រាជធានីភ្នំពេញ ៖ យោងតាមដីកាកោះរបស់អយ្យការអមសាលាដំបូង ដែលចុះហត្ថលេខាដោយលោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានអញ្ជើញលោក អ៊ូ វីរៈ ជាជនសង្ស័យឲ្យចូលបំភ្លឺនៅថ្ងៃទី១២ ឧសភា វេលាម៉ោង៩ព្រឹក ដើម្បីសាកសួរលោកលើបណ្តឹងរបស់លោក សុខ ឥសាន អ្នកនាំពាក្យគណបក្សប្រជាជនកម្ពុជា ដែលចោទពីបទបរិហារកេរ្តិ៍ជាសាធារណៈ ។
លោក អ៊ូ វីរៈ គឺជាប្រធានអង្គការវេទិកាអនាគត និងជាអ្នកឃ្លាំមើលស្ថានការណ៍នយោបាយ ។ បណ្តឹងរបស់លោក សុខ ឥសាន បានធ្វើឡើងបន្ទាប់ពីប្រតិកម្មជាចំហពីសំណាក់សម្តេចតេជោ ហ៊ុន សែន ដែលជាប្រធានគណបក្សប្រជាជនកម្ពុជា បានអំពាវនាវដល់មន្ត្រីបក្សគ្រប់លំដាប់ថ្នាក់ត្រូវតែឆ្លើយតបចំពោះការនិយាយបង្ខូចកិត្តិយសបក្សប្រជាជនកម្ពុជា ។
បណ្តឹងប្រឆាំងលោក អ៊ូ វីរៈ នេះបានធ្វើឡើងបន្ទាប់ពីលោកបានវិភាគថា យុទ្ធសាស្ត្ររបស់បក្សកាន់អំណាចនៅពេលនេះ គឺព្យាយាមគាបសង្កត់លោក កឹម សុខា និងហិរញ្ញវត្ថុរបស់លោក ពាក់ព័ន្ធនឹងសំណុំរឿងសេ្នហាជាមួយនាង ខុម ចាន់តារ៉ាទី ហៅស្រីមុំ ។
កាលពីថ្ងៃទី២៥ មេសា កន្លងទៅនេះ សម្តេចតេជោ ហ៊ុន សែន បានប្រកាសក្នុងហ្វេសប៊ុកផ្លូវការរបស់សម្តេចថា មិនអត់ឱនឲ្យនរណាដែលបង្កាច់បង្ខូចកិត្តិយសបក្សប្រជាជនកម្ពុជាទៀតហើយ ។ ក្នុងពាក្យបណ្តឹងរបស់លោក សុខ ឥសាន ក៏បានទាមទារឲ្យតុលាការផ្តន្ទាទោស និងទារសំណងជំងឺចិត្តចំនួន៤០០លានរៀល ។
អ្នកតាមដានស្ថានការណ៍បានធ្វើការកត់សម្គាល់ថា សំណុំរឿងស្រីមុំបានលាតសន្ធឹងដល់លោក អ៊ូ វីរៈហើយ បន្ទាប់ពីបុគ្គលិកសមាគមអាដហុក និងមន្ត្រី គ.ជ.ប ត្រូវបានឃុំខ្លួននៅពន្ធនាគារព្រៃស បន្ទាប់ពីមេឃុំស្រក លោក ស៊ាង ចែត បានជាប់ឃុំជាបណ្តោះអាសន្ននៅព្រៃសរួចហើយ ។ មិនទាន់ដឹងថា អានុភាពស្នេហាលោក កឹម សុខា និងស្រីមុំ បន្តមហិទ្ធិឫទ្ធិដល់ពេលណានោះទេ ។ តាមអ្នកតាមដានកំពុងសម្លឹងទៅលោកកឹម សុខា ហើយ ៕
ចែករំលែកព័តមាននេះ