ខេត្តឧត្តរមានជ័យ៖ ក្រុមអាជ្ញាធរថៃ បានដោះលែងពលរដ្ឋខ្មែរម្នាក់ ដែលជាប់ទោសអស់ជាង ៨ឆ្នាំ។ បុរសនោះ ត្រូវបានថៃ បញ្ជូនមកដល់ទឹកដីកម្ពុជា កាលពីព្រឹកថ្ងៃទី២១ ខែវិច្ឆិកា ឆ្នាំ២០២១ ដោយប្រគល់ឱ្យក្រុមអាជ្ញាធរកម្ពុជា បម្រើការងារ នៅច្រកទ្វារអន្តរជាតិជាំ ក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
ពលរដ្ឋខ្មែរ ដែលក្រុមអាជ្ញាធរថៃ ដោះលែងនោះ ឈ្មោះ ថេង យូ ភេទប្រុស អាយុ ៣៨ឆ្នាំ រស់នៅភូមិជាំ ឃុំត្រពាំងប្រីយ៍ ស្រុកអន្លង់វែង។ បុរសនោះ បានរៀបរាប់ថា មុនពេលក្រុមអាជ្ញាធរថៃឃាត់ខ្លួន គឺរូបគេ ត្រូវបានពលរដ្ឋថៃម្នាក់ ជួលឱ្យកាន់គ្រឿងញៀនពីកម្ពុជា ដើចូល ទៅក្នុងទឹកដីថៃ ហើយក៏ត្រូវក្រុមអាជ្ញាធរថៃ ឃាត់ខ្លួន ឆែករកឃើញថ្នាំញៀន កាលពីថ្ងៃទី២៤ ខែមេសា ឆ្នាំ២០១៣។ រូបគេត្រូវជាប់ពន្ធនាគារ នៅខេត្តអ៊ូប៊ុន ប្រទេសថៃ រហូតមកទល់ថ្ងៃទី២១ ខែវិច្ឆិកា ឆ្នាំ២០២១ ក៏ត្រូវបានដោះលែងឱ្យមានសេរីភាពវិញ។
មន្ត្រីដែលបម្រើការងារ នៅច្រកទ្វារអន្តរជាតិជាំ បានឱ្យដឹងថា ក្រោយពីបានទទួលពលរដ្ឋខ្មែរ ក្រុមអាជ្ញាធរកម្ពុជា បានធ្វើកំណត់ហេតុ និងធ្វើកិច្ចសន្យា ឈប់ប្រព្រឹត្តបទល្មើសបន្តទៀត និងប្រគល់ទៅជំនាញគ្រូពេទ្យ ប្រចាំច្រកទ្វារ នាំយកទៅធ្វើចត្តាឡីស័កផងដែរ៕ ឱម សារឿន
ចែករំលែកព័តមាននេះ