ខេត្តក្រចេះ ៖ បើទោះបីជាពិធីបុណ្យចូលឆ្នាំថ្មីប្រពៃណីជាតិខ្មែរ បញ្ចប់ទៅហើយក្តីសម្រាប់តំបន់ទេសចរណ៍នៅខេត្តក្រចេះ នៅតែមានភ្ញៀវទៅលេងកម្សាន្តជាហូរហែ ពិសេសនៅថ្ងៃឈប់សម្រាក់ចុងសប្តាហ៍ ។
ខេត្តក្រចេះ ៖ បើទោះបីជាពិធីបុណ្យចូលឆ្នាំថ្មីប្រពៃណីជាតិខ្មែរ បញ្ចប់ទៅហើយក្តីសម្រាប់តំបន់ទេសចរណ៍នៅខេត្តក្រចេះ នៅតែមានភ្ញៀវទៅលេងកម្សាន្តជាហូរហែ ពិសេសនៅថ្ងៃឈប់សម្រាក់ចុងសប្តាហ៍ ។ ក្រៅពីរមណីយដ្ឋានអេកូទេសចរណ៍ទឹកជួរទន្លេមេគង្គកាំពី និងតំបន់ទេចរណ៍អន្លង់ផ្សោត ដែលអ្នកទេសចរនៅតែបន្តទៅលេងកម្សាន្តជាប់ជាប្រចាំនោះ ក៏នៅមានតំបន់អេកូទេសចរណ៍មួយទៀត គឺឆ្នេរខ្សាច់កោះទ្រង់ ទន្លេមេគង្គ ។
កោះទ្រង់ជាកោះមួយមានទីតាំងនៅកណ្តាលដងទន្លេមេគង្គ ទល់មុខទីប្រជុំជនខេត្ត ហើយបានកាត់ចូលក្នុងរដ្ឋបាលក្រុងក្រចេះជាសង្កាត់កោះទ្រង់ ។ ក្រៅពីសក្តានុពលកសិកម្ម ធម្មជាតិដ៏សម្បូរបែប និងមានឈ្មោះល្បីដូចជាក្រូចត្លុង បន្លែ ផ្លែឈើ ផ្សេងទៀត របស់អ្នកភូមិដែលរស់នៅលើដីកោះចំនួនជាង៣រយគ្រួសារ ដែលបានដាំដុះលក់ដូរជាប្រចាំនោះ កោះទ្រង់បានផ្តល់សក្តានុពលធំធេងមួយទៀតជាមួយអេកូទេចរណ៍ដ៏សម្បូរបែប នោះគឺឆ្នេរខ្សាច់កោះទ្រង់នៅពេលថ្ងៃរៀបលិច ។
រដូវទឹកសម្រក ទឹកទន្លេថ្លាឆ្វង់ ហូរឆ្លុះពីលើឆ្នេរខ្សាច់នៅកណ្តាលទន្លេដ៏ធំល្វឹងល្វើយ រំលេចដោយពន្លឺចែងចាំងលើផ្ទៃទឹកពីព្រះអាទិត្យ និងថ្ងៃរៀបលិច ។ សោភ័ណភាពនេះបានធ្វើឲ្យមានការទាក់ទាញជាខ្លាំង រហូតធ្វើឲ្យអ្នកទេសចរក្នុងខេត្តមួយចំនួនធំនៅតែបន្តនាំគ្នាទៅងូតទឹកលេង និងទទួលទានអាហារតាមលក្ខណៈគ្រួសារ និងមិត្តភក្តិយ៉ាងកកកុញ គួរឲ្យចាប់អារម្មណ៍ ។
មានការគត់សម្គាល់ថា ក្នុងអំឡុងពេលប៉ុន្មានថ្ងៃចុងក្រោយ បន្ទាប់ពីពិធីបុណ្យ ចូលឆ្នាំថ្មីប្រពៃណីជាតិខ្មែរបញ្ចប់ ជារៀងរាល់ថ្ងៃ ពិសេសពេលល្ងាចអ្នកទេសចរប្រុស-ស្រី ក្មេង-ចាស់ នៅតែបន្តនាំគ្នាជិះទូកដ ឆ្លងពីត្រើយម្ខាងនៃខេត្តឆ្ពោះ ទៅកាន់មាត់ឆ្នេរខ្សាច់កោះទ្រង់ ។
សម្លេងហ៊ោកញ្ជ្រៀវ ទាំងនៅក្នុងទឹក នៅលើរោងធ្វើអំពីឫស្សីប្រក់ស្បូវ និងនៅលើឆ្នេរខ្សាច់ក្បែរមាត់ទឹកនៅតែលាន់លឺទ្រហឹងអឺងកង រហូតទល់ព្រលប់ថ្ងៃលិចទើបស្ងាត់ ក្រោយពីអ្នកទេសចរងូតទឹកលេងរួច និងបាននាំគ្នាត្រឡប់មកផ្ទះ រៀងៗខ្លួនវិញ ។ ស្របពេលអ្នកទេសចរទៅលេងកម្សាន្តលើឆ្នេរខ្សាច់ទ្រង់មានចំនួនច្រើនលើសលប់នឹកស្មានមិនដល់នេះនគរបាលទេសចរ និងអាជ្ញាធរមានការប្រុងប្រយ័ត្នខ្ពស់ដើម្បីរក្សាសុខសុវត្ថិភាពជូនភ្ញៀវ ។
បើតាមការលើកឡើងពីមន្ត្រីនគរបាលទេសចរខេត្តឲ្យដឹងថា មួយថ្ងៃៗ ពិសេសពេលល្ងាចក្រៅពីអ្នកទេសចរបរទេសដែលទៅសម្រាកលំហែកាយនៅតាមសណ្ឋាគារ ផ្ទះសំណាក់នៅលើក្បាលកោះ ក្នុងនោះក៏នៅមានអ្នកទេសចរជាតិមិនតិចពីជាង១ពាន់នាក់ក្នុងមួយថ្ងៃបានឆ្លងសាឡាងសំដៅទៅងូតទឹកលេង និងលំហែកាយនៅលើឆ្នេរខ្សាច់ ។
បើតាមអ្នកទេសចរក្នុងខេត្ត ដែលទៅលេងកម្សាន្តនៅរមណីយដ្ឋានឆ្នេរខ្សាច់កោះទ្រង់ បានលើកឡើងប្រហាក់ប្រហែលគ្នាថា ពួកគេចូលចិត្តទៅលេងទីនោះដោយសារតែតំបន់ទេសចរណ៍មួយនោះជាប់នឹងខេត្តងាយទៅមក។ ម្យ៉ាងវិញទៀត សម្រស់ឆ្នេរខ្សាច់តំបន់រមណីយដ្ឋានគួរឲ្យគយគន់ ។ អ្នកទេសចរមួយចំនួនធំ ជាមន្ត្រីរាជការ និងជាអ្នកលក់ដូរបានទៅលេងកម្សាន្ត ខណៈសម្រាកពីការងារ និងរបររកស៊ី ។
អ្នកទេសចរទាំងនោះនិយាយថា ឲ្យតែមានពេលទំនេរពួកគាត់ទៅលេងកោះទ្រង់រហូតដល់រដូវធ្លាក់ភ្លៀងទឹកឡើងទើបឈប់ ។ ស្របគ្នានេះពួកគាត់ស្នើឲ្យនគរបាលទេសចរ បង្កើនការយកចិត្តទុកដាក់ ការពារសុវត្ថិភាពនៅពេលជួបហេតុការណ៍ជាយថាហេតុណាមួយ ៕
ចែករំលែកព័តមាននេះ