រាជធានីភ្នំពេញ ៖ ក្នុងពិធីប្រគល់រង្វាន់ជិត១០០លានរៀលនៅក្រសួងអប់រំ យុវជន និងកីឡា កាលពីថ្ងៃទី២៦ មេសា ម្សិលម៉ិញ លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានអះអាងនៅចំពោះមុខលោករដ្ឋមន្ត្រី ហង់ ជួន ណារ៉ុន ថា លោកមានការបារម្ភយ៉ាងខ្លាំងពាក់ព័ន្ធនឹងចំណុចខ្សោយធំមួយរបស់កីឡាការិនី ស៊ន សៀវម៉ី ។ នេះជាក្ដីបារម្ភរបស់លោក ក៏ដូចជារបស់មន្ត្រីទាំងអស់ទៅលើលទ្ធភាពរបស់នាងក្នុងនាមជាអ្នកតំណាងរបស់កម្ពុជាចេញទៅប្រកួតអូឡាំពិកនៅប្រទេសប្រេស៊ីល នាពេលខាងមុខ ។
លោក វ៉ាត់ ចំរើន បានថ្លែងបញ្ជាក់ថា បើនិយាយពីបច្ចេកទេស កីឡាការិនី ស៊ន សៀវម៉ី មានចំណុចមិនអន់ជាងកីឡាការិនីបរទេសនោះទេ សូម្បីតែកម្ពស់កម្ព និងមាឌរបស់នាងក៏មានភាពអំណោយផលប្រហាក់ប្រហែលនឹងជើងខ្លាំងនៅបណ្ដាប្រទេសអឺរ៉ុបនោះផងដែរ ។ ប៉ុន្តែអ្វីដែលជាចំណុចខ្សោយដែលលោកព្រួយបារម្ភគឺពាក់ព័ន្ធនឹងកម្លាំងកាយរបស់នាងដែលលោកបញ្ជាក់ថា បើគ្មានការបំប៉នឲ្យពេញកម្លាំងក្នុងពេលហ្វឹកហាត់នៅក្នុងប្រទេសកូរ៉េនោះទេ គឺពិតជាពិបាកទប់ជាមួយកីឡាករមកពីទ្វីបអាមេរិក និងអឺរ៉ុបនៅក្នុងព្រឹត្តិការណ៍អូឡាំពិកមិនខាន ។ លោកនិយាយថា៖ «បើទោះជាសៀវម៉ី ត្រូវចេញទៅហ្វឹកហាត់នៅប្រទេសកូរ៉េក្នុងពេលដ៏ខ្លី ប៉ុន្តែខ្ញុំនៅតែមើលឃើញថាគាត់នៅខ្សោយកម្លាំងកាយខ្លាំងមែនទែន បើធៀបនឹងកីឡាករបរទេសដែលខ្ពស់ ហើយមាឌធំៗដូចគ្នា!» ។ លោកថា ស៊ន សៀវម៉ី ដាច់ខាតត្រូវតែមានគ្រូជំនាញមួយរូបជួយបង្រៀនឲ្យនាងចេះប្រមូលកម្លាំង ដែលលោកបញ្ជាក់ថា ក្នុងរយៈពេល២ខែដែលនាងចេញទៅហ្វឹកហាត់នៅក្នុងប្រទេសកូរ៉េខាងត្បូងមិនអាចជួយឲ្យនាងក្លាយជាមនុស្សដែលខ្លាំងពេញដោយកម្លាំងបានដែរ ប្រសិនបើនាងមិនបានទទួលការបង្វឹកពីគ្រូជំនាញ និងទទួលបានរបបអាហារត្រឹមត្រូវ ។
លោកនិយាយថា៖«ពាក់ព័ន្ធនឹងបញ្ហាកម្លាំងកាយនេះ ក៏វាទាក់ទងនឹងកម្លាំងចិត្តរបស់គាត់ផងដែរ អញ្ចឹងដើម្បីឲ្យគាត់ល្អសមនឹងបច្ចេកទេសរបស់គាត់ គឺលុះត្រាកូរ៉េជួយផ្ដល់គ្រូបង្វឹកដែលមានជំនាញមែនទែនក្នុងពេលគាត់ទៅហ្វឹកហាត់ ដើម្បីឲ្យគាត់បានយល់ដឹងតាំងពីរបបអាហារ តាំងពីការទទួលទានដំណេក និងការប្រមូលកម្លាំងតែម្ដង។ បើមិនដូច្នេះទេ គាត់ពិតជាពិបាកដណ្ដើមបានមេដាយណាស់ ដោយសារតែកីឡាការិនីអូឡាំពិកភាគច្រើនសុទ្ធតែមានសមត្ថភាពខ្ពស់កម្រិតពិភពលោកហើយមកពីទ្វីបអាមេរិក និងអឺរ៉ុប ដែលមានបច្ចេកទេសប្រើកម្លាំង និងបច្ចេកទេសខ្ពស់ជាងកីឡាការិនីនៅអាស៊ីដែលសៀវម៉ីធ្លាប់ជួប!» ។ ការលើកឡើងរបស់លោកគឺជាការបង្ហាញឲ្យឃើញនូវចំណុចខ្វះខាតរបស់កីឡាការិនីជើងខ្លាំងស៊ន សៀវម៉ី ដែលពីមុនគឺមានមនុស្សតិចបំផុតដែលបានដឹង ។ លោកថា សៀវម៉ី នឹងចេញទៅហ្វឹកហាត់នៅក្នុងប្រទេសកូរ៉េនៅថ្ងៃទី១៦ ឧសភា និងគ្រោងត្រឡប់មកវិញនៅពាក់កណ្ដាលឬចុងខែកក្កដា រួចត្រៀមខ្លួនចេញទៅប្រទេសប្រេស៊ីលតែម្ដងដើម្បីបើកឆាកប្រកួតនៅអំឡុងខែកញ្ញា ខាងមុខ ។
ស៊ន សៀវម៉ី បានអះអាងថា ផលវិបាកដែលនាងតែងប្រឈមក្នុងពេលចេញប្រកួតគឺរបបអាហារនិងការទទួលទានដំណេកដែលនាងរមែងគេងមិនសូវលក់ ។ នាងនិយាយថា៖«សម្រាប់ខ្ញុំ ការលើកទឹកចិត្តកន្លងមករបស់ក្រសួង ក៏ដូចជារាជរដ្ឋាភិបាល គឺខ្ញុំគិតថា គ្រប់គ្រាន់ហើយ ប៉ុន្តែភាគច្រើនខ្ញុំអត់សូវចេះញ៉ាំអាហារគេ ។ ជាក់ស្ដែង ដូចជាកាលប្រកួតនៅក្នុងប្រទេសហ្វីលីពីនគឺ ខ្ញុំហូបបានតែមីកញ្ចប់ និងត្រីងៀតទេ អញ្ចឹងហើយទើបពេលខ្លះខ្ញុំគិតថាបញ្ហាកម្លាំងខ្ញុំមិនដល់គេគឺជាផលប៉ះពាល់មួយដែរ!» ។ នាងថា ថវិកាដែលទទួលបានកាលពីថ្ងៃទី២៦ មេសា នោះ គឺនាងប្រើសម្រាប់ដោះស្រាយតម្រូវការជីវភាពគ្រួសារដោយមិនយកថវិកាទាំងនោះទៅចាយវាយតាមបំណងផ្ទាល់ខ្លួននោះឡើយ។ នាងនិយាយថា នាងនឹងយកតែចំណែកតូចមួយនៃថវិកាដែលទទួលបានប៉ុណ្ណោះ ក្រៅពីនោះគឺឱ្យម្ដាយនិងក្រុមគ្រួសារនាងជាអ្នកចាត់ចែងទាំងអស់ ដោយនាងមិនទាមទារនោះទេ ដោយសារតែនាងក៏ជាបង្គោលគ្រួសារមួយរូបដែរ ។ នាងថា រូបនាង និងគ្រូបង្វឹកបានត្រៀមខ្លួនរួចហើយដើម្បីចេញទៅហ្វឹកហាត់នៅក្នុងប្រទេសកូរ៉េនៅពាក់កណ្ដាលខែក្រោយ និងត្រៀមទៅប្រកួតនៅក្នុងព្រឹត្តិការណ៍អូឡាំពិកក្រោយពេលបញ្ចប់ការហ្វឹកហាត់ ។
គួរបញ្ជាក់ផងដែរថា នៅក្នុងពិធីប្រគល់ប្រាក់រង្វាន់កាលពីម្សិលម៉ិញនោះ គឺនាងទទួលបានថវិកាសរុបចំនួន៩៣លានរៀល ដោយ៨០លានរៀលជាប្រាក់រង្វាន់សម្រាប់មេដាយមាសដែលនាងទទួលបានពីការប្រកួតជម្រុះទៅព្រឹត្តិការណ៍អូឡាំពិកសម្រាប់ទ្វីបអាស៊ី និងចំនួន១៣លានរៀលសម្រាប់មេដាយប្រាក់ពីការប្រកួតជើងឯកទ្វីបអាស៊ី ។ ក្នុងនោះលោក ឆយ យ៉ុងសុក ជាគ្រូបង្វឹកក៏ទទួលបានចំនួន៩៣លានរៀលដូចគ្នា ខណៈដែលកីឡាការិនីឈឿង ពុទ្ធារី ដែលទៅប្រកួតជាមួយ សៀវម៉ី នៅហ្វីលីពីនដែរ ទទួលបាន១១លានរៀល ៕
ចែករំលែកព័តមាននេះ