រាជធានីភ្នំពេញ ៖ យោងតាមសេចក្ដីជូនដំណឹងរបស់ក្រសួងអប់រំ យុវជន និងកីឡា ដែលចុះហត្ថលេខាដោយលោករដ្ឋមន្ត្រី ហង់ ជួនណារ៉ុន ផ្ញើជូនដល់ប្រធានមន្ទីរអប់រំ យុវជននិងកីឡារាជធានី-ខេត្ត កាលពីថ្ងៃទី១៩ មេសា បានឱ្យដឹងថា ក្រសួងអប់រំ យុវជន និងកីឡា នឹងរៀបចំធ្វើសិក្ខាសាលាដ៏ធំមួយស្ដីពីការប្រកួតកីឡាថ្នាក់ជាតិលើកទី១ នៅទីស្នាក់ការគណៈកម្មាធិការជាតិអូឡាំពិកម្ពុជារយៈពេលមួយថ្ងៃពេញគឺនៅថ្ងៃទី២ ឧសភា ខាងមុខនេះ ។ ដូច្នេះ ក្រសួងអប់រំ យុវជន និងកីឡា សំណូមពរដល់ប្រធាន និងអនុប្រធានមន្ទីរអប់រំ យុវជននិងកីឡាតាមបណ្ដាខេត្ត-រាជធានី សូមមេត្តាចូលរួមតាមកាលកំណត់ ។ ចំពោះសោហ៊ុយធ្វើដំណើរ និងការចំណាយផ្សេងៗក្រសួងជាអ្នករ៉ាប់រងទាំងអស់ ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ធ្លាប់មានប្រសាសន៍ជាច្រើនលើករួចមកហើយថា ព្រឹត្តិការណ៍ប្រកួតកីឡាថ្នាក់ជាតិនេះ ពិតជាមានសារៈសំខាន់ខ្លាំងណាស់ ព្រោះវាបានផ្ដល់មកវិញនូវផលប្រយោជន៍យ៉ាងច្រើនដល់មន្ត្រីកីឡា ក៏ដូចជាតាមសហព័ន្ធកីឡាជាតិនីមួយៗក្នុងការត្រៀមខ្លួនធ្វើជាម្ចាស់ផ្ទះប្រកួតកីឡាស៊ីហ្គេមលើកទី៣២ឆ្នាំ២០២៣ខាងមុខ ។
លោកបន្តថា ការប្រកួតកីឡាស៊ីហ្គេមនៅឆ្នាំ២០២៣នៅសល់ពេលមិនយូរប៉ុន្មាននោះទេ គឺប្រហែលជា៧ឆ្នាំទៀតប៉ុណ្ណោះនឹងមកដល់ហើយ ។ ដូច្នេះ សិក្ខាសាលានេះ គឺធ្វើឡើងក្នុងគោលបំណងផ្សព្វផ្សាយគោលនយោបាយជាតិស្ដីពីការអភិវឌ្ឍវិស័យអប់រំកាយនិងកីឡា និងការធ្វើកំណែទម្រង់ស៊ីជម្រៅលើវិស័យអប់រំកាយនិងកីឡា ឆ្ពោះទៅរកការប្រកួតកីឡាស៊ីហ្គេមលើកទី៣២ ឆ្នាំ២០២៣ ។ ចំពោះព្រឹត្តិការណ៍ ប្រកួតកីឡាថ្នាក់ជាតិនេះផងដែរ គឺផ្ដោតទៅលើប្រភេទកីឡាដែលមានសក្ដានុពលមួយចំនួន ព្រោះក្នុងឋានៈជាម្ចាស់ផ្ទះត្រូវតែដណ្ដើមមេដាយឱ្យបានច្រើន ។ ដូច្នេះការប្រកួតកីឡាថ្នាក់ជាតិនេះ វាជាបទពិសោធន៍មួយយ៉ាងសំខាន់សម្រាប់អត្តពលិកគ្រប់វិញ្ញាសា ក៏ដូចជាគ្រូបង្វឹក និងមន្ត្រីបច្ចេកទេសគ្រប់រូបផងដែរ ដើម្បីបង្កើនសមត្ថភាពឈានដល់កម្រិតស្តង់ដារអន្តរជាតិ ៕
ចែករំលែកព័តមាននេះ