ប្រទេសវៀតណាម ៖ ការនាំចេញអង្កររបស់វៀតណាមក្នុងត្រីមាសទី១ឆ្នាំនេះ មានចំនួន១,៤២លានតោន ស្មើនឹងទឹកប្រាក់៥៧៧,២៨លានដុល្លារអាមេរិក កើនឡើង៥៧,៧% ពីមួយឆ្នាំទៅមួយឆ្នាំ ដែលគិតជាតម្លៃកើនឡើង៥១,១៦% ។
ប្រទេសវៀតណាម ៖ ការនាំចេញអង្កររបស់វៀតណាមក្នុងត្រីមាសទី១ឆ្នាំនេះ មានចំនួន១,៤២លានតោន ស្មើនឹងទឹកប្រាក់៥៧៧,២៨លានដុល្លារអាមេរិក កើនឡើង៥៧,៧% ពីមួយឆ្នាំទៅមួយឆ្នាំ ដែលគិតជាតម្លៃកើនឡើង៥១,១៦% ។ នេះបើតាមសមាគមស្បៀងអាហារវៀតណាមបានឱ្យដឹង ។
កិច្ចសន្យាជាច្រើនត្រូវបានធ្វើឡើងនៅក្នុងឆ្នាំនេះ ជាពិសេស កិច្ចព្រមព្រៀងរវាងរដ្ឋាភិបាលវៀតណាមជាមួយរដ្ឋាភិបាលឥណ្ឌូណេស៊ី និងហ្វ៊ីលីពីន តែម្តង ។ លើសពីនេះទៀត គឺកិច្ចព្រមព្រៀងពាណិជ្ជកម្មជាមួយចិន ដែលបានជំរុញដល់កំណើននៃការនាំចេញអង្ករដ៏ខ្លាំងរបស់វៀតណាម ។
ជាមួយគ្នានេះ បណ្តាប្រទេសនៅតំបន់អាស៊ីអាគ្នេយ៍ គឺជាអ្នកបញ្ជាទិញអង្ករនាំមុខគេ ដែលមានអត្រា៧៦,១២% បន្ទាប់មក គឺសហរដ្ឋអាមេរិក មានអត្រា១០,៩៤% និងអាហ្វ្រិក៩,៧៦% ។
វៀតណាមបាននាំចេញអង្ករក្នុងតម្លៃខ្ពស់រហូតដល់អត្រា២១,៩៦% និង២១,៨៩% ដែលនេះគួរតែអរគុណដល់តម្រូវការខ្ពស់ពីប្រទេសគុយបា ឥណ្ឌូណេស៊ី អាហ្វ្រិក និងចិន។
យោងតាមសមាគមឲ្យដឹងទៀតថា ចំនួននៃកិច្ចសន្យាដែលនឹងត្រូវធ្វើឡើងក្នុងរយៈពេល២-៣ខែចុងក្រោយនេះ គឺមិនរួមបញ្ចូលជាមួយកិច្ចសន្យាថ្មីដែលមានចំណូលខ្ពស់ ពោលគឺប្រមាណ១,៤តោននៃអង្ករដែលត្រូវនាំចេញនោះទេ ។
ការនាំចេញអង្កររបស់វៀតណាមបានកើនឡើងខ្ពស់ក្នុងរយៈពេលប៉ុន្មានខែចុងក្រោយនេះ ជាពិសេស នៅក្នុងខែមីនាតែម្តង ។ សរុបមក ការនាំអង្ករចេញរបស់វៀតណាមមានតម្លៃខ្ពស់ជាងបណ្តាប្រទេសដទៃទៀតក្នុងតំបន់អាស៊ាន ដែលធ្វើឲ្យវៀតណាមបាត់បង់នូវអត្ថប្រយោជន៍ប្រកួតប្រជែងនៅលើទីផ្សារសកល ។
សមាគមស្បៀងអាហារវៀតណាមមានការព្រួយបារម្ភថា ចិនប្រហែលជាអាចផ្លាស់ប្តូរគោលដៅរបស់ខ្លួន ហើយងាកទៅទិញអង្ករពីបណ្តាប្រទេសផ្សេងៗទៀត ជំនួសឲ្យប្រទេសវៀតណាម ដោយសារតែតម្លៃអង្កររបស់វៀតណាមបានឡើងថ្លៃ ។ សមាគមនេះរំពឹងថា ការនាំចេញអង្កររបស់វៀតណាមនៅពាក់កណ្តាលឆ្នាំនេះ នឹងមានចំនួន៣,០១លានតោន និងកើនឡើង១២% ៕
ចែករំលែកព័តមាននេះ