រាជធានីភ្នំពេញ ៖ ដំណើរទស្សនកិច្ចរបស់លោក ហ៊ុន ម៉ាណែត បុត្រាច្បងរបស់សម្តេចតេជោនាយករដ្ឋមន្ត្រី ហ៊ុន សែន ដើម្បីស្វែងរកការបង្រួបបង្រួមរវាងជាតិសាសន៍ខ្មែរនៅក្រៅប្រទេស ត្រូវគេឃើញថាបានទទួលការគាំទ្រគួរឲ្យកត់សម្គាល់
រាជធានីភ្នំពេញ ៖ ដំណើរទស្សនកិច្ចរបស់លោក ហ៊ុន ម៉ាណែត បុត្រាច្បងរបស់សម្តេចតេជោនាយករដ្ឋមន្ត្រី ហ៊ុន សែន ដើម្បីស្វែងរកការបង្រួបបង្រួមរវាងជាតិសាសន៍ខ្មែរនៅក្រៅប្រទេស ត្រូវគេឃើញថាបានទទួលការគាំទ្រគួរឲ្យកត់សម្គាល់ ទោះបីប្រជាពលរដ្ឋខ្មែរមួយចំនួនតូចនៅក្រៅប្រទេសនោះបានធ្វើការប្រឆាំងតវ៉ាក៏ដោយ ។
លោក ហ៊ុន ម៉ាណែត បានធ្វើដំណើរ ឆ្លងកាត់ទ្វីបចំនួន៣ក្នុងរយៈពេលមិនដល់មួយឆ្នាំផង ដើម្បីជួបប្រជាពលរដ្ឋខ្មែរជាច្រើនពាន់នាក់ ។ ក្នុងដំណើរចុងក្រោយគឺបានបញ្ចប់នៅសហរដ្ឋអាមេរិក និងកាណាដា ផ្ទុយពីការផ្សាយមួយចំនួនដែលលើកឡើងថា លោក ហ៊ុន ម៉ាណែត ត្រូវអាជ្ញាធរអាមេរិកឃាត់សួរនាំពាក់ព័ន្ធនឹងករណីចោទប្រើអំពើហិង្សា ឬករណីចោទដោយតុលាការICC នោះទេ ។
ក្នុងដំណើរទៅកាន់ប្រទេសចំនួន៤ក្នុងទ្វីបអឺរ៉ុបដើម្បីជួបប្រជាពលរដ្ឋខ្មែរ រួមមានប្រទេសបារាំង អាល្លឺម៉ង់ ស្វ៊ីស និងបែលហ្ស៊ិក លោក ហ៊ុន ម៉ាណែត បានទទូលការស្វាគមន៍ពីបងប្អូនខ្មែរជាច្រើននាក់នៅទីនោះ ហើយលោកបានលើកឡើងអំពីការអភិវឌ្ឍ និងស្ថានភាពពិតរបស់ប្រទេសកម្ពុជាបច្ចុប្បន្ន ដែលមិនមែនជាស្ថានភាពកម្ពុជាតាមសារព័ត៌មាននោះទេ ។
បន្ទាប់ពីដំណើរទស្សនកិច្ចនៅអឺរ៉ុបកាលពីចុងឆ្នាំ២០១៥ លោកហ៊ុន ម៉ាណែត បានអញ្ជើញធ្វើដំណើរទៅកាន់ប្រទេសចិន និងក្រោយមកក្នុងខែមេសាឆ្នាំ២០១៦ ក៏បន្តដំណើទៅកាន់ប្រទេសកូរ៉េខាងត្បូង ដើម្បីជួបពលករខ្មែរដែលកំពុងធ្វើការនៅទីនោះ។បើទោះបីជាមានការគំរាមធ្វើបាតុកម្មប្រឆាំងក្តី ប៉ុន្តែការធ្វើបាតុកម្មមិនអាចកើតមានឡើងឡើយ ។ ដោយសារតែភាពចាស់ទុំខាងនយោបាយ និងភាពសាមញ្ញរបស់លោក រឹតតែញ៉ាំងឱ្យក្រុមបាតុករមកជួបលោក ងាកមកជួបជុំគ្នានិងស្វែងយល់អំពីការពិតដែលកើតមានឡើង មិនដូចអ្វីដែលសារព័ត៌មានផ្សព្វផ្សាយមិនពិតនោះទេ ។
លោក ហ៊ុន ម៉ាណែត ក៏បានសន្យាជួយបង្កើនពលករឱ្យបានច្រើនក្នុងឆ្នាំ២០១៦នេះ និងសន្យាសម្រាលភាពលំបាករបស់ពលករខ្មែរ បញ្ចប់នូវបញ្ហាមិនប្រក្រតីនានា ពិសេសមានការផ្លាស់ប្តូរឯកអគ្គរាជទូតប្រចាំនៅប្រទេសកូរ៉េខាងត្បូងថែមទៀត ។
នៅខែមេសាដដែល ក្នុងគ្រាដែលប្រជាពលរដ្ឋក្នុងប្រទេសកម្ពុជាអបអរសាទរពិធីបុណ្យចូលឆ្នាំថ្មីជួបជុំក្រុមគ្រួសារនោះ លោក ហ៊ុន ម៉ាណែត ត្រូវគេឃើញថា បានដឹកនាំក្រុមការងារចេញទៅសហរដ្ឋអាមេរិកចំនួន៣រដ្ឋ ដើម្បីប្រារព្ធពិធីបុណ្យចូលឆ្នាំថ្មីប្រពៃណីជាតិជាមួយបងប្អូនខ្មែរនៅក្រៅប្រទេស បើទោះបីជាដឹងថា ក្រុមបាតុករជាច្រើនបានត្រៀមប្រឆាំងរូបលោកក្តី ។
រដ្ឋទី១ ដែលលោកទៅដល់គឺរដ្ឋកាលីហ្វ៊័រនីញ៉ា បើទោះបីជាក្រុមបាតុករបានប្រើអំពើហិង្សា ប៉ុន្តែលោក ហ៊ុន ម៉ាណែត និងក្រុមការងារបានធ្វើពិធីជួបជុំបងប្អូនខ្មែរដោយជោគជ័យនិងមានអ្នកចូលរួមគាំទ្រលើសពីការគ្រោងទុក ។លោក ហ៊ុន ម៉ាណែត និងក្រុមការងាររួមទាំង អ្នកចូលរួមទាំងអស់ បានរងការប្រើហិង្សារបស់បាតុករដោយការរចោលវត្ថុរឹងទៅលើ និងរហូត ដល់ប្រើផ្សែងម្រេចបាញ់បង្ហូរទឹកភ្នែក ក៏នៅតែអាចចូលទៅជួបបងប្អូនខ្មែរ និងបានសំណេះសំណាលលើកឡើងនូវរឿងរ៉ាវពិតរបស់កម្ពុជាជូនដល់បងប្អូនខ្មែរដែលចូលរួម ស្តាប់ ។
នៅរដ្ឋកាលីហ្វ៊័រនីញ៉ា លោក ហ៊ុន ម៉ាណែត បានទទួលការស្វាគមន៍ពីអាជ្ញាធរអាមេរិកនៃសង្កាត់ Signal Hill ជុំវិញការធ្វើពិធីដង្ហែក្បួនព្យុហយាត្រាចូលឆ្នាំខ្មែរនៅទីក្រុងឡងប៊ីច រដ្ឋកាលីហ្វ៊័រនីញ៉ា ។ បើទោះបីជាមិនបានចូលរួមក្នុងពិធីដង្ហែក្បួនដើម្បីកុំឲ្យខ្មែរមានជម្លោះរវាងខ្មែរនឹងខ្មែរនោះក្តី លោកនៅបានប្រគល់សម្ភារសម្រាប់ដង្ហែក្បួន ដើម្បីបង្ហាញអំពីប្រពៃណីវប្បធម៌របស់ខ្មែរក្នុងទឹកដីអាមេរិក ពិសេសគឺការរៀបចំឱ្យមានការតាំងពិព័រណ៍ ដែលមានការចូលរួមពីក្រសួងស្ថាប័ននានាដូចជា ក្រសួងទេសចរណ៍ ក្រសួងវប្បធម៌ សភាពាណិជ្ជកម្ម និងអង្គការសមាគមមួយចំនួនទៀត ។
នៅរដ្ឋទី២ លោកហ៊ុន ម៉ាណែត បានធ្វើដំណើរទៅកាន់រដ្ឋ Washington State ជួបបងប្អូនខ្មែរនៅSeattle និងTacoma ដែលភាគច្រើនជាបងប្អូនអ៊ិស្លាម ។ ក្នុងពិធីជួបជុំពិសារអាហារសាមគ្គីជាមហាគ្រួសារខ្មែរមួយលោក ហ៊ុន ម៉ាណែត បានលើកឡើងអំពីសិទ្ធិសេរីភាពរបស់ប្រជាពលរដ្ឋខ្មែរ និងការអភិវឌ្ឍនាពេលបច្ចប្បន្ន ។
នាឱកាសនោះដែរ លោកបានជួបជាមួយតំណាងព្រឹទ្ធសភាសហរដ្ឋអាមេរិកនៅទីនោះ និងអភិបាលក្រុងSeattle ដែលបានជជែកច្រើនទៅលើកិច្ចសហប្រតិបត្តិការរវាងទីក្រុងទាំង២ និងគ្រោងផ្សារភ្ជាប់ឱ្យក្លាយជាSister City ថែមទៀត ។
រដ្ឋទី៣ គឺលោក ហ៊ុន ម៉ាណែត បានធ្វើដំណើរបន្តទៅកាន់រដ្ឋតិចសាស ដើម្បីជួបជាមួយបងប្អូនខ្មែរ ពិសេសជួបជាមួយពាណិជ្ជកររបស់រដ្ឋតិចសាស និងអភិបាលក្រុង Houston។ ប្រជាពលរដ្ឋខ្មែរនៅទីនោះ បានសម្តែងការគាំទ្រចំពោះដំណើរមកដល់របស់លោក ហ៊ុន ម៉ាណែត ផងដែរ ។
ប្រតិភូរបស់លោកបានវិលត្រឡប់មកដល់អាកាសយានដ្ឋានអន្តរជាតិភ្នំពេញនៅថ្ងៃ២៥ មេសា ដោយមានការធ្វើសន្និសីទកាសែត និងមានការទៅទទួលយ៉ាងកុះករផងដែរ ៕
ចែករំលែកព័តមាននេះ