ស៊េអូល,កូរ៉េខាងត្បូង ៖ បណ្ដាប្រទេសក្នុងតំបន់អាស៊ានមានសារសំខាន់ណាស់ ព្រោះជាទីផ្សារនាំចេញធំទី២របស់កូរ៉េខាងត្បូង ។ ទំហំពាណិជ្ជកម្មកូរ៉េខាងត្បូងជាមួយអាស៊ាន ស្ថិតក្នុងចំណាត់ថ្នាក់លេខ២ ដែលមានតម្លៃទឹកប្រាក់ប្រមាណជាង១៣០ប៊ីលានដុល្លារ និងទំនាក់ទំនងពាណិជ្ជកម្មរបស់កូរ៉េខាងត្បូងជាមួយអាស៊ានមានស្ថានភាពល្អ និងជិតស្និទបំផុតដោយសារតែGDP របស់អាស៊ានធំជាង២ដងនៃGDP របស់កូរ៉េខាងត្បូង ។ នេះបើតាមការប្រសាសន៍លោកបណ្ឌិតសាស្ត្រាចារ្យផ្នែកសេដ្ឋកិច្ច Taeho BARK នៅឯមជ្ឈមណ្ឌលមូលនិធិកូរ៉េ(Korea Foundation) ។
លោកថ្លែងប្រាប់បែបនេះនៅក្នុងកម្មវិធី « ASEAN Next-Generation Leaders Visit Korea 2016 » ដែលមានមន្ត្រីនៃក្រសួងស្ថាប័នរដ្ឋ និងអ្នកសារព័ត៌មានសរុបចំនួន២៧រូបមកពីបណ្ដាប្រទេសក្នុងតំបន់អាស៊ាន បានទៅបំពេញទស្សនកិច្ចសិក្សាស្វែងយល់ពីការអភិវឌ្ឍ វប្បធម៌ ប្រពៃណី បច្ចេកវិទ្យា និងតំបន់សក្ដានុពលទេសចរណ៍របស់កូរ៉េខាងត្បូង តាមរយៈការអញ្ជើញរបស់មូលនិធិកូរ៉េដែលមានរយៈពេល៧ថ្ងៃ ចាប់ផ្ដើមពីថ្ងៃទី១៧ ដល់ថ្ងៃទី២៣ មេសា ឆ្នាំ២០១៦ កន្លងមក ។
លោកសាស្ត្រាចារ្យ បានបន្ដថា ៖ « ក្នុងឆ្នាំ១៩៥០ កូរ៉េខាងត្បូងជាប្រទេសក្រីក្របំផុត កសិករមានការខ្វះខាត ការនាំចេញប្រមាណតែ៣%នៃGDPប៉ុណ្ណោះ ដែល៨៨%គឺជាវត្ថុធាតុដើម ហើយក៏ជាប្រទេសក្រីក្រជាងគេមួយក្នុងចំណោមប្រទេសក្រីក្រនៅអាស៊ីអាគ្នេយ៍ ដែលប្រាក់ចំណូលសម្រាប់មនុស្សម្នាក់ក្នុង១ឆ្នាំ គឺមានត្រឹមតែ៨០ដុល្លារប៉ុណ្ណោះ និងជាប្រទេសដែលគ្មានក្ដីសង្ឃឹមនៅពេលអនាគត » ។
ដោយសារតែការអនុវត្តតាមគោលនយោបាយជំរុញកំណើនសេដ្ឋកិច្ចរបស់រដ្ឋាភិបាល បានបណ្តុះបណ្តាលធនធានមនុស្ស បង្កើនការផ្សព្វផ្សាយ និងជំរុញការនាំចេញផលិតផលសម្រេចនៅកាន់ពិភពលោក ព្រមទាំងបើកចំហទីផ្សារ និងចាប់ផ្ដើមទទួលការវិនិយោគពីបរទេស ធ្វើឲ្យប្រទេសកូរ៉េមានការអភិវឌ្ឍគួរឲ្យកត់សម្គល់ ។ ជាក់ស្ដែងគិតមកដល់ឆ្នាំ២០១៤ កំណើនអត្រាប្រជាជនកើនឡើងដល់៥០លាននាក់ ផលិតផលក្នុងស្រុកមានចំនួន១,៤ទ្រីលានដុល្លារ ប្រាក់ចំណូលសម្រាប់ប្រជាជនកូរ៉េខាងត្បូងម្នាក់មានចំនួន២,៧ម៉ឺនដុល្លារអាមេរិក ដែលស្ថិតក្នុងចំណាត់ថ្នាក់ទី២៦ នៅលើពិភពលោក។ ចំណែកទំហំពាណិជ្ជកម្មបានឈានឡើងដល់១,០១ទ្រីលានដុល្លារអាមេរិក និងស្ថិតនៅចំណាត់ថ្នាក់ទី៩ នៅលើពិភពលោក ។ នេះបើតាមលោកសាស្ត្រាចារ្យ Taeho BARK ។
យោងតាមរបាយការណ៍ពីក្រសួងសន្ដិសុខ និងរដ្ឋបាលសាធារណៈបានបង្ហាញថា គិតត្រឹមខែមករា ឆ្នាំ២០១៥ កូរ៉េខាងត្បូងមានប្រជាជនចំនួន៥១លាននាក់ ស្ថិតនៅលំដាប់ទី២៧លើពិភពលោក ដែលមានដង់ស៊ីតេប្រជាជនចំនួន៤៩៩នាក់ក្នុង១គីឡូម៉ែត្រការ៉េ ។
ផលិតផលក្នុងស្រុកសរុបរបស់ប្រទេសនេះមានចំនួនជាង១,៤ទ្រីលានដុល្លារ ដែលស្ថិតនៅលំដាប់ថ្នាក់ទី១៣ នៅលើពិភពលោក ។ ចំណែកផលិតផលក្នុងស្រុកសរុបសម្រាប់មនុស្សម្នាក់មានចំនួន២៨.៧៣៨ដុល្លារអាមេរិក ។ រីឯផលិតផលសំខាន់ៗសម្រាប់នាំចេញមានដូចជា ប្រេង សឺមីកុងឌុចទ័រ រថយន្ត នាវា និងអេក្រង់ ជាដើម ។ នេះបើយោងតាមប្រភពពីក្រសួងពន្ធដារ ។
គួរបញ្ជាក់ថា កម្មវិធី « ASEAN Next-Generation Leaders Visit Korea 2016 » រៀបចំឡើងក្នុងគោលបំណងរឹតចំណងមិត្តភាពរវាងប្រទេសកូរ៉េខាងត្បូង និងបណ្ដាប្រទេសក្នុងតំបន់អាស៊ានឲ្យកាន់តែរឹងមាំថែមទៀត តាមរយៈយុវជនជំនាន់ក្រោយ និងស្វែងយល់ពីគ្នាទៅវិញទៅមក ធ្វើយ៉ាងណាឲ្យទំនាក់ទំនងរវាងកូរ៉េខាងត្បូង និងអាស៊ាន កាន់តែជិតស្និទ្ធ ៕
ចែករំលែកព័តមាននេះ