រាជធានីភ្នំពេញ ៖ ក្នុងពេលដែលការប្រកួតកាន់តែកៀកនឹងចូលមកដល់ គេកត់សម្គាល់ថាកីឡាករកម្ពុជា២រូបគឺឌុម កែវដា និងសារឿន ច័ន្ទ ដែលសុទ្ធតែជាជើងខ្លាំងនៅក្នុងពិភពប្រដាល់កម្ពុជា បានប្រឹងប្រែងហ្វឹកហាត់ និងដាក់សម្ពាធខ្លួនឯងយ៉ាងខ្លាំង ។ នេះបើយោងតាមការអះអាងរបស់គ្រូបង្វឹក និងអ្នករៀបចំកម្មវិធី ដោយសារតែពួកគេត្រូវការបំប៉នកម្លាំងស្វាគមន៍ជើងខ្លាំងរបស់ថៃ នៅក្នុងព្រឹត្តិការណ៍ Black Cat របស់ទូរទស្សន៍អាស៊ីអាគ្នេយ៍ ។
លោក ឈិន ក្វាន់ចៃ គ្រូបង្វឹកប្រចាំក្លិបមកុដរាជសីហ៍ បានអះអាងថា កូនសិស្សរបស់ខ្លួនគឺឌុម កែវដា មិនដែលបានដើរទៅណាឱ្យឆ្ងាយពីការហ្វឹកហាត់នោះទេ ដោយលោកបញ្ជាក់ថា បើទោះជាកីឡាករវ័យក្មេងរូបនេះ គេមានសមត្ថភាពនិងមានកម្លាំងពេញខ្លួន ក៏នៅតែមានការប្រយ័ត្នប្រយែងនឹងការហ្វឹកហាត់ ដើម្បីកុំឱ្យអាម៉ាស់មុខនៅលើសង្វៀននោះដែរ។ ឌុម កែវដា នឹងប៉ះជាមួយកីឡាករថៃនៅលើសង្វៀន«Black Cat»ដែលមានឈ្មោះកំពូលអ្នកប្រដាល់ស្រាបៀរប្លេកខេត ដោយការប្រកួតនឹងត្រូវចាប់ផ្តើមនៅយប់ថ្ងៃអាទិត្យទី២៤ មេសា ខាងមុខនេះហើយ ។ លោកថា ការប្រកួតដ្បិតថាសល់ច្រើនថ្ងៃ ប៉ុន្តែកីឡាករជាកូនសិស្សរបស់ខ្លួនស្ទុះស្ទាជាមួយនឹងការហ្វឹកហាត់មិនសូវដកឃ្លានោះទេ ទាំងការហាត់រត់កុំឱ្យឆាប់ហត់ និងការហាត់វ៉ៃជាមួយបាវសាក់ដើម្បីធ្វើឱ្យកណ្ដាប់ដៃ និងកែង មានភាពរហ័ស។ យ៉ាងណាក៏ដោយលោកហាក់មិនហ៊ានរំពឹងច្រើនទេថា កីឡាករឌុម កែវដា នឹងឈ្នះកីឡាករថៃ ដោយគ្រាន់តែអះអាងថា សម្រាប់ការប្រកួតនៅសប្ដាហ៍នេះ គឺកូនសិស្សរបស់លោកត្រៀមខ្លួនគ្រប់គ្រាន់ ។
លោក ញាណ សុធី អ្នករៀបចំការប្រកួតប្រដាល់ប្រចាំស្ថានីយទូរទស្សន៍អាស៊ីអាគ្នេយ៍ បានព្រមានថា ថ្វីដ្បិតតែការប្រកួតនាពេលបច្ចុប្បន្នមានតម្រូវការកីឡាករកម្ពុជាកាន់តែច្រើនដើម្បីឱ្យឡើងប្រកួតដោយសារតែមានសង្វៀនកាន់តែច្រើននៅតាមស្ថានីយនីមួយៗប៉ុន្តែបើកីឡាករកម្ពុជាមិនប្រឹងហ្វឹកហាត់ ហើយនៅបន្តទម្លាប់ជិតដល់ថ្ងៃទើបចូលក្លិបរំលឹកក្បាច់គុន នោះការគាំទ្រនឹងមិនមាននោះឡើយ ។ លោកថា ក្នុងនាមលោកជាអ្នករៀបចំ លោកមិនអាចចេះតែបន្តផ្គូផ្គងឱ្យកីឡាករដែលខ្វះសមត្ថភាពឡើងវាយជាមួយកីឡាករបរទេសបានទេ គឺថាប្រសិនបើធ្លាក់ដៃមិនមានលំនឹងក្នុងការការពារសមត្ថភាពរបស់ខ្លួនឲ្យបានល្អ គឺត្រូវតែឲ្យដេកផ្ទះ ។ លោកមានប្រសាសន៍ថា៖«ទូរទស្សន៍អាស៊ីអាគ្នេយ៍ឥឡូវអត់មានយោគយល់ទេ បើប្រកួតម្ដងពីរដងអត់កើត ចង់កីឡាករហ្នឹងល្បីប៉ុណ្ណាក៏ដោយក៏ឈប់ឱ្យប្រកួតដែរ ព្រោះកីឡាករម្នាក់ៗទារតម្លៃខ្លួនថ្លៃៗណាស់ ហើយបើអត់បានហាត់គឺគេមើលដឹង អញ្ចឹងទោះជាខ្ញុំបង្ខំចិត្តដាក់ឲ្យប្រកួតក៏គង់តែមហាជនគាត់ប្រតិកម្ម និងលែងចង់មើលដែរ!»។
សម្រាប់ដុម កែវដា លោកថាកំពុងពេញកម្លាំង និងមានការហ្វឹកហាត់ដិតដល់ទើបលោកសម្រេចចិត្តឱ្យឡើងប្រកួតនៅក្នុងព្រឹត្តិការណ៍ប្រដាល់Black Cat នៅយប់ថ្ងៃអាទិត្យសប្ដាហ៍នេះ ។ លោកថា កីឡាករវ័យក្មេងរូបនេះ គេត្រូវឡើងប្រកួតជាមួយកីឡាករថៃឈ្មោះ ប្រាវីត ដែលកីឡាកររូបនេះ គឺខ្លាំង និងមានសមត្ថភាពមិនធម្មតានោះដែរ ទាំងកម្លាំង និងភាពរហ័ស ។ លោកថា ឌុម កែវដា នឹងធ្វើការពិសោធន៍ខ្លួនឯងឱ្យអ្នកទស្សនាកត់សម្គាល់ ដោយឈ្នះនឹងកាន់តែល្បី ប៉ុន្តែបើចាញ់ គឺស្ថិតក្នុងកម្រិតពិចារណា២ គឺចាញ់ដោយបច្ចេកទេសក៏ទទួលបានការកោតសរសើរ ប៉ុន្តែបើចាញ់ដោយអន់គឺនឹងរងការរិះគន់ ។ លោកថា គូនេះ កីឡាករថៃធ្លាប់ប្រកួត៩៣លើក ឈ្នះ៨០លើក ចាញ់១១លើក និងស្មើ២លើក ចំណែកកីឡាករឌុម កែវដា ធ្លាប់ប្រកួតបាន៦៧លើក ឈ្នះ៥៥លើក ចាញ់១១លើក និងស្មើ២លើកដូចគ្នា ។ ប៉ុន្តែមកពីទុកចិត្តថ្វីដៃ និងជឿលើការប្រឹងប្រែងហ្វឹកហាត់របស់ឌុម កែវដា ទើបសម្រេចចិត្តដាក់ឲ្យពួកគេប៉ះគ្នា។
នៅក្នុងព្រឹត្តិការណ៍Black Cat នោះដែរ កីឡាករសារឿន ច័ន្ទ ក៏បានបង្ហាញឲ្យឃើញពីការប្រឹងប្រែងផងដែរនៅពេលដែលរូបគេត្រូវស្វាគមន៍ជាមួយកីឡាករថៃឈ្មោះ យ៉ត ភីត ដែលជាជើងខ្លាំងម្នាក់ដែរនោះ ។ លោក ញាណ សុធី ប្រាប់ថា កីឡាករថៃរូបនេះធ្លាប់ប្រកួត៧៩លើក ឈ្នះ៦៤លើក និងចាញ់១៥លើក ខណៈសារឿន ច័ន្ទ ក៏ប្រកួតបាន៧៩លើកដូចគ្នា ឈ្នះ៦៧លើក ចាញ់១០លើក និងស្មើ២លើក ។ លោកថា គូនេះ នឹងក្លាយជាគូឯកសម្រាប់ព្រឹត្តិការណ៍ដែលមានការរំពឹងថា នឹងប្រកួតអស់ពីសមត្ថភាពដោយសារបទពិសោធន៍ និងភាពខ្លាំងក្លារបស់អ្នកទាំងពីរគឺប្រដំប្រសងគ្នា ។
លោក មាស សុខគ្រី ដែលត្រូវគេដឹងថាបានផ្ទុះរឿងជាមួយម្ចាស់ក្លិបមកុដរាជសីហ៍ បានអះអាងថា សម្រាប់ការប្រកួតនៅថ្ងៃអាទិត្យនេះ លោកនឹងប្រឹងបង្វឹកកូនសិស្សរបស់លោកមិនឱ្យបាក់មុខនៅលើសង្វៀននោះទេ ជាពិសេសប្រសិនបើកូនសិស្សក្លិបមកុដរាជសីហ៍បានឈ្នះថៃ ឬបានស្មើថៃ ហើយស្រាប់តែកូនសិស្សរបស់លោកបែរជាមានលទ្ធផលមិនល្អនោះ ។ លោកថា តាំងពីវិលត្រឡប់មកពីចូលឆ្នាំវិញ កីឡាករសារឿន ច័ន្ទ បានប្រឹងប្រែងហ្វឹកហាត់ និងចូលក្លិបដោយម៉ត់ចត់ណាស់ ដើម្បីឲ្យឈ្នះដាច់ខាតលើកីឡាករថៃ និងដើម្បីកុំឲ្យភ្លាត់ស្នៀតនៅពេលកីឡាករឌុម កែវដា ដែលជ្រកក្នុងក្លិបរបស់សត្រូវស្រាប់តែមានជ័យជម្នះ ។ យ៉ាងណាមិញ លោកថា ការប្រកួតគឺមិនអាចកំណត់ថា ចង់ឈ្នះក៏បានឈ្នះនោះទេ គឺគ្រាន់តែអាចធានាការដែលបានហ្វឹកហាត់ត្រៀមទុកបានច្រើននឹងជួយឱ្យការប្រកួតរបស់សារឿន ច័ន្ទ ល្អពេញ៥ទឹកប៉ុណ្ណោះ ៕
ចែករំលែកព័តមាននេះ