រាជធានីភ្នំពេញ ៖ ខ្សែភាពយន្តរឿង «ប៉ុបពីទៅហូលីវូដ» ដែលគ្រោងចាក់បញ្ចាំងនាថ្ងៃទី៥ ឧសភា ឆ្នាំ២០១៦ នៅក្នុងស្រុកនោះ ក៏នឹងចាក់បញ្ចាំងស្របពេលគ្នាដែរនៅប្រទេសឡាវ និងឥណ្ឌូណេស៊ី ។ នេះបើតាមការប្រកាសឱ្យដឹងពីក្រុមការងាររបស់ផលិតកម្ម៨០២AD ក្នុងសន្និសីទសារព័ត៌មានកាលពីព្រឹកថ្ងៃទី២៩ មេសា ឆ្នាំ២០១៦ នៅសណ្ឋាគារ ARTHUR &PAUL រាជធានីភ្នំពេញ ។
លោកសុខ វិសាល អ្នកដឹកនាំរឿង និងជាចាងហ្វាងផលិតកម្ម៨០២AD ឲ្យដឹងថា រឿង «ប៉ុបពីទៅហូលីវូដ» នឹងបញ្ចាំងនៅថ្ងៃទី៥ ឧសភា ឆ្នាំ២០១៦ ។ រឿងនេះនិយាយអំពីមនុស្សភេទទី៣មួយក្រុម ត្រូវសង្គមរើសអើងលាយឈុតឆាកកំប្លែង និងមនោសញ្ចេតនាស្នេហាស្រស់បំព្រង ឯចុងបញ្ចប់នៃសាច់រឿងបានបញ្ចប់ដោយពុទ្ធិនៃការជំរុញសង្គមបឱ្យទទួលស្គាល់ និងរាប់រកក្រុមមនុស្សភេទទី៣តាមរយៈការតស៊ូអត់ធ្មត់របស់ពួកគេ ។ ផ្នែកសំខាន់នៃសាច់រឿងគឺជូនជាគំនិតដល់អ្នកទស្សនាឲ្យដឹងច្រើនថែមទៀតពីអ្វីដែលសហគមន៍ LGBT (នារីភេទទី៣ បុរសភេទទី៣ មនុស្សភេទបី និងមនុស្សកែភេទ) ដែលកម្ពុជាកំពុងជួបប្រទះ និងចង់ឲ្យអ្នកទស្សនាយល់ថា អ្នកទាំងនោះគឺមនុស្សធម្មតាដែលកើតមកមានចរិតធម្មជាតិរបស់ពួកគេ ហើយមិនអាចផ្លាស់ប្តូរបាន ។ បន្ថែមពីនេះសាច់រឿងក៏បានបង្ហាញពីការលើកកម្ពស់តម្លៃស្ត្រី និងសមភាពយេនឌ័រទៀត ។
នាយកប្រតិបត្តិក្រុមហ៊ុនសប្បាយឌីជីថលលោកជី សិលា ឲ្យដឹងថា លោករីករាយដែលបានសហការបង្កើតរូបភាពថ្មីមួយលើវិស័យកុនខ្មែរ ។ ក្រុមហ៊ុនសប្បាយបានធ្វើការងារច្រើនលើផ្នែកកម្សាន្ត ហើយបានវិនិយោគទៅលើការនាំកុនចូល និងក៏មានបើករោងកុន ។ ក្រុមហ៊ុនបានធ្វើការងារមួយចំនួនដែលមានន័យថា ចង់លូកដៃ ខ្លះៗលើផ្នែកពាណិជ្ជកម្ម ។ កន្លងមកលោកជី សិលា តែងតែរកមើលស្នាដៃផលិតរបស់ផលិតកម្មណាដែលល្អដើម្បីចាប់ដៃគូ ហើយបោះទុនចូល ។ លក្ខខណ្ឌរបស់សប្បាយ គឺចង់ជ្រើសរើសកុនដែលប្លែកបង្ហាញនៅលើផ្ទាំងសំពត់សខុសគេ កុំឲ្យដូចគ្នា ។
លោកជី សិលា ប្រកាសឲ្យដឹងថារឿង «ប៉ុបពីទៅហូលីវូដ» បានរកទីផ្សារនៅបីទៅបួនប្រទេសដែរ ។ ជាក់ស្តែងនឹងបញ្ចាំងរឿងនេះនៅរោងកុនខ្មែរនាថ្ងៃទី៥ ខែឧសភា ឆ្នាំ២០១៦ ស្របគ្នានឹងនៅឡាវ និងប្រទេសឥណ្ឌូណេស៊ី ។ នេះជាការចាប់ផ្តើមមួយល្អ ជាការលើកទឹកចិត្តសម្រាប់អ្នកផលិតកុននៅស្រុកខ្មែរ។ ក្រៅពីនេះមានប្រទេស៣ទៀតមិនទាន់រកថ្ងៃឃើញមានប្រទេសវៀតណាម ប្រទេសភូមា និងប្រទេសទីម័រខាងកើត ដោយប្រទេសទាំងនោះចាប់អារម្មណ៍រឿង «ប៉ុបពីទៅហូលីវូដ» ព្រោះថាប្លែក ។
គេថា នេះជាជំហានថ្មីមួយដែលកុនស្រុកគេមិនទាន់បានធ្វើច្រើនទាក់ទិននឹងភេទទី៣ ។ បន្ទាប់ពីប្រទេសទាំងនោះបានមើលឈុតឆាកខ្លះមានកំប្លែងលាយឡំក៏ចាប់អារម្មណ៍ ។ ដូច្នេះនេះជាឱកាសមួយល្អដែលធ្វើកុនមានគុណភាពល្អប្លែក ជឿជាក់ថាពិតជាមានការចាប់អារម្មណ៍ពីប្រទេស ផ្សេងៗ ហើយរំពឹងថា ផលិតករ ផ្សេងៗអាចផលិតកុនកាន់តែមានគុណភាពទទួលយកបានទាំងទីផ្សារក្នុងស្រុកផង ក្រៅស្រុកផង ។
លោកអ៊ុន សុធា ជាតួអង្គភេទទី៣ ក្នុងរឿងបាននិយាយថា នេះជាការលះបង់លើកទី១ដែលលោកបានសម្តែងជាតួភេទទី៣ ។ វាជាការបង្ហាញពីជ្រុងមួយដែលគេបង្កប់ទុក ជាការបិទបាំងអ្នកនៅជុំវិញខ្លួន។ពិសេសសង្គមតូចមួយនៅស្អប់ភេទទី៣ ។ ក្នុងសាច់រឿងនេះបង្ហាញពីអ្វីដែលជាទឹកចិត្ត ការលាក់បាំងអារម្មណ៍ សូម្បីតែក្រុមគ្រួសារមិនបានបង្ហាញ ។
លោកអ៊ុន សុធា រំពឹងថា ទស្សនិកជននឹងបើកចិត្ត បើកបេះដូងឲ្យទូលាយទទួលយកភេទទី៣ ព្រោះពួកគាត់ក៏មានអាយុជីវិត មានសិទ្ធិក្នុងការធ្វើ អ្វីៗគ្រប់បែបយ៉ាងទាំងអស់ផងដែរ ។
កញ្ញាឌុច លីដា ឲ្យដឹងថា សម្រាប់នាងសម្តែងក្នុងរឿងនេះពិតជាសប្បាយចិត្ត ហើយប្លែកអារម្មណ៍ ព្រោះសាច់រឿងគឺបុរសក្លែងភេទជាមនុស្សស្រី ហើយស្រីក្លែងជាបុរស ។ សម្រាប់នាងជាលើកទី១សម្តែងបែបនេះ ។ ថតរឿងនេះលីដា ថានាងយល់ពីអារម្មណ៍ភេទទី៣ ដោយយល់ថាពួកគេចង់មានមនុស្សរាប់អានលើកទឹកចិត្តដូចគ្នាដែរ ។
ខ្សែភាពយន្តរឿង «ប៉ុបពីទៅហូលីវូដ» និយាយពីបុរសវ័យក្មេងឈ្មោះមុន្នី ធ្លាក់ខ្លួនមានបញ្ហាជំពាក់បំណុលគេច្រើន ហើយត្រូវគេតាមសម្លាប់ ។ ដូចនេះគេបានទូរស័ព្ទទៅបងប្រុសដើម្បីសុំជំនួយ ។ បងប្រុសរបស់មុន្នី ឈ្មោះលេណា គឺជាបុរសកែភេទ ធ្វើការនៅក្លឹបកម្សាន្តមួយនៅទីក្រុងភ្នំពេញ ។ មុន្នីតែងតែបន្ទោសនិងមើលងាយលេណាពីការដែលគេក្លាយខ្លួនទៅជាភេទទី៣ ។
ដើម្បីសងលុយទៅម្ចាស់ក្លឹប មុន្នីត្រូវបង្វំចិត្តចូលធ្វើការនៅក្នុងក្លឹបជាអ្នកបោសសម្អាតរហូតទាល់តែរួចបំណុល។ នៅទីនោះមុន្នីមិនចូលចិត្ត និងស្អប់ភេទទី៣ និងអ្នកកែភេទជាទីបំផុត ហើយ មួយថ្ងៃៗមុន្នីត្រូវទ្រាំរស់នៅជាមួយអ្នកភេទទី៣ដែលជាអ្នករាំប្រចាំក្លឹបក្នុងនោះមានសាសាជាប្រធានក្រុម ឌីណាពូកែខឹង មីមីនិងនីតាក្មេងជាងគេ ហើយមិនសូវខ្វល់ពីគេឯង និងតូនីជាបុរសភេទទី៣ជាម្ចាស់ក្លឹប ៕
ចែករំលែកព័តមាននេះ