ក្រុងប៉ោយប៉ែត ៖ មនុស្ស៩នាក់ពាក់ព័ន្ធនឹងការជួញដូរ-ប្រើប្រាស់គ្រឿងញៀនត្រូវចាប់ខ្លួនយ៉ាងតឹងរ៉ឹងកាលពីរសៀលម៉ោង២និង២០នាទីថ្ងៃទី២០ មីនា ២០១១ ដោយប៉ូលិសក្រុងប៉ោយប៉ែត ខណៈពួកគេធ្វើសកម្មភាពចែកចាយ និងសេពគ្រឿងញៀនជាក់ស្តែង នៅផ្ទះមួយកន្លែងជាប់មាត់អូរព្រំដែនក្បែរកាស៊ីណូធំមួយ ស្ថិតក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ។
មនុស្សដែលឃាត់ខ្លួន៩នាក់នោះមានស្រីម្នាក់ ថ្នាំញៀនមួយចំនួនធំ សម្ភារនិងឧបករណ៍សម្រាប់ជក់ផងដែរ ។ ការបង្ក្រាបមុខសញ្ញាខាងលើនេះគេឃើញព្រះរាជអាជ្ញារងអមសាលាដំបូងខេត្តបន្ទាយមានជ័យ លោកឡុង ជាប លោកឧត្តមសេនីយ៍ត្រីខេង ស៊ុំ ស្នងការខេត្ត ជាអ្នកដឹកនាំចាត់ចែង។ ក្នុងពេលធ្វើការបង្ក្រាប សមត្ថកិច្ចរឹបអូសបានថ្នាំញៀនប្រភេទម៉ាទឹកកកចំនួន៦ថង់តូច យ៉ាម៉ាពណ៌ផ្កាឈូក និងខៀវចំនួន១៤៦គ្រាប់ និងឧបករណ៍សម្រាប់កែច្នៃជក់មួយចំនួនធំ ។
តាមការឱ្យដឹងពីលោកអនុសេនីយ៍ឯក អ៊ុំ សុផល អធិការនគរបាលក្រុងប៉ោយប៉ែតបានប្រាប់កោះសន្តិភាពនៅកន្លែងកើតហេតុថា មុនការចុះឆែកឆេរបង្ក្រាបទីតាំងខាងលើ គឺកម្លាំងរបស់លោកចាប់បានក្រុមក្មេងទំនើងច្រើននាក់កាលពីវេលាម៉ោង៤ទៀបភ្លឺថ្ងៃទី២០ មីនា ហើយឆែកឆេរក្រុមក្មេងទំនើងទាំងនោះ រកឃើញថ្នាំញៀនជាប់នឹងខ្លួន សមត្ថកិច្ចក៏សួរនាំបក្សពួក ទើបឈានដល់ការបង្ក្រាបបែបនេះ ៕
ចែករំលែកព័តមាននេះ