ខេត្តព្រះសីហនុ ៖ ព្រឹត្តិការណ៍ដ៏កក្រើក តន្ត្រីបាល់ទះឆ្នេរខ្សាច់របស់ស្រាបៀរអាន់ឆ័រ2016 បានឈានមកដល់មណ្ឌលចុងក្រោយ គឺខេត្តព្រះសីហនុ ហើយបានប្រារព្ធធ្វើឡើងក្នុងឱកាសចូលឆ្នាំខ្មែរកាលពីថ្ងៃទី13-14 មេសា 2016 នៅឆ្នេរសមុទ្រអូរឈើទាល អារីស្តុន។
នេះគឺជាខេត្តចុងក្រោយហើយដែលស្រាបៀរ អាន់ឆ័រ បានរៀបចំកម្មវិធីតន្ត្រីបាល់ទះឆ្នេរខ្សាច់។ កម្មវិធីតន្ត្រីបាល់ទះឆ្នេរខ្សាច់របស់ស្រាបៀរអាន់ឆ័រនៅមណ្ឌលខេត្តបាត់ដំបង ខេត្តសៀមរាប និងកំពង់ចាមបានបញ្ចប់យ៉ាងជោគជ័យគួរឲ្យកត់សម្គាល់កាលពីសប្តាហ៍កន្លងទៅ ដោយមានការចូលរួមយ៉ាងច្រើនកុះករពីក្រុមបាល់ទះជាច្រើនក្រុម និងភ្ញៀវជាតិ ភ្ញៀវអន្តរជាតិដែលបានចូលទស្សនាកម្មវិធីនេះ។ ហើយចំពោះមណ្ឌលខេត្តព្រះសីហនុនេះវិញ ក្នុងឱកាសបុណ្យចូលឆ្នាំខ្មែរ កម្មវិធីពិសេសរបស់ស្រាបៀរអាន់ឆ័របានទាក់ទាញភ្ញៀវទេសចរក្នុងស្រុក និងក្រៅស្រុកកាន់តែច្រើនកុះករចូលទស្សនាការប្រកួតវគ្គជម្រុះបាល់ទះឆ្នេរខ្សាច់ និងចូលរួមកម្មវិធីជាច្រើនដែលបានរៀបចំឡើងយ៉ាងពិសេសដោយស្រាបៀរអាន់ឆ័រ ដូចជាលេងល្បែងកម្សាន្តដើម្បីឈ្នះរង្វាន់ ជាវសម្ភារកីឡាក្នុងតម្លៃពិសេស ថតរូបទុកអនុស្សាវរីយ៍ និងមានកម្មវិធីកម្សាន្តច្រើនបែបទៀត។
នៅពេលល្ងាចពួកគេបានរីករាយជាវស្រាបៀរអាន់ឆ័រ ដោយមានការបញ្ចុះតម្លៃ រួមទាំងការប្រគំតន្ត្រីដែលចូលរួមពីសំណាក់តារាចម្រៀងល្បីៗប្រចាំព្រះរាជាណាចក្រកម្ពុជា បានធ្វើឲ្យកក្រើកដល់ខេត្តព្រះសីហនុ ពីររាត្រីជាប់គ្នាជាមួយវត្តមាន ខេមរះ សិរីមន្ត, អីវ៉ា, សួស វីសា, ហេង វិទូ, ហ្សូណូ, កែវ វាសនា, ឆាយ វីរៈយុទ្ធ និងតារាចម្រៀងកំពុងនិយមជាច្រើនរូបទៀតបានធ្វើឲ្យកក្រើកដល់ក្រុងព្រះសីហនុ។
សម្រាប់ការប្រកួតនៅមណ្ឌលព្រះសីហនុរយៈពេលពីរថ្ងៃជាប់គ្នាដោយមានការចូលរួមពីក្រុមបាល់ទះចំនួន៣២ក្រុម ដើម្បីប្រកួតដណ្តើមកៅអីសម្រាប់ចូលប្រកួតវគ្គផ្តាច់ព្រ័ត្រនៅឆ្នេរអូរឈើទាល គេបានរកឃើញក្រុមខ្លាំងចំនួនបួនក្រុមដែលត្រូវចូលប្រកួតវគ្គផ្តាច់ព្រ័ត្រនាថ្ងៃទី១៥ មេសា នៅខេត្តព្រះសីហនុ រួមមានក្រុមម្ចាស់ជ័យលាភីលេខ1 ប្រចាំខេត្តព្រះសីហនុ បានទៅក្រុមវិទ្យាល័យហ៊ុនសែនស្មាច់ដែង ទទួលបានទឹកប្រាក់រង្វាន់1.000$ និងមេដាយមាស ជ័យលាភីលេខ2 បានទៅក្រុម Aqua Family Resort ទទួលបានទឹកប្រាក់រង្វាន់500$ និងមេដាយប្រាក់ ជ័យលាភីលេខ3 បានទៅក្រុមតារាបាល់ទះឆ្លងដែន ទទួលបានទឹកប្រាក់រង្វាន់300$ និងមេដាយសំរឹទ្ធិ និងជ័យលាភីលេខ3 ស្ទួនបានទៅក្រុមតារាបាល់ទះទេសចរណ៍ទទួលបានទឹកប្រាក់រង្វាន់300$ និងមេដាយសំរឹទ្ធិ ។
ចែករំលែកព័តមាននេះ