កាសែត «ពីងគួ» របស់តៃវ៉ាន់បានផ្សាយកាលពីថ្ងៃទី២៦ កុម្ភៈ ថា មានក្រុមហ៊ុនផលិតឯកសណ្ឋានកីឡាមួយបានរៀបចំកម្មវិធី «មិនស្លៀកខោ» ឡើងជិះរថភ្លើងក្រោមដី ដែលកម្មវិធីនេះដូចគ្នានឹងការរៀបចំនៅសហរដ្ឋអាមេរិក និងនៅតំបន់អឺរ៉ុបដែរ ប៉ុន្តែខុសគ្នាត្រង់ថា ក្រុមហ៊ុនបានជួលស្ត្រីបង្ហាញម៉ូដដ៏ស្រស់ស្អាតចំនួន២០នាក់ឱ្យចូលរួមក្នុងកម្មវិធី ដោយនៅល្វែងលើស្លៀកឈុតធម្មតា ចំណែកនៅល្វែងក្រោមស្លៀកតែខោស៊្លីប និងពាក់ស្បែកជើងកីឡា ។
កម្មវិធីខាងលើបានរៀបចំឡើងនៅទីក្រុងតៃប៉ិ កោះតៃវ៉ាន់ ដោយស្ត្រីទាំងនោះបានឡើងជិះរថភ្លើងក្រោមដីនៅស្ថានីយ «ជុងសៀវវូស៊ីង» ។ ក្នុងខណៈពេលអ្នកសារព័ត៌មានសាកសួរថាតើការធ្វើបែបនេះដើម្បីអ្វី? អ្នកដំណើរជាច្រើនប្រាប់ថា នៅពេលដំបូងពួកគេភិតភ័យ លាយឡំនឹងចម្ងល់ថា ស្ត្រីទាំងនោះមិនរងាទេ ឬយ៉ាងណា? ព្រោះពេលនេះជារដូវរងា ហេតុអ្វីពួកនាងស្លៀកតែខោស៊្លីបឡើងជិះរថភ្លើងបែបនេះទៅវិញ? រីឯស្ត្រីទាំងនោះបាននិយាយថា ស្លៀកពាក់បែបនេះធ្វើឱ្យពួកនាងសប្បាយរីករាយខ្លាំងណាស់ ។
ចំណែកលោកលីវ សៀនឈី អ្នករៀបចំកម្មវិធីដ៏ចម្លែកនេះបញ្ជាក់ថា នៅសហរដ្ឋអាមេរិកក៏មានអ្នកមិនស្លៀកខោឡើងជិះរថភ្លើងក្រោមដីដែរ ដែលក្នុងគោលគំនិតដំបូងរបស់ពួកគេ គឺ ចង់បង្កើតនូវភាពភ្ញាក់ផ្អើល និងសប្បាយរីករាយដល់មនុស្សដែលបានឃើញ ប៉ុន្តែក្រោយមកទង្វើបែបនេះបែរជាឆ្លុះបញ្ចាំងឱ្យឃើញពីការរំដោះខ្លួនចេញពីច្បាប់រឹតបន្តឹងលើមនុស្សឱ្យរស់នៅបែបងាយៗ និងសន្សំសំចៃថាមពល ទើបលោកចង់ឱ្យជនជាតិតៃវ៉ាន់អនុវត្តតាមវិធីខាងលើ ៕
ចែករំលែកព័តមាននេះ