រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៦០គីឡូក្រាមនៅលើសង្វៀនស៊ីអិនស៊ី នៅសល់តែ៣លើកទៀតប៉ុណ្ណោះ នឹងឈានចូលដល់ទីបញ្ចប់ហើយ ។
រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៦០គីឡូក្រាមនៅលើសង្វៀនស៊ីអិនស៊ី នៅសល់តែ៣លើកទៀតប៉ុណ្ណោះ នឹងឈានចូលដល់ទីបញ្ចប់ហើយ ។ ចំណែកសមាសភាពគូប្រកួតនៅថ្ងៃសៅរ៍ទី៣០ មេសា សប្តាហ៍នេះ តម្រូវទៅលើកីឡាករ ពេជ្រ សីហា មកពីសមាគមកីឡាប្រដាល់ក្រសួងការពារជាតិប្រកួតជាមួយកីឡាករឡាវឈ្មោះ ធុតស៍ភុន ស សុម៉ាលី ខណៈកីឡាករ សរ រាជសីហ៍ មកពីក្លិបមោងឬស្សីមរតកគុនខ្មែរ ប្រកួតជាមួយកីឡាករឡាវឈ្មោះ នំធីប សរ.រុងរ៉ាវី ។
ការប្រកួតលើកនេះគឺសំខាន់បំផុតសម្រាប់កីឡាករកម្ពុជា ព្រោះជាការប្រកួតកំណត់វាសនាឡើងទៅវគ្គបន្ត ។ ពេជ្រ សីហា និងសរ រាជសីហ៍ ប្រកួតបាន២លើកម្នាក់រួចមកហើយ ក្នុងនោះឈ្នះមួយប្រកួត ចាញ់មួយប្រកួតដូចគ្នា។ ដូច្នេះពួកគេទាំង២សង្ឃឹមលើលទ្ធផលការប្រកួតលើកនេះ បើសិនជាឈ្នះទើបបានឡើងទៅប្រកួតនៅវគ្គបន្តទៀត។
ពេជ្រ សីហា ដែលត្រូវជួបប្រកួតជាមួយ ធុតស៍ភុន ស.សុម៉ាលី លើកនេះ ប្រហែលជាពិបាកបន្តិចហើយ ព្រោះកីឡាករឡាវរូបនេះ មានសមត្ថភាពមិនធម្មតាទេ។ ជាក់ស្ដែងប្រកួត២លើកកន្លងមកគេឈ្នះទាំង២លើកជាប់គ្នា។ ម្យ៉ាង បើធ្វើការប្រៀបធៀបទៅលើកម្លាំងស៊ុហ្វ និងល្បិចប្រយុទ្ធនៅលើសង្វៀនវិញនោះ គឺពេជ្រ សីហាមិនអាចទៅរួចទេ ដូច្នេះគេអាចជួបរឿងមិនល្អច្រើនជាង ។ ប៉ុន្តែសម្រាប់ពេជ្រ សីហា ខ្លួនឯងគេនៅតែមានជំនឿចិត្តច្រើនក្នុងការយកឈ្នះដើម្បីមានឱកាសឡើងទៅប្រកួតនៅវគ្គបន្ត ។
ចំណែកសរ រាជសីហ៍ ប្រហែលជាមានជំនឿចិត្តច្រើនជាង ថ្វីដ្បិតតែគេចាញ់់១កួតពិតមែន តែសម្រាប់ការប្រកួតលើកនេះប្រហែលជាគ្មានបញ្ហាអ្វីឡើយ ព្រោះគូប្រកួតរបស់គេមិនមែនជាជើងខ្លាំងដែលពិបាកទប់ទល់នោះទេ ។ នំធីប ស.រុងរ៉ាវី ប្រកួតបាន២លើកចាញ់ទាំង២លើកដូច្នេះការប្រកួតលើកនេះ គឺធ្វើឡើងដើម្បីបង្គ្រប់កិច្ចប៉ុណ្ណោះ ពីព្រោះបើទោះជាឈ្នះក៏គ្មានឱកាសបានឡើងទៅប្រកួតនៅវគ្គបន្តទៀតដែរ ។
តាមការឱ្យដឹងពីលោក មាស សុខគ្រី ដែលជាមន្ត្រីគណៈកម្មការរៀបចំការប្រកួត ក្នុងចំណោមកីឡាករកម្ពុជាទាំង៤រូបមាន រឿង សោភ័ណ្ឌ មកពីក្លិបមកុដរាជសីហ៍ម្នាក់រួចមកហើយ ដែលមានសំណាងបានឡើងទៅប្រកួតនៅវគ្គបន្តដោយស្វ័យប្រវត្តិ ឯឡុង សុភី មកពីក្លិបសាលវ័ន្តកីឡាត្រូវហាលខោបាត់។ នៅពេលនេះមានតែពេជ្រ សីហា និងសរ រាជសីហ៍ប៉ុណ្ណោះដែលកំពុងតែស្វែងរកឱកាសឡើងទៅប្រកួតនៅវគ្គបន្ត។
ចំណែកគូប្រកួតមិត្តភាពប្រចាំសប្ដាហ៍នេះ មានកីឡាករ ថុល មករា មកពីក្លិបឃ្លាំងមឿងកីឡា ប្រកួតជាមួយកីឡាករ វៀង សាវ៉ន មកពីក្លិបគីសែមានរិទ្ធ និងកីឡាករ សេង កំសត់ មកពីក្លិបគីសែមានរិទ្ធ ប្រកួតជាមួយកីឡាករ ជឹម សារ៉ាត់ មកពីក្លិបតាព្រហ្មមានជ័យ ៕
ចែករំលែកព័តមាននេះ