ប្រទេសវៀតណាម ៖ កិច្ចព្រមព្រៀងពាណិជ្ជកម្មសេរីរវាងសហគមន៍អឺរ៉ុប (EU) ជាមួយទីផ្សារអាស៊ី ត្រូវបានគេរំពឹងថា នឹងធ្វើឲ្យការនាំចេញអាហារសមុទ្ររបស់វៀតណាមមានកំណើនជាង៧ប៊ីលានដុល្លារនៅក្នុងឆ្នាំនេះ។ នេះបើតាមសមាគមអ្នកនាំចេញអាហារសមុទ្រ ។
លោក Truong Dinh Hoe អគ្គលេខាធិការទូទៅនៃសមាគមនាំចេញអាហារសមុទ្រវៀតណាម បានថ្លែងនៅក្នុងកិច្ចប្រជុំថា ៖ « ការនាំចេញអាហារសមុទ្រនៅក្នុងឆ្នាំ២០១៦នេះ ត្រូវបានគេរំពឹងថា នឹងមានកំណើន៦,៣% បើធៀបនឹងឆ្នាំមុន ។ ចំណែកប្រាក់ចំណូលពាក់កណ្តាល នឹងបានមកពីការនាំចេញកំពឹស ដែលអាចនឹងកើនឡើងប្រមាណ១២% » ។
លោកបន្ថែមថា ៖ « អត្ថប្រយោជន៍ដែលបានមកពីកិច្ចព្រមព្រៀងពាណិជ្ជកម្មសេរីជាមួយសហគមន៍អឺរ៉ុប ជប៉ុន កូរ៉េខាងត្បូង និងប្រទេសជិតខាងនៅក្នុងតំបន់អាស៊ី នឹងជួយឲ្យវៀតណាម អាចប្រកួតប្រជែងជាមួយគូប្រជែងដ៏ស្វិតស្ថាញរបស់ខ្លួនបាន គឺប្រទេសឥណ្ឌា ឥណ្ឌូណេស៊ី ថៃ និងប្រទេសអេក្វាទ័រ » ។ ក្នុងនោះដែរ ការនាំចេញត្រីធូណា ត្រូវបានគេរំពឹងថា នឹងកើនឡើង៨% បើធៀបនឹងឆ្នាំមុន ខណៈការនាំចេញមឹក នឹងមានកំណើន១០% ។
គួរបញ្ជាក់ថា ការនាំចេញអាហារសមុទ្ររបស់វៀតណាម គឺមិនសូវជាល្អប៉ុន្មានទេកាលពីឆ្នាំ២០១៥កន្លងមក ខណៈការនាំចេញបានធ្លាក់ចុះត្រឹម១៤,៥% បើធៀបនឹងឆ្នាំ២០១៤ ។
ការរើបឡើងវិញដ៏ខ្លាំងក្លានៃវិស័យនេះ គឺដោយសារតែមានកិច្ចព្រមព្រៀងពាណិជ្ជកម្មសេរីថ្មី ក៏ដូចជាកិច្ចព្រមព្រៀងភាពជាដៃគូអន្តរប៉ាស៊ីហ្វិក ដែលនឹងត្រូវចុះកិច្ចសន្យានាពេលខាងមុខនេះ ។ ជាមួយគ្នានេះ កិច្ចព្រមព្រៀងនេះ ត្រូវបានចូលរួមដោយប្រទេសចំនួន១២ រួមមាន សហរដ្ឋអាមេរិក និងជប៉ុន ដែលនឹងកំណត់ក្នុងការកាត់បន្ថយពន្ធនាំចូល៩០% តែម្តង ៕
ចែករំលែកព័តមាននេះ