ខេត្តកណ្តាល ៖ ប៉ូលិសរាត្រីក្រុងតាខ្មៅម្នាក់បានរងការចោទប្រកាន់ថា ពេលស្រវឹងស្រាគប់កញ្ចក់រថយន្តគេបែក ហើយនាំគូកនព្រួតវាយម្ចាស់រថយន្តបែកក្បាល មិនតែប៉ុណ្ណោះបានដកហូតកាបូបលុយ និងទូរស័ព្ទពីជនរងគ្រោះទៀតកាលពីវេលាម៉ោង៤និង១៥នាទីទៀបភ្លឺ ថ្ងៃទី៣ មីនា នៅលើផ្លូវលេខ២០១ ស្ថិតនៅភូមិថ្មី សង្កាត់តាខ្មៅ ក្រុងតាខ្មៅ។ ជនរងគ្រោះឈ្មោះឆិល ចាន់ថុល ភេទប្រុស អាយុ២៧ឆ្នាំ រស់នៅភូមិតាក្តុល សង្កាត់តាក្តុល ក្រុងតាខ្មៅ ជាអ្នកបើករថយន្តដឹកទំនិញបានរងរបួសក្បាល ហើយត្រូវគេបញ្ជូនទៅព្យាបាលនៅមន្ទីរពេទ្យជ័យជំនះក្រុងតាខ្មៅ ដេររបួសចំនួន១២ថ្នេរ។ ចំណែកមន្ត្រីប៉ូលិសដែលរងការចោទប្រកាន់នោះឈ្មោះងួន សុខ អាយុ៣៦ឆ្នាំ ជាមន្ត្រីប៉ូលិសរាត្រីក្រុងតាខ្មៅ ខេត្តកណ្តាល។
ជនរងគ្រោះរៀបរាប់ឱ្យដឹងថា រូបគេបានបើករថយន្តដឹកទំនិញម៉ាកហ៊ីយ៉ាន់ដាយ ទម្ងន់២,៥តោន ពណ៌ស ពីផ្ទះនៅភូមិតាក្តុល សង្កាត់តាក្តុល តាមផ្លូវលេខ២០១ លុះដល់ម្តុំរោងចក្រយ៉ុងវ៉ាចាស់ ស្ថិតនៅភូមិថ្មី សង្កាត់តាខ្មៅ បានចតរថយន្តនៅខាងស្តាំដៃ ដើម្បីទិញកាតទូរស័ព្ទ។ បន្ទាប់ពីគេចុះពីរថយន្តដើរចេញបានបន្តិច ស្រាប់តែត្រូវប៉ូលិសឈ្មោះងួន សុខ ជិះម៉ូតូទៅដល់ ហើយស្រែកសួររកម្ចាស់រថយន្ត ខណៈរូបគេនៅខាងក្រោយរថយន្ត។ ប៉ូលិសនោះយកដៃវាយកញ្ចក់រថយន្ត និងយកដុំថ្មគប់បែកកញ្ចក់ផ្នែកខាងមុខ រួចជិះម៉ូតូចេញទៅឈប់នៅផ្ទះលក់ចាប់ហួយមួយចំងាយពីរថយន្តប្រហែលជាង៥០ម៉ែត្រ។
ជនរងគ្រោះឱ្យដឹងទៀតថា ពេលគេទៅសួរនាំរកខុសរកត្រូវ ស្រាប់តែត្រូវប៉ូលិសនោះដែលកំពុងផឹកស្រាថ្នាំជាមួយបក្សពួក៣នាក់ទៀតព្រួតវាយរូបគេ។ មិនតែប៉ុណ្ណោះឈ្មោះងួន សុខ យកប្រដាប់ចូកសំរាមធ្វើអំពីដែកវាយចំក្បាលរូបគេបណ្តាលបែកហូរឈាម ។ ក្រៅពីបង្ករបួស ឈ្មោះងួន សុខ បានឆែកឆេរក្នុងហោប៉ៅរបស់គេយកទូរស័ព្ទដៃមួយគ្រឿងម៉ាកណូគៀX6 និងយកកាបូបដែលក្នុងនោះមានលុយចំនួន៣០០ដុល្លារ ប័ណ្ណសំគាល់រថយន្ត និងប័ណ្ណបើកបររថយន្ត រួចនាំគ្នាជិះម៉ូតូគេចខ្លួនបាត់ស្រមោលអស់ទៅ។ ចំណែករូបគេត្រូវបានគេបញ្ជូនទៅព្យាបាលនៅមន្ទីរពេទ្យជ័យជំនះក្រុងតាខ្មៅ។
ជនរងគ្រោះឱ្យដឹងថា ក្រុមគ្រួសាររបស់គេបានទៅសាកសួរប្រជាពលរដ្ឋនៅក្បែរកន្លែងកើតហេតុស្គាល់ថា ឈ្មោះងួន សុខ ជាមន្ត្រីប៉ូលិសក្រុងតាខ្មៅ បំរើការនៅផ្នែករាត្រី(ប៉ូលិសល្បាតពេលយប់)។ រឿងនេះរូបគេបានដាក់ពាក្យប្តឹងនៅអធិការដ្ឋានក្រុងតាខ្មៅ ប៉ុន្តែឈ្មោះងួន សុខ មិនត្រូវបានចាប់ខ្លួនឡើយ។ ទាក់ទិននឹងការចោទប្រកាន់នោះ រហូតមកដល់រសៀលថ្ងៃទី៣ មីនា យើងមិនអាចទាក់ទងសុំការបំភ្លឺពីមន្ត្រីប៉ូលិសឈ្មោះងួន សុខ បានឡើយ។ ចំណែកលោក ឱ ផាន់ណា អធិការនគរបាលក្រុងតាខ្មៅបានប្រាប់តាមទូរស័ព្ទថា រឿងនេះជារឿងវាយទៅវាយមក ខណៈអ្នកទាំង២ស្រវឹងស្រាដូចគ្នា។ រឿងនេះលោកកំពុងចាត់ការ៕
ចែករំលែកព័តមាននេះ