រាជធានីភ្នំពេញ ៖ បន្ទាប់ពីទទួលបានជោគជ័យក្នុងការរៀបចំព្រឹត្តិការណ៍ប្រកួតបាល់ទាត់ធំៗជាបន្តបន្ទាប់ ដូចជាព្រឹត្តិការណ៍បាល់ទាត់មិត្តភាពកម្ពុជា-ថៃ និងឡាវ នាពេលកន្លងមកនោះ នៅខែកក្កដា ឆ្នាំ២០១៦ ខាងមុខនេះ
រាជធានីភ្នំពេញ ៖ បន្ទាប់ពីទទួលបានជោគជ័យក្នុងការរៀបចំព្រឹត្តិការណ៍ប្រកួតបាល់ទាត់ធំៗជាបន្តបន្ទាប់ ដូចជាព្រឹត្តិការណ៍បាល់ទាត់មិត្តភាពកម្ពុជា-ថៃ និងឡាវ នាពេលកន្លងមកនោះ នៅខែកក្កដា ឆ្នាំ២០១៦ ខាងមុខនេះ កម្ពុជាត្រៀមធ្វើម្ចាស់ផ្ទះរៀបចំព្រឹត្តិការណ៍បាល់ទាត់រើសជើងឯកយុវជនAFF U16 Championship 2016 ជាបន្តទៀត។
តាមការឱ្យដឹងពីមន្ត្រីសហព័ន្ធកីឡាបាល់ទាត់កម្ពុជាថា ព្រឹត្តិការណ៍នេះចាប់ផ្ដើមធ្វើពីថ្ងៃទី១០ដល់ថ្ងៃទី២៣ កក្កដា ឆ្នាំ២០១៦ ដោយមានប្រទេសចំនួន១១ចូលរួមប្រកួត និងត្រូវបែងចែកជា២ពូល ។ ពូលAមាន ប្រទេសមីយ៉ាន់ម៉ា, អូស្ត្រាលី, ហ្វីលីពីន, ម៉ាឡេស៊ី, វៀតណាម និងសិង្ហបុរី និងពូលBមាន កម្ពុជា, ថៃ, ឡាវ, ទីម័រខាងកើត និងព្រុយណេ។
គួររំលឹកថា តាមធម្មតាម្ចាស់ផ្ទះមានសិទ្ធិក្នុងការជ្រើសរើសពូលប្រកួតមុនគេ ដូច្នេះសម្រាប់កម្ពុជាដែលស្ថិតនៅក្នុងពូលB នឹងមានឱកាសឈ្នះច្រើនដើម្បីឆ្លងផុតវគ្គជម្រុះក្នុងពូល ព្រោះក្នុងពូលនេះមានតែប្រទេសថៃមួយប៉ុណ្ណោះ ដែលកម្ពុជាត្រូវប្រយ័ត្នជាងគេ ខណៈនៅក្នុងពូលAសម្បូរទៅដោយក្រុមខ្លាំងៗស្ទើរទាំងអស់ ។
មន្ត្រីសហព័ន្ធកីឡាបាល់ទាត់ដដែលបានឱ្យដឹងថា ការប្រកួតលើកនេះយើងប្រើប្រាស់ទីលានចំនួន២ គឺពហុកីឡដ្ឋានជាតិ និងស្តាតចាស់ ។ តាមការកត់សម្គាល់រយៈពេលប៉ុន្មានឆ្នាំចុងក្រោយនេះ វិស័យកីឡាបាល់ទាត់នៅកម្ពុជាមានការរីកចម្រើនយ៉ាងខ្លាំងរហូតទទួលបានការគាំទ្រពីសំណាក់មហាជនខ្មែរយ៉ាងច្រើនកុះករទៀតផង ។ ដូច្នេះសម្រាប់ព្រឹត្តិការណ៍ប្រកួតលើកនេះសង្ឃឹមថា នឹងមានអ្នកចូលរួមទស្សនាមិនតិចម៉ឺននាក់ឡើយ ។ យោងតាមកម្មវិធីប្រកួត កម្ពុជាត្រូវជួបឡាវ និងទីម័រខាងកើត ត្រូវជួបព្រុយណេ នាថ្ងៃទី១១ ខែកក្កដា នៅលើពហុកីឡដ្ឋានជាតិ៕
ចែករំលែកព័តមាននេះ