រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យ បាននាំរថយន្តពន្លត់អគ្គិភ័យចំនួន៣គ្រឿងទៅបាញ់ទឹកពន្លត់ភ្លើងដែលកំពុងឆេះគំនរសំរាមនៅទីលានចាក់សំរាមបស់ក្រុមហ៊ុនសារុំត្រេឌីង ដែលបានឆេះដោយសារការដុត ព្រោះតែសំរាមច្រើនពេកគ្មានកន្លែងចាក់ថែមទៀត ។ ការដុតអាចាស់ចោលដើម្បីយកកន្លែងចាក់អាថ្មីទៀត មានរយៈពេល១យប់១ថ្ងៃមកហើយ ភ្លើងមិនទាន់រលត់ទេ ។
ភ្លើងដែលឆេះសំរាមនេះ បានបង្កឲ្យមានការប៉ះពាល់យ៉ាងខ្លាំងដល់សុខភាពនិងការរស់នៅរបស់ប្រជាពលរដ្ឋនៅជុំវិញទីនោះ ព្រោះមានផ្សែងហុយខ្លាំងគ្របដណ្ដប់លើភូមិឋានផ្ទះសម្បែងពួកគាត់ ។ មិនតែប៉ុណ្ណោះ វាបាននាំទៅជាមួយនូវកម្ទេចផេះផងដែរ ។
អ្នកភូមិនិយាយថា បើគេដុតឆេះហើយមិនងាយរលត់ទៅវិញទេ រយៈពេល១អាទិត្យឬ១០ថ្ងៃទើបរលត់ ព្រោះសំរាម៩០ភាគរយជាកម្ទេចក្រណាត់ងាយនឹងឆេះ ប៉ុន្តែមិនងាយរលត់ឡើយ ។ ដោយសារតែមានបញ្ហាបែបនេះ ទើបនៅព្រឹកថ្ងៃទី២៩ ខែមេសា អាជ្ញាធរខណ្ឌពោធិ៍សែនជ័យ ដោយមានការចូលរួមពីមន្ត្រីនៃមន្ទីរបរិស្ថានរាជធានីភ្នំពេញ និងមន្ត្រីការិយាល័យបរិស្ថានខណ្ឌ ព្រមទាំងកងរាជអាវុធខណ្ឌផងនោះ បានទៅកាន់ទីលានចាក់សំរាមខាងលើដោយនាំយករថយន្តពន្លត់អគ្គិភ័យ ចំនួន៣គ្រឿងទៅជាមួយផង ក្នុងនោះមានរថយន្តរបស់ស្នងការដ្ឋាននគរបាលរាជធានីភ្នំពេញ២គ្រឿង និងរថយន្តរបស់អង្គភាព៧១១ កងពលតូចលេខ៧០មួយគ្រឿងទៅធ្វើការបាញ់ពន្លត់ភ្លើងដែលកំពុងឆេះនោះ តែនៅមិនទាន់ចាត់វិធានការណាមួយចំពោះក្រុមហ៊ុននេះនៅឡើយទេ ។
មន្ត្រីមួយរូបនិយាយថា ខាងក្រសួងបរិស្ថានបានហៅតំណាងក្រុមហ៊ុនមួយនេះទៅធ្វើកិច្ចសន្យានៅក្រសួងហើយ ។ ដោយឡែក អ្នករស់នៅតំបន់នោះបានទទូចសុំឲ្យអាជ្ញាធរពាក់ព័ន្ធនានា ជាពិសេសក្រសួងបរិស្ថានត្រូវតែបិទទីលានចាក់សំរាមមួយនេះចោល និងឲ្យទៅរកទីតាំងថ្មីណាមួយផ្សេងទៀតទៅ ព្រោះពួកគាត់ទ្រាំលែងបានហើយដោសារវាបានប៉ះពាល់ខ្លាំងបំផុតដល់ការរស់នៅរបស់ពួកគាត់ ។
ទីលានចាក់សំរាមរបស់ក្រុមហ៊ុនសារុំត្រេឌីង ដែលមានទីតាំងស្ថិតនៅក្នុងភូមិកប់អំបិល សង្កាត់កំបូល ខណ្ឌពោធិ៍សែនជ័យ បង្កការក្ដៅក្រហាយកាន់តែខ្លាំងឡើងដល់ប្រជាពលរដ្ឋដែលរស់នៅជុំវិញទីនោះ ដោយសារក្រុមហ៊ុនមួយនេះបានដុតសំរាមជាញឹកញាប់បង្កឲ្យមានផ្សែងហុយគ្របដណ្ដប់លើភូមិឋានពួកគាត់ ដោយនាំទៅជាមួយនូវក្លិនអាក្រក់ពិបាកទ្រាំ និងកម្ទេចកម្ទីផងដែរ ។
ជាក់ស្ដែងនៅថ្ងៃទី២៨ ខែមេសា ក្រុមហ៊ុន បានដុតសំរាមជាថ្មីម្ដងទៀត ដែលបានបង្កឲ្យមានផ្សែងហុយចេញពីទីនោះហោះហើរគ្របដណ្ដប់ទៅលើផ្ទះប្រជាពលរដ្ឋដែលស្ថិតនៅក្នុងភូមិជុំវិញនោះ ជាពិសេសអ្នកភូមិកប់អំបិល និងភូមិស្នួលខ្ពស់ ។ ដោយឡែក អ្នករស់នៅឯសង្កាត់ពន្សាំងជិតភ្នំប្រសិទ្ធិ៍ ក៏ទទួលរងនូវឥទ្ធិពលពីផ្សែងនោះដែរ ដែលបានប៉ះពាល់ខ្លាំងជាងគេបំផុត ។ ប្រជាពលរដ្ឋនិយាយថា ទីលានចាក់សំរាមមួយនេះ តែងបង្កការប៉ះពាល់ដល់ការរស់នៅរបស់ពួកគាត់ខ្លាំងបំផុត ព្រោះសំរាមដែលដឹកយកទៅចាក់ចោលនៅទីនោះ ៩០ភាគរយជាកម្ទេចក្រណាត់ ដែលប្រមូលយកចេញពីតាមបណ្ដារោងចក្រកាត់ដេរនានា ។
ក្រោយពេលចាក់ចោលបានច្រើនបន្តិច ប្រធានក្រុមហ៊ុនខាងលើបានបញ្ជាឲ្យកូនចៅដុតចោលម្ដង ដោយមិនបានគិតពីផលប៉ះពាល់ដល់បរិស្ថាន និងសុខភាពរបស់ពួកគាត់ឡើយ។ ពេលនេះពួកគាត់សំណូមពរឲ្យអាជ្ញាធរគ្រប់លំដាប់ថ្នាក់ ជួយចាត់ការលើក្រុមហ៊ុនមួយនេះផង ហើយរាល់ពេលដុតសំរាមម្ដងៗមិនងាយនិងរលត់ទៅវិញទេ បើគ្មានការពន្លត់ទេនោះ រយៈពេល១អាទិត្យឬ១០ថ្ងៃទើបរលត់ទៅវិញ ។
កន្លងមកអាជ្ញាធរខណ្ឌពោធិ៍សែនជ័យ បានចុះធ្វើការណែនាំដល់ក្រុមហ៊ុនមួយនេះជាបន្តបន្ទាប់កុំឲ្យដុតសំរាមដោយគ្មានការទទួលខុសត្រូវ និងបំពុលបរិយាកាស បរិស្ថានបែបនេះទៀត ព្រោះវាបានប៉ះពាល់ដល់សុខភាព និងការរស់នៅរបស់ប្រជាពលរដ្ឋរាប់ពាន់គ្រួសារ ៕
ចែករំលែកព័តមាននេះ