ក្រុមជម្រើសជាតិប៉េតង់នារី រំពឹងលើកមុខមាត់កម្ពុជា នៅអេស្ប៉ាញ
- ភ្នំពេញ
រាជធានីភ្នំពេញ ៖ បន្ទាប់ពីបានចេញដំណើរទៅកាន់ប្រទេសអេស្ប៉ាញ ក្រុមប្រតិភូ គ្រូបង្វឹក កីឡាការិនីជម្រើសជាតិប៉េតង់សរុប
រាជធានីភ្នំពេញ ៖ បន្ទាប់ពីបានចេញដំណើរទៅកាន់ប្រទេសអេស្ប៉ាញ ក្រុមប្រតិភូ គ្រូបង្វឹក កីឡាការិនីជម្រើសជាតិប៉េតង់សរុប
រាជធានីភ្នំពេញ ៖ បន្ទាប់ពីបានចេញដំណើរទៅកាន់ប្រទេសអេស្ប៉ាញ ក្រុមប្រតិភូ គ្រូបង្វឹក កីឡាការិនីជម្រើសជាតិប៉េតង់សរុបចំនួន៤នាក់ បានបង្ហាញអោយឃើញពីជំនឿចិត្តយ៉ាងខ្លាំង សម្រាប់ការចេញប្រកួតនៅក្រៅប្រទេសលើកនេះ។ អ្នកទាំង៤ បានចេញដំណើរពីមាតុភូមិរបស់ខ្លួន កាលពីល្ងាចថ្ងៃទី៩ ខែវិច្ឆិកា ឆ្នាំ២០២១ ឆ្ពោះទៅកាន់ប្រទេសអេស្ប៉ាញ ដែលជាម្ចាស់ផ្ទះការប្រកួតកីឡាប៉េតង់ជើងឯកពិភពលោក ដែលកម្មវិធីនេះ ចាប់ពីថ្ងៃទី១២-ដល់ថ្ងៃទី១៤ ខែវិច្ឆិកា ឆ្នាំ២០២១។
កញ្ញា គីន សំណាង អគ្គលេខាធិការរង សហព័ន្ធកីឡាប៊ូល និងប៉េតង់កម្ពុជាគូសបញ្ជាក់ថា លោក សុខ សប្បាយណា អគ្គលេខាធិការ សហព័ន្ធកីឡាប៊ូល និងប៉េតង់កម្ពុជា និងលោក អ៊ឹង គឹមស្រ៊ុន ទីប្រឹក្សាសហព័ន្ធ ទទួលបន្ទុកជាប្រតិភូដឹកនាំ និងគ្រូបង្វឹក លោក សុខ ម៉ុង សម្រាប់ព្រឹត្តិការណ៍នេះ។ រីឯកីឡាការិនី៤នាក់ រួមមាន៖ កីឡាការិនី អ៊ុក ស្រីមុំ អ៊ុន ស្រីយ៉ា ស្រ៊ាង សុរ៉ាឃីម និងកីឡាការិនី ឃួន យ៉ារី។ មន្ត្រីដឹកនាំរូបនេះ បញ្ជាក់ថាដំណើរចេញប្រកួតលើកនេះ គឺដ្បិតថាមិនទាន់មានជំនឿចិត្ត១០០ភាគរយ លើការដណ្ដើមមដាយ តែកីឡាការិនីកម្ពុជា ពិតជានឹងអាចលើកមុខកម្ពុជា នៅក្នុងការប្រកួតដ៏ធំនោះ ពោលគឺនឹងធ្វើអោយកីឡាករកីឡាការិនី អន្តរជាតិចាប់អារម្មណ៍ ដោយយោងលើការប្រឹងប្រែងយ៉ាងសកម្មមុនពេលចាកចេញ។
អគ្គលេខាធិការរងរូបនេះបានបង្ហាញនូវស្នាដៃរបស់កីឡាការិនីទាំង៤នាក់ នៅក្នុងការប្រកួតជើងឯកពិភពលោក កន្លងមក រួមមាន៖ កីឡាការិនី អ៊ុក ស្រីមុំ ជាម្ចាស់មេដាយមាស១ និងមេដាយសំរឹទ្ធ ៣គ្រឿង។ កីឡាការិនី អ៊ុន ស្រីយ៉ា ធ្លាប់ឈ្នះមេដាយសំរឹទ្ធ ៣គ្រឿង កីឡាការិនី ស្រ៊ាង សុរ៉ាឃីម មេដាយប្រាក់១ និងមេដាយសំរឹទ្ធ១ ខណៈកីឡាការិនី ឃួន យ៉ារី មិនធ្លាប់ឈ្នះមេដាយកម្រិតពិភពលោកនេះទេ។
ចំពោះក្រុមជម្រើសជាតិប៉េតង់ផ្នែកបុរសក៏ត្រៀមចូលរួមការប្រកួតជើងឯកពិភពលោក នៅប្រទេសអេស្ប៉ាញនេះផងដែរ ដោយគ្រោងប្រកួតចាប់ផ្តើមពីថ្ងៃទី១៩-២១ ខែវិច្ឆិកា ឆ្នាំ២០២១។
បេក្ខភាពក្រុមជម្រើសជាតិទាំង៤នាក់នេះ គឺជាម្ចាស់ជ័យលាភី ដែលឆ្លងកាត់ការប្រកួតកីឡាប៊ូល និង ប៉េតង់ផ្ទៃក្នុងនៃក្រុមជម្រើសជាតិតាមជំនាញ នៅថ្ងៃទី៤-៥ ខែវិច្ឆិកា ឆ្នាំ២០២១ នៅទីលានសាកលវិទ្យាល័យភូមិន្ទភ្នំពេញ ដើម្បីសម្រិតសម្រាំងរកកីឡាករ កីឡាការិនីជ័យលាភីទៅចូលរួមប្រកួតប្រជែងមេដាយ ក្នុងព្រឹត្តិការណ៍ជើងឯកពិភពលោក នៅប្រទេសអេស្ប៉ាញ។
សូមបញ្ជាក់ថា ការប្រកួតជើងឯកពិភពលោកលើកនេះមានការរៀបចំឡើងចំនួន៣ជើងឯកពិភពលោកចូលគ្នាតែម្តង នៅទីក្រុង Santa Susanna ប្រទេសអេស្ប៉ាញ ដូចជាការប្រកួតជើងឯកពិភពលោក ផ្នែកនារី ចាប់ពីថ្ងៃទី១២-១៤ ខែវិច្ឆិកា ឆ្នាំ២០២១ និងជើងឯកពិភពលោកផ្នែកបុរស ចាប់ផ្តើមពីថ្ងៃទី១៩-២១ ខែវិច្ឆិកា ឆ្នាំ២០២១ ខណៈជើងឯកពិភពលោកយុវជន ចាប់ពីថ្ងៃទី១២-១៤ ខែវិច្ឆិកា ឆ្នាំ២០២១ ប៉ុន្តែក្រុមឈុតយុវជនកម្ពុជាមិនត្រូវបានបញ្ចូនទៅចូលរួមប្រកួតទេ៕
ចែករំលែកព័តមាននេះ