រាជធានីភ្នំពេញ ៖ ខុន បូឡា មកពីក្លិបកងពលធំអន្តរាគមន៍លេខ៨ភ្នំទ្រព្យ និងលាស់ យីន មកពីក្លិបតាព្រហ្មមានជ័យបង្ក្រាបគ្រឿងញៀ.នដែលត្រូវគេផ្គូផ្គងឱ្យជួបកីឡាករបរទេសនៅលើសង្វៀនស៊ីធីអិនថ្ងៃសៅរ៍នេះ
រាជធានីភ្នំពេញ ៖ ខុន បូឡា មកពីក្លិបកងពលធំអន្តរាគមន៍លេខ៨ភ្នំទ្រព្យ និងលាស់ យីន មកពីក្លិបតាព្រហ្មមានជ័យបង្ក្រាបគ្រឿងញៀនដែលត្រូវគេផ្គូផ្គងឱ្យជួបកីឡាករបរទេសនៅលើសង្វៀនស៊ីធីអិនថ្ងៃសៅរ៍នេះ ទៅរួចអត់ ខណៈកីឡាករថៃដែលពួកគេត្រូវជួបសុទ្ធតែមានសមត្ថភាពមិនធម្មតាបែបនេះ ។
ខុន បូឡា ជួបប្រកួតជាមួយកីឡាករថៃឈ្មោះ សាំងដេត សាយកែវវិទ្យា ក្នុងប្រភេទទម្ងន់៦០គីឡូក្រាម ខណៈកីឡាករថៃរូបនេះ មិនធ្លាប់មកប្រកួតនៅស្រុកខ្មែរម្ដងណាឡើយ ។ សម្រាប់ការប្រកួតលើកនេះ អ្នកធ្លាប់តាមដានការប្រកួតភាគច្រើនបានវាយតម្លៃទុកមុនរួចហើយថា ខុន បូឡា មានជំនឿចិត្តតិចតួចបំផុតក្នុងការយកឈ្នះ ព្រោះបើយោងលើប្រវត្តិប្រកួត គឺខុសគ្នាឆ្ងាយណាស់ ។ ខុន បូឡា ប្រកួតបាន២៨ដង ឈ្នះ១៩ដង ចាញ់៩ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន៣ដង ។ ចំណែកកីឡាករថៃរូបនេះ ធ្លាប់ប្រកួតបាន៧០ដង ឈ្នះ៤៥ដង ចាញ់២៥ដង និងស្មើ៥ដង។ ខុន បូឡា ក៏ជាអ្នកប្រដាល់ជើងខ្លាំងមានល្បិចប្រយុទ្ធនៅលើសង្វៀនមិនធម្មតានោះទេ ប៉ុន្តែពេលមកប៉ះអ្នកប្រដាល់ជើងខ្លាំងថៃដែលមានប្រវត្តិប្រកួតច្រើនជាងលើសលប់បែបនេះ គឺពិតជាពិបាកបន្តិចហើយ ។
ចំណែក លាស់ យីន ជួបកីឡាករថៃឈ្មោះ យ៉តកេន សរ រ៉ុងរ៉ាវី ក្នុងប្រភេទទម្ងន់៦០គីឡូក្រាមលើកនេះ ក៏មិនហ៊ានអះអាងទុកមុនពីលទ្ធផលចុងក្រោយនោះដែរ ។ លាស់ យីន ប្រកួតបាន៨២ដង ឈ្នះ៥៤ដង ចាញ់២៤ដង ស្មើ៨ដង និងធ្លាប់ផ្ដួលគូប្រកួតឱ្យសន្លប់ នៅលើសង្វៀនបាន៩ដង ។ ចំណែកកីឡាករថៃ ប្រកួតបាន៧៥ដង ឈ្នះ៥០ដង ចាញ់២០ដង និងស្មើ៥ដង ។ ដូច្នេះ បើធ្វើការប្រៀបធៀបទៅលើប្រវត្តិប្រកួតរវាងគូនេះគឺអាចស៊ីសងគ្នាបាន ប៉ុន្តែ លាស់ យីន មួយរយៈមកនេះរាងធ្លាក់ដៃជាងមុនបន្តិច ជាពិសេសកម្លាំងស៊ុហ្វ តែម្ដង ដែលភាគច្រើនប្រកួតបានតែ៣ទឹកគឺទៅលែងរួចតែម្ដង ។ រីឯកីឡាករថៃតាមការឱ្យដឹងក្បាច់គុនរបស់គេមិនខ្លាំងប៉ុន្មានទេ ដូច្នេះ លាស់ យីន ខ្លាចតែចាញ់កម្លាំងគូប្រកួតប៉ុណ្ណោះ ។ ចាំមើលលាស់ យីន អាចផ្ដួលអ្នកប្រដាល់ថៃម្នាក់នេះបានឬអត់។
ដោយឡែក គូប្រកួតមិត្តភាពធម្មតាវិញ មាន ជ័យ ស៊ីណេត មកពីក្លិបឃ្លាំងមឿងកីឡា ប្រកួតជាមួយ ផាន់ សារុន មកពីក្លិបគជសារកីឡា ។ ផា សុផាតនិល មកពីក្លិបពន្លឺសាមគ្គីខេត្តបាត់ដំបង ប្រកួតជាមួយម៉ឺន ដា មកពីក្លិបខ្លារខិនមានរិទ្ធ និង អេលីត ភក្ដី មកពីក្លិបអង្គរក្ស ប្រកួតជាមួយគង់ វិរៈ មកពីក្លិបសុភានូមានជ័យ ៕
ចែករំលែកព័តមាននេះ