រាជធានីភ្នំពេញ ៖ ផ្ទុយពីតារាថ្មីជាច្រើនទៀត កញ្ញាមុខស្រស់លី សៀវម៉ី មិនចង់បានតំណែងតួឯកខ្លាំងពេកទេ ។ ដោយទើបតែប្រឡូកអាជីពសិល្បៈ សៀវម៉ី ឱ្យតែទទួលបានការងារសិល្បៈច្រើននាងរីករាយណាស់ទៅហើយ ។
រាជធានីភ្នំពេញ ៖ ផ្ទុយពីតារាថ្មីជាច្រើនទៀត កញ្ញាមុខស្រស់លី សៀវម៉ី មិនចង់បានតំណែងតួឯកខ្លាំងពេកទេ ។ ដោយទើបតែប្រឡូកអាជីពសិល្បៈ សៀវម៉ី ឱ្យតែទទួលបានការងារសិល្បៈច្រើននាងរីករាយណាស់ទៅហើយ។
កញ្ញាលី សៀវម៉ី ជាតារាថ្មី ប៉ុន្តែទេពកោសល្យសិល្បៈរបស់នាងមិនអន់ទេ ។ នៅក្នុងឱកាសថតកម្មវិធីសិល្បៈរៀបចំដោយសមាគមទូរទស្សន៍សម្រាប់ចាក់បញ្ចាំងក្នុងថ្ងៃបុណ្យចូលឆ្នាំថ្មីប្រពៃណីជាតិខ្មែរ សៀវម៉ីរាំពន់ពេនរស់រវើក មិនចាញ់តារារៀមច្បងឡើយ។ ប្រសិនបើម្ចាស់ផលិតកម្មបានឃើញច្បាស់ជាពេញចិត្តឱ្យសៀវម៉ីចូលរួមសម្តែងមិនខាន ។
ទម្រង់មុខ និងរាងរៅរបស់កញ្ញាលី សៀវម៉ី មានអ្នកសិល្បៈមួយចំនួនលើកឡើងថា ប្រសិនបើនាងខំប្រឹងយូរបន្តិចទៀតនឹងមានឱកាសចាប់បានតំណែងតួឯកជាក់ជាមិនខាន ព្រោះមួយរយៈចុងក្រោយនេះគេសង្កេតឃើញថា ស្ទើរតែគ្រប់បណ្តាផលិតកម្មចាប់ផ្តើមផ្តោតយកតារាសម្តែងថ្មីដែលមានទេពកោសល្យឱ្យចូលរួមសម្តែងជាជាងយកតារាសម្តែងជើងចាស់ ។
កញ្ញាលី សៀវម៉ី មានស្រុកកំណើតនៅខេត្តកោះកុង។ នារីស្អាតរូបនេះស្រឡាញ់សិល្បៈតាំងពីក្មេង គ្រាន់តែពេលនោះនាងគ្មានឱកាស។ ស្របពេលចាកចេញពីស្រុកកំណើតមកធ្វើការងារក្នុងក្រុមហ៊ុននៅភ្នំពេញ លី សៀវម៉ី សម្រេចចិត្តបោះជំហានចូលពិភពសិល្បៈ តែនាងមិនបានហាត់រៀននៅទីណាទេ ក្រៅពីប្រើទេពកោសល្យពីធម្មជាតិរបស់នាង ។
កញ្ញាលី សៀវម៉ី ក្នុងឱកាសសម្តែងឱ្យសមាគមទូរទស្សន៍កាលពីពេល ថ្មីៗកន្លងមកនិយាយថា «នាងខ្ញុំស្រឡាញ់សិល្បៈតាំងពីក្មេង ដូច្នេះបើទោះជាផលិតកម្មណាដាក់ឱ្យនាងខ្ញុំសម្តែងជាតួរាយរងក៏ដោយ យល់ព្រមទទួលយកការសម្តែងទាំងសប្បាយចិត្តដែរ ។ ខ្ញុំចង់បង្កើនបទពិសោធន៍ឱ្យបានច្រើនមុននឹងឈានទៅសម្តែងតួធំដុំ ។ មនុស្សយើងធ្វើអ្វីក៏ត្រូវផ្តើមពីតិចទៅច្រើនដែរ ។ ទោះជាយ៉ាងណាក្តី នាងខ្ញុំមានក្តីប្រាថ្នាថាថ្ងៃណាមួយតាមរយៈការប្រឹងប្រែងនឹងទទួលបានតំណែងតួឯកមិនខាន» ។
តារាស្រគត់ស្រគំលី សៀវម៉ី បញ្ជាក់ថា ប្រសិនបើបានឱកាសសម្តែងភាពយន្ត នាងចង់សម្តែងជាតួកម្សត់ បង្ហូរទឹកភ្នែក ដោយសារនាងជាមនុស្សចូលចិត្តភាពស្ងប់ស្ងាត់ អណ្តែត អណ្តូង ។ ប្រសិនបើគេឱ្យដើរតួយំពិតជាយំលឿន ដោយសារសៀវម៉ី ឧស្សាហ៍ហាត់រៀនដោយខ្លួនឯងនៅមុខកញ្ចក់ដាក់អារម្មណ៍នៅពេលសម្តែងបែបទួញយំ ។តារារៀមច្បងដែលលី សៀវម៉ីផ្តោតមើលរបៀបសម្តែង គឺកញ្ញានី មុនីនាថ ។
ដោយមានទឹកចិត្តស្រឡាញ់សិល្បៈលី សៀវម៉ី តាំងចិត្តតស៊ូទៅមុខទៀតទោះជាចំណាយពេលយូរក្តី ដើម្បីក្លាយជាតារាល្បីមួយដួង ៕
ចែករំលែកព័តមាននេះ