អាស៊ាន៖ យោងតាមសារព័ត៌មាន voanews បានចេះផ្សាយកាលពីថ្ងៃទី ១៨ ខែវិច្ឆិកា ឆ្នាំ២០២១ បានឱ្យដឹងថា យោងតាមប្រភពការទូត បាននិយាយកាលពីថ្ងៃព្រហស្បតិ៍…
អាស៊ាន៖ យោងតាមសារព័ត៌មាន voanews បានចេះផ្សាយកាលពីថ្ងៃទី ១៨ ខែវិច្ឆិកា ឆ្នាំ២០២១ បានឱ្យដឹងថា យោងតាមប្រភពការទូត បាននិយាយកាលពីថ្ងៃព្រហស្បតិ៍ ថា បេសកជនចិនមួយរូប បានបញ្ចុះបញ្ចូលបណ្តាប្រទេសអាស៊ីអាគ្នេយ៍ ឱ្យអនុញ្ញាតឱ្យមេដឹកនាំយោធារបស់មីយ៉ាន់ម៉ា ចូលរួមកិច្ចប្រជុំកំពូលក្នុងតំបន់ ដែលកិច្ចប្រជុំនេះប្រទេសចិននឹងធ្វើជាម្ចាស់ផ្ទះ នៅសប្តាហ៍ក្រោយ ប៉ុន្តែភាគីទាំងអស់កំពុងជួបការប្រឆាំងយ៉ាងតឹងរ៉ឹងមួយ ។
ប្រទេសមីយ៉ាន់ម៉ា គឺជាសមាជិកនៃសមាគមប្រជាជាតិអាស៊ីអាគ្នេយ៍ (អាស៊ាន) ទាំង១០ ប៉ុន្តែត្រូវបានប្រទេសដែលជាសមាជិកអាស៊ាន បដិសេធមិនអោយចូលរួមកិច្ចប្រជុំនានាកន្លងមក ដែលនេះជាការធ្វើឡើងក្រោយរបបយោធាបានធ្វើរដ្ឋប្រហារ កាលថ្ងៃទី០១ ខែកុម្ភៈ ឆ្នាំ២០២១ និងបានបណ្តេញរដ្ឋាភិបាលជាប់ឆ្នោតរបស់លោកស្រីអ៊ុងសាន ស៊ូជី (Aung San Suu Kyi) ដែលបានទទួលរង្វាន់ណូបែល ហើយបានបង្កឱ្យមានភាពចលាចលយ៉ាងធ្ងន់ធ្ងររហូតមានការបង្ហូរឈា.ម រវាងជនស៊ីវិលនិងរបបយោធាដែលកំពុងគ្រប់គ្រងប្រទេសមីយ៉ាន់ម៉ា ។
ក្រោយរបបយោធាបានធ្វើរដ្ឋប្រហារនិងគ្រប់គ្រងប្រទេសមីយ៉ាន់ម៉ា សមាជិកអាស៊ានមួយចំនួន បានស្រងាកចិត្តយ៉ាងខ្លាំង ដោយសារការវិលត្រលប់មកវិញនៃវិបត្តិ និងការគាបសង្កត់លទ្ធិប្រជាធិបតេយ្យក្នុងប្រទេសមីយ៉ាន់ម៉ា ហើយប្រទេសជាសមាជិកអាស៊ានទាំងនោះ បានព្យាយាមដាក់សម្ពាធលើមេទ័ពធ្វើរដ្ឋប្រហារ ដោយដកពួកគេចេញពីកិច្ចប្រជុំអាស៊ាន។
នៅក្នុងការសម្រេចចិត្តមួយដែលគួរឱ្យភ្ញាក់ផ្គើល កាលពីខែមុនមេដឹកនាំអាស៊ាន បានបដិសេធប្រមុខយោធាមីយ៉ាន់ម៉ា គឺលោកឧត្តមសេនីយ មីន អ៊ុងឡាំង ក្នុងការចូលរួមកិច្ចប្រជុំកំពូលអាស៊ាន បន្ទាប់ពីលោកមិនបានគោរពការសន្យា ក្នុងការអនុញ្ញាតឱ្យប្រេសិតអាស៊ាន ជួបសមាជិកសភា ដែលត្រូវបានផ្តួលរំលំក្នុងរដ្ឋប្រហារនោះ ។
យោងតាមការរក្សាគោលការណ៍ បានឱ្យដឹងថាអ្នកការទូតប្រចាំតំបន់ បានរាយការណ៍សង្ខេបដូចនេះថា បេសកជនពិសេសទទួលបន្ទុកកិច្ចការអាស៊ីរបស់ប្រទសចិន គឺលោក Sun Guoxiang បានខិតខំប្រឹងប្រែងបញ្ចុះបញ្ចូលឱ្យលោក Ming Aung Hlaing បានចូលរួមកិច្ចប្រជុំកំពូល ប៉ុន្តែសំណើរនេះត្រូវបានបដិសេធ ។
តាមរយៈការស្រង់សំដីលោក Sun អ្នកការទូតប្រចាំតំបន់ បាននិយាយថា ប្រទេសជាសមាកជិកអាស៊ានបានបដិសេធ ការបញ្ចុះបញ្ចូលរបស់ លោក Sun ។ លោក Sun បានប្រាប់លោក Min Aung Hlaing នៅក្នុងកិច្ចប្រជុំមួយក្នុងរដ្ឋធានី Naypyidaw ប្រទេសមីយ៉ាន់ម៉ា កាលពីចុងសប្តាហ៍ថា ប្រទេសចិនត្រូវតែទទួលយកជំហររបស់អាស៊ាន ។
អាស៊ានត្រូវបានគេស្គាល់ជាច្រើនទសវត្សរ៍មកហើយ ដែលមានគោលនយោបាយមិនជ្រៀតជ្រែកកិច្ចការផ្ទៃក្នុងនៃប្រទេសនីមួយៗដែលជាសមាជិកឡើយ ប៉ុន្តែក្រោយរដ្ឋប្រហារក្នុងប្រទេសមីយ៉ាន់ម៉ាបានផ្លាស់ប្តូរឥរិយានេះ ។
គួររំលឹកផងដែរថា កាលពីខែមេសាកន្លងទៅ នៅក្នុងកិច្ចប្រជុំកំពូលមេដឹកនាំពិសេសមួយ ក្នុងនោះក៏មានលោកមេដឹកនាំរដ្ឋប្រហារ លោក Min Aung Hlaing បានចូលរួមផងដែរ ដោយអាស៊ានបានដាក់ផែនការ ៥ ចំណុច ទៅឱ្យលោក Min Aung Hlaing ដែលរួមមានការសន្យាបញ្ចប់អំពើហិង្សា និងអនុញ្ញាតឱ្យបេសកជនអាស៊ាន ចាប់ផ្តើមការសន្ទនាជាមួយ “គ្រប់ភាគី” រួមទាំងសមាជិកសភា ដែលត្រូវបានបណ្តេញចេញ។ ប៉ុន្តែក្រោមការដឹកនាំរបស់លោក Min Aung Hlaing ប្រទេសមីយ៉ាន់ម៉ា មិនបានអនុវត្តតាមនោះទេ ដោយបាននិយាយថាខ្លួនមាន “ផែនទីផ្លូវ” ផ្ទាល់ខ្លួន សម្រាប់ការបោះឆ្នោតថ្មី ៕
ចែករំលែកព័តមាននេះ