ប្រទេសវៀតណាម ៖ តៃវ៉ាន់នឹងនាំចូលផ្លែស្រកានាគជាថ្មីម្តងទៀតពីប្រទេសវៀតណាម នៅថ្ងៃទី១ មិថុនា ខាងមុខនេះ បន្ទាប់ពីបានផ្អាកការនាំចូលអស់រយៈពេល៨ឆ្នាំមក ។ នេះបើតាមសេចក្តីថ្លែងការណ៍ពីក្រសួងកសិកម្ម និងអភិវឌ្ឍន៍ជនបទរបស់អគ្គនាយកដ្ឋានការពារដំណាំ ។
ការសម្រេចនាំចូលផ្លែស្រកានាគពីប្រទេសវៀតណាម ត្រូវបានធ្វើឡើងបន្ទាប់ពីការចរចាអស់រយៈពេលដ៏វែងដើម្បីលុបបំបាត់ឧបសគ្គបច្ចេកទេសរវាងនាយកដ្ឋានការពាររុក្ខជាតិ និងនាយកដ្ឋានសមភាគីតៃវ៉ាន់ នៃការិយាល័យការពារសត្វ និងរុក្ខជាតិ ហៅកាត់ថា BAPHIQ ។
កាលពីខែមីនា ឆ្នាំ២០០៩ កន្លងមក ការនាំចេញផ្លែស្រកានាគរបស់វៀតណាមទៅកាន់តៃវ៉ាន់ត្រូវបានផ្អាកទាំងស្រុង ខណៈដែលប្រទេសទាំង៨ទៀតដូចជា ថៃ ហ្វ៊ីលីពីន ឥណ្ឌា ចិន មីយ៉ាន់ម៉ា នេប៉ាល់ ប៉ាគីស្ថាន និងស្រីលង្កា ត្រូវបានឆ្លងជំងឺដែលមានក្នុងសត្វរុយ។ ពេលនោះវៀតណាមបាននាំចេញផ្លែស្រកានាគប្រមាណ១០.០០០តោនប្រចាំឆ្នាំទៅកាន់តៃវ៉ាន់។ នេះជាដំណឹងល្អមួយសម្រាប់អ្នកដាំផ្លែស្រកានាគនៅក្នុងស្រុក និងអ្នកធ្វើអាជីវកម្មលើផ្លែស្រកានាគនេះផងដែរ ពីព្រោះតៃវ៉ាន់ត្រូវបានគេមើលឃើញថា គឺជាទីផ្សារដ៏មានសក្តានុពលសម្រាប់ផ្លែស្រកានាគនេះ ។
នាយកដ្ឋានឲ្យដឹងទៀតថា ភាគីទាំងពីរបានយល់ព្រមលើបទប្បញ្ញត្តិសម្រាប់ការនាំចូល ក៏ដូចជាគុណភាពស្តង់ដានៃផ្លែស្រកានាគ។ ជាមួយគ្នានេះ តៃវ៉ាន់តម្រូវឲ្យក្រៀវផ្លែស្រកានាគទាំងនោះជាមួយនឹងទឹកក្តៅសិនមុនពេលនាំចេញ ។
គួរបញ្ជាក់ថា កាលពីឆ្នាំ២០១៥ ប្រទេសវៀតណាមបាននាំចេញផ្លែស្រកានាគចំនួន១លានតោនទៅកាន់ទីផ្សារបរទេស ៕
ចែករំលែកព័តមាននេះ