេញគល់ទ្រូង ស្លៀកពាក់សិចសុីស្ទើរស្រាតអស់សម្លៀកពាក់ បើមើលទៅខ្លាំងជាងនាងខ្ញុំដប់ម្ភៃដងហេតុអីក៏មិនថា ។ ចំពោះតែដាឡែនមួយ មានអ្នកអង្គុយចាំរិះគន់អត់ស្វាងម្ដងហើយម្ដងទៀត បែបចង់ឱ្យនាងខ្ញុំអត់ការងារ ឬចង់បិទអាជីពនាងខ្ញុំ ឱ្យទៅស្រុកខ្មែរវិញទិញត្រីងៀត ត្រីឆ្អើរហូបមួយជីវិតទើបលែងទើសពីការស្លៀកពាក់របស់នាងខ្ញុំ ។ ពិតជាឆ្ងល់គេវិញដូចជាសុខណាស់ ។ យ៉ាងណានាងខ្ញុំ មិនបណ្ដោយឱ្យរឿងចាស់ជាន់ឈ្លីទៀតទេ ស្របពេលនេះបងប្អូននៅអាមេរិក ម្នាក់ៗ គាត់ស្រលាញ់នាងខ្ញុំ ស្រលាញ់ក្រុមសិល្បករខ្មែរកាន់តែច្រើន ខ្លះថានាងខ្ញុំពិតជាប្លែកជាងពីមុន ដូចជាស្រគត់ស្រគំមិន យេៗដូចមុន ហើយមើលទៅពិតជាស្អាតម្ប៉ាងដែរការគ្រងសម្លៀកបំពាក់បែបនេះ ពិតជាសមនឹងការលើកតម្កើងប្រពៃណីខ្មែរ គ្រាយើងនៅស្រុកគេ» ។
ការបន្ដការសម្ដែងជាច្រើនខែទៀតនៅអាមេរិក ឆៃលី ដាឡែន និយាយថា ដើម្បីបំពេញចិត្តអ្នកគាំទ្រ និងចាត់ទុកថាជាសំណាងមួយដែរ ដែលអាជីពសិល្បៈរបស់នាងនៅតែលូតលាស់ទៅមុខ ដោយមានអ្នកចូលចិត្តទាំងក្នុង និងក្រៅស្រុក ។ ឆែលី ដាឡែន និយាយថា នាងនឹងមកកម្ពុជាវិញនៅពេលចប់ភារកិច្ច ៕
ចែករំលែកព័តមាននេះ