ខេត្ដកំពត ៖ មានការភ្ញាក់ផ្អើលមួយកើតឡើងកាលពីវេលាម៉ោង៨ព្រឹក ថ្ងៃទី១៦ មេសា នៅផ្សារស្រុកកំពង់ត្រាច ដោយសារតែស្ដ្រីម្នាក់ជាជនសង្ស័យដើរលូកហោប៉ៅយកលុយប្រជាពលរដ្ឋ និងបន្លំយកអីវ៉ាន់ពីអ្នកលក់ដូរនៅក្នុងផ្សារ ហើយត្រូវគេទាន់ក៏ឃាត់ខ្លួនបញ្ជូនទៅឱ្យប៉ូលិសប៉ុស្ដិ៍រដ្ឋបាលឃុំកំពង់ត្រាចខាងកើត ។ការឃាត់ខ្លួនស្ដ្រីជាជនជាប់ចោទនេះ គឺបន្ទាប់ពីឈ្មោះចាន់ ស៊ីណា ភេទស្រី អាយុ ៤៣ឆ្នាំ រស់នៅក្នុងភូមិបងបត់ ឃុំកន្ថោរខាងកើត បានមកផ្សារកំពង់ត្រាច ដើម្បីទិញអីវ៉ាន់យកទៅលក់បន្ដ និងទិញសំភារផ្សេងៗ ទៀតសម្រាប់ទទួលទេវតាឆ្នាំថ្មី ។ លុះពេលទិញបានហើយក៏ដាក់ក្នុងស្បោងខ្មៅទុកនៅ ជិតខ្លួនស្រាប់តែស្ដ្រីជាជនសង្ស័យមកលួចយកទៅ ពេលនោះស្ដ្រីរងគ្រោះបានដេញតាមពីក្រោយរួមជាមួយក្រុមអាជីវករផ្សារ រហូតចាប់ស្ដ្រីដៃឆើតនោះបាន ប៉ុន្ដែភ្លាមនោះចោរស្រីរូបនេះបានអង្វរស្ដ្រីជាម្ចាស់ទ្រព្យថា កុំនិយាយអ្វីឱ្យឮដល់ប៉ូលិសនាំតែបែកការណ៍ ដោយសុំឱ្យលុយ១០ម៉ឺនរៀល ជាថ្នូរមិនបាច់ និយាយរឿងនេះ តែស្ដ្រីរងគ្រោះមិនព្រមទទួលសំណូកពីចោរស្រីនោះទេ ហើយក៏បាននាំគ្នាចាប់ប្រគល់ឱ្យប៉ូលិសតែម្ដង ។
តាមការអះអាងពីមន្ដ្រីប៉ូលិសនិយាយថា ស្ដ្រីជាប់សង្ស័យលួចរបស់ទ្រព្យគេនោះ ឈ្មោះឡុង ម៉េង អាយុ២៤ឆ្នាំ មានទីលំនៅមិនពិតប្រាកដ ។ តាមសំដីប្រជាពលរដ្ឋដែលបានចូលមកទិញអីវ៉ាន់ក្នុងផ្សារស្រុកកំពង់ត្រាចនិយាយថា ប្រជាពលរដ្ឋភាគច្រើនមាន ការបាត់លុយកាក់ពេលចូលផ្សារ ពីព្រោះក្រុមចោរបានលូកយកលុយពីក្នុងហោប៉ៅដោយមិនដឹងខ្លួន ។ ប្រជាពលរដ្ឋ និងអ្នករត់ ម៉ូតូនិយាយថា ប៉ូលិសមិនដែលចាប់បានចោរទេ ទាំងចោរដាក់ថ្នាំយកមាសទាំងចោរលូក ហោប៉ៅយកលុយតាមផ្សារ ប៉ុន្ដែពេលនេះ ចាប់បានហើយ ប្រជាពលរដ្ឋប្រុងនាំគ្នាវាយតប់ទៅតាមកំហឹង តែត្រូវប៉ូលិសមកដល់ ។លោកនួន ធី នាយប៉ុស្ដិ៍ឃុំកំពង់ត្រាច និយាយថា ក្រុមចោរពិតជាមានគ្នា៣ទៅ៤ នាក់ ប៉ុន្ដែឥឡូវនេះយើងឃាត់ខ្លួនជាក់ស្ដែង បានម្នាក់បញ្ជូនទៅស្នងការដ្ឋានតាមនីតិវិធី ។
ចែករំលែកព័តមាននេះ