រាជធានីភ្នំពេញ ៖ គណៈកម្មការចម្រុះខណ្ឌដូនពេញមាននគរបាល ប៉េអឹម និងកម្លាំង សណ្តាប់ធ្នាប់ ដឹកនាំដោយលោកសុខ សម្បត្តិ អភិបាលខណ្ឌ លោកឈឹម ឌីណា នាយករដ្ឋបាលខណ្ឌដូនពេញ បានចុះរៀបចំសណ្តាប់ធ្នាប់ និងបិទផ្ទះលក់បាយនៅចំណុចផ្លូវលេខ២៦៤ ជាផ្លូវចូលទៅកាន់ខុទ្ទកាល័យសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី កែងនឹងផ្លូវលេខ១៩ ជាប់ខាងត្បូងរបងវត្តបទុមវតីកែងវិថីព្រះសុរាម្រឹត និងផ្លូវ១៩ សង្កាត់ចតុមុខ កាលពីវេលាម៉ោង១០និង៣០នាទីព្រឹកថ្ងៃទី៣១ មីនា ២០១១ ។
ការរៀបចំសណ្តាប់ធ្នាប់នៅចំណុចខាងលើយ៉ាងប្រញាប់ប្រញាល់នេះ តាមប្រភពព័ត៌មានឱ្យដឹងថា មានបទបញ្ជាពីថ្នាក់ណាមួយ ព្រោះកន្លងមកសាលាខណ្ឌដូនពេញតែងតែណែនាំដល់ម្ចាស់ផ្ទះលក់ទំនិញ និងលក់បាយជាប់របងវត្តបទុមវតីជាច្រើនលើកមកហើយ ជាពិសេសវាបានប៉ះពាល់ដល់ការចេញ-ចូលទៅខុទ្ទកាល័យសម្តេចតេជោហ៊ុន សែន តែម្តង ។ ជាមួយគ្នានេះដែរ សាលាខណ្ឌដូនពេញក៏ដូចជាសាលារាជធានីភ្នំពេញ បានណែនាំដល់ម្ចាស់ផ្ទះលក់សម្ភារចាប់ពីកែងផ្លូវលេខ១៩ និងវិថីព្រះសុរាម្រឹត ឱ្យបញ្ឈប់ធ្វើអាជីវកម្មផងដែរ ។
លោកអភិបាលខណ្ឌដូនពេញបានបញ្ជាក់ថា ផ្ទះលក់បាយចាប់ពីកែងផ្លូវលេខ១៩ រហូតដល់កែងវិថីព្រះសុរាម្រឹត ត្រូវបិទជាស្ថាពរចាប់ពីថ្ងៃនេះទៅ សូម្បីតែហាងខោអាវនៅមុខផ្ទះ និងជាន់លើក៏ហាមឃាត់ដែរ ។ ដោយឡែកនៅចំណុចខាងត្បូងជាប់របងវត្តបទុមវតីផ្លូវលេខ២៦៤ ចូលទៅកាន់ខុទ្ទកាល័យសម្តេចតេជោហ៊ុន សែន កែងនឹងផ្លូវលេខ១៩ ត្រូវបានណែនាំឱ្យរុះរើសំយាបចេញ និងហាមលក់អីវ៉ាន់លើចិញ្ចើមផ្លូវ ។ ការអនុវត្តផែនការរៀបចំសណ្តាប់ធ្នាប់នៅចំណុចខាងលើនេះត្រូវធ្វើជាប្រចាំ ៕
ចែករំលែកព័តមាននេះ