រាជធានីភ្នំពេញ ៖ បើទោះជាមានរឿងអាស្រូវពាក់ព័ន្ធនឹងការជ្រុលដៃប្រើអំពើហិង្សាលើភរិយារបស់ខ្លួន បណ្ដាលឲ្យមានព័ត៌មានខ្ចរខ្ចាយនៅក្នុងបណ្ដាញសង្គមហ្វេសប៊ុកក៏ដោយ ក៏កីឡាករល្បីឈ្មោះពៅ ស័ក្ដិសិទ្ធិ នៅតែបានធ្វើដំណើរទៅកាន់ប្រទេសជប៉ុនតាមការគ្រោងទុកកាលពីថ្ងៃទី២៥ មេសា ។ មានការបញ្ជាក់ថា លោកនឹងបន្តបេសកកម្មរយៈពេល១០ខែ បន្ទាប់ពីធ្វើដំណើរទៅកាន់ប្រទេសជប៉ុនលើកនេះ ទើបមានឱកាសបានត្រឡប់មកលេងស្រុកម្ដងទៀត។
នៅលើបណ្ដាញសង្គមហ្វេសប៊ុករបស់អ្នកនាង សុខ ធារ៉ា ភរិយាកីឡាករ ពៅ ស័ក្តិសិទ្ធិដែលប្រើឈ្មោះថា Yada Angkor បានសរសេរបង្ហោះក្រោយពីមានការចុះផ្សាយរឿងពៅ ស័ក្ដិសិទ្ធិ ប្រើអំពើហិង្សានោះថា៖«ឈប់បានក៏ឈប់ទៅខ្ញុំមានអារម្មណ៍ហត់ណាស់ហើយក៏ធុញណាស់ សរសេរអញ្ចឹងបានប្រយោជន៍អី! ប្ដីប្រពន្ធខ្ញុំគ្មានរឿងអីនោះទេ ពាក្យដែលអ្នកឯងសរសេរអ្នកឯងប្រហែលជាគ្មានកូនស្រី ឬប្រពន្ធ និងម្ដាយជាមនុស្សស្រីទេមើលទៅ ពាក្យថាមានសហាយវាធ្ងន់ណាស់សម្រាប់មនុស្សស្រី!» ។ ការលើកឡើងរបស់នាងគឺតបនឹងការចុះផ្សាយយ៉ាងគគ្រឹកគគ្រេងថា លោក ពៅ ស័ក្តិសិទ្ធិ បានចោទថា ភរិយាមានសហាយស្មន់ ហើយគាប់ជួនជានាងបានយកលិខិតឆ្លងដែនរបស់លោកលាក់មិនឱ្យធ្វើដំណើរទៅជប៉ុនផង ទើបបណ្ដាលឱ្យផ្ទុះអំពើហិង្សាកើតឡើង រហូតឈានដល់ការអន្តរាគមន៍ពីមន្ត្រីប៉ូលិស ។
នាងបន្តទៀតថា រឿងចម្រូងចម្រាសដែលបានកើតឡើងនោះ មិនមែនដោយសារតែនាងមានសហាយស្មន់ដូចអ្វីដែលបានចុះផ្សាយនោះទេ គឺជារឿងយល់ច្រឡំ និងដោយសារតែមានអ្នកទី៣ចាក់ដោតធ្វើឲ្យប្ដីប្រពន្ធនាងមានរឿងឈ្លោះគ្នាកាលពីថ្ងៃទី២៤ មេសានោះតែប៉ុណ្ណោះ ។ ហើយរឿងដែលឈានដល់ការសាកសួរពីមន្ត្រីប៉ូលិសនោះ ក៏មិនមានអំពើហិង្សាដូចអ្វីដែលបានលើកឡើងនោះដែរ ។ នាងបានបង្ហោះសារថា៖«រឿងទាំងអស់មិនមែនជាការពិតទេ កុំយកមុខមាត់កិត្តិយសគេមកធ្វើអញ្ចឹង ខ្ញុំចង់ប្រាប់បងប្អូននិងមិត្តភក្តិទាំងអស់គ្នាថា ប្ដីប្រពន្ធខ្ញុំមិនមានរឿងអីនោះទេ រយៈពេលដែលខ្ញុំរស់នៅជាប្ដីប្រពន្ធ៧ឆ្នាំ ប្ដីខ្ញុំមិនដែលវាយឬក៏ប្រើអំពើហិង្សាមកលើខ្ញុំនោះទេ ។ ចង់ប្រាប់ថា ខ្ញុំស្រឡាញ់គាត់ខ្លាំងណាស់ ខ្ញុំសង្ឃឹមថា បងប្អូននឹងលែងយល់ច្រឡំទៀត ហើយពួកខ្ញុំមិនមានបញ្ហាអ្វីទាំងអស់!» ។ អ្វីដែលធ្វើឲ្យមហាជនច្របូកច្របល់ទៀតនោះ គឺនាងបានជូនដំណើរលោកពៅ ស័ក្តិសិទ្ធិឡើងយន្តហោះទៅជប៉ុនកាលពីថ្ងៃទី២៥ មេសា មួយថ្ងៃបន្ទាប់ពីនាង និងស្វាមីផ្ទុះជម្លោះធំដាក់គ្នា អមដោយការបង្ហោះនូវភាសាផ្អែមល្ហែម គឺដូចជាអ្នកទាំងពីរមិនមានបញ្ហានឹងគ្នា។ នាងបញ្ជាក់ថា៖«អូននឹកបងខ្លាំងណាស់ប្ដីសម្លាញ់អើយ បែកបងទើបតែ៥ម៉ោងសោះអូននឹកបងស្ទើរតែឆ្កួតហើយ ចុះ១០ខែទៀតទម្រាំតែបងមក អូនប្រហែលជាឆ្កួតហើយមើលទៅ!» ។
តាមការអះអាងរបស់នាងគឺពៅ ស័ក្តិសិទ្ធិ នឹងចេញទៅកាន់ប្រទេសជប៉ុនរយៈពេល១០ខែរាប់ចាប់ពីថ្ងៃចេញដំណើរម្សិលម្ង៉ៃតទៅ ដើម្បីទៅបំពេញបេសកកម្មបង្ហាត់សិស្សផ្នែកប្រដាល់នៅក្នុងប្រទេសជប៉ុន ។ យ៉ាងណាក៏ដោយ លោកត្រូវខាងភាគីជប៉ុនកំណត់កុងត្រារយៈពេល៤ឆ្នាំឯណោះក្នុងការបំពេញតួនាទីជាគ្រូបង្ហាត់សិស្សផ្នែកប្រដាល់ដោយរាប់ត្រឹមថ្ងៃដែលលោកឡើងយន្តហោះត្រឡប់ទៅវិញនោះ គឺមានរយៈពេល២ឆ្នាំហើយ ។ កីឡាករពៅ ស័ក្តិសិទ្ធិ បានបញ្ជាក់ប្រាប់ប៉ូលិសក្នុងពេលដោះស្រាយទំនាស់ថា ខ្លួនទើបតែបានទៅបង្ហាត់សិស្សនៅក្នុងប្រទេសជប៉ុនបានពាក់កណ្ដាលគម្រោងប៉ុណ្ណោះ ហើយមកពីភរិយាមានបំណងរាំងស្ទះការចេញដំណើររបស់ខ្លួនដោយយកលិខិតឆ្លងដែនលាក់ទើបបណ្ដាលឱ្យមានកំហឹងមួយពេល ។ ប៉ុន្តែភរិយារបស់លោកបែរជាសរសេរបង្ហោះថា លោកមិនបានប្រើអំពើហិង្សាដូចការចុះផ្សាយនោះទេ ទើបធ្វើឱ្យកើតមានចម្ងល់ក្នុងពេលដែលការឈ្លោះគ្នារវាងអ្នកទាំងពីរអត់មានអំពើហិង្សា ប៉ុន្តែបែរជាត្រូវនាំខ្លួនមកកាន់ប៉ុស្ដិ៍ប៉ូលិស ហើយធ្វើឱ្យមានព័ត៌មានអាស្រូវ ។
យ៉ាងណាក៏ដោយ អ្នកដែលបានបញ្ចេញមតិលើជម្លោះប្ដីប្រពន្ធរបស់អ្នកទាំង២បានយល់ឃើញថា នោះជាជម្លោះចានក្នុងរាវ ហើយទំនងដើម្បីការពារកិត្តិយសរបស់ស្វាមីទើបបានចេញមុខបដិសេធ ទាំងខាងមន្ត្រីប៉ូលិសបានបញ្ជាក់ថា អ្វីដែលបានបញ្ជាក់ប្រាប់អ្នកសារព័ត៌មានក្នុងពេលដោះស្រាយ គឺជាចម្លើយសារភាពដោយផ្ទាល់មាត់របស់លោកពៅ ស័ក្ដិសិទ្ធិ និងភរិយា ។
គួរបញ្ជាក់ផងដែរថា កាលពីម៉ោង១រសៀលថ្ងៃទី២៤ មេសា ២០១៦ នៅភូមិក្បាលដំរី សង្កាត់កាកាប ខណ្ឌពោធិសែនជ័យ មានការកោះហៅកីឡាករ ពៅ ស័ក្តិសិទ្ឋ អាយុ២៩ឆ្នាំ និងភរិយាឈ្មោះ សុខ ធារ៉ា អាយុ២៩ឆ្នាំ ពាក់ព័ន្ធនឹងជម្លោះប្ដីប្រពន្ធបណ្ដាលឱ្យមានអំពើហិង្សា ។ ពៅ ស័ក្ដិសិទ្ធិ បានសារភាពថា ភរិយាមានសហាយ និងយកលិខិតឆ្លងដែន (Passport) ខ្លួនលាក់ ទើបបណ្ដាលឱ្យខ្លួនជ្រុលដៃប្រើអំពើហិង្សា ខណៈដែលភរិយាបានសារភាពថា ជម្លោះនោះគឺបណ្ដាលមកពីស្វាមីបែកគំនិតមានស្រីថ្មី ទើបបណ្ដាលឱ្យនាងចេញគំនិតឡូឡា និងបង្កជាទំនាស់ ៕
ចែករំលែកព័តមាននេះ