ក្នុងឱកាសដែលបងប្អូនប្រជាពលរដ្ឋខ្មែរទាំងក្នុង និងក្រៅប្រទេសត្រៀមទទួលអំណរសាទឆ្នាំថ្មីប្រពៃណីជាតិខ្មែរ ដែល នឹងចូលមកដល់នាថ្ងៃពុធ ទី១៣ មេសា ២០១៦ ត្រូវនឹងថ្ងៃទី៧កើត ខែចេត្រ ឆ្នាំវក អដ្ឋស័ក ពុទ្ធសករាជ ២៥៦០ វេលាម៉ោង៨៖០០នាទីយប់ ។ ថ្នាក់គ្រប់គ្រង និងបុគ្គលិកទាំងអស់របស់គ្រឹះស្ថានឈានមុខគេ ហត្ថាកសិករ លីមីតធីត នៅថ្ងៃទី១០ មេសា ២០១៦ បាននិមន្តព្រះសង្ឃសូត្រមន្តលើករាសីជូនដល់ថ្នាក់គ្រប់គ្រង និងបុគ្គលិករបស់ហត្ថាកសិករ លីមីតធីត ទាំងអស់ ព្រមទាំងបួងសួងដល់ទេវតាឆ្នាំថ្មី ព្រះនាមមណ្ឌាទេវី ជួយប្រោសព្រំពរជ័យសិរីសួស្តី ជ័យមង្គល វិបុលសុខ គ្រប់ប្រការចូលកើតមានដល់អតិថិជន និងសាធារណជនទាំងអស់ជួបតែសេចក្តីសុខជារៀងរហូតតទៅ។
លោកឧកញ៉ា ហួត អៀងតុង ប្រធានអគ្គនាយក ហត្ថាកសិករ បានបង្ហាញចំណាប់អារម្មណ៍ក្នុងពិធីនេះថា ឆ្នាំចាស់ នឹងត្រូវផ្លាស់ចេញនាពេលដ៏ខ្លីខាងមុខ ដោយបានបន្សល់ទុកនូវភាពជោគជ័យគួរឲ្យស្ញប់ស្ញែងទាំងផលិតភាព និងប្រសិទ្ធភាពគ្រប់សេវាហិរញ្ញវត្ថុទាំងអស់ដូចជា សេវាប្រាក់កម្ចី សេវាផ្ទេរប្រាក់ សេវាប្រាក់បញ្ញើសន្សំ សេវាអេធីអឹម សេវាធនាគារចល័ត និងសេវាបើកប្រាក់បៀវវត្សរ៍ សេវាទាំងនោះសុទ្ធសឹងតែទទួលបានការគាំទ្រពេញទំហឹងពីអតិថិជន និងសាធារណជន។ ការបន្តគាំទ្រ និងទុកចិត្តពីអតិថិជនបានផ្តល់លទ្ធភាពឲ្យហត្ថាកសិករក្លាយជាស្ថាប័នហិរញ្ញវត្ថុឈានមុខគេ រឹងមាំ និងមានសុវត្ថិភាពខ្ពស់។ លោកឧកញ៉ាបន្តថា «ការស្ដាប់អតិថិជន ដើម្បីជ្រើសរើសវិធីល្អបំផុតក្នុងការបំពេញតម្រូវការ និងចំណង់ចំណូលចិត្តរបស់ពួកគាត់»។ ហេតុដូចនេះហើយបានជាហត្ថាកសិករ ប្រសិទ្ធនាមថា « ឆ្នាំ២០១៦ រួមគ្នាប្រតិបត្តិ ផ្តល់សេវាមធ្យ័តកាន់តែចម្រើន»។ លោកបានបន្ថែមទៀតថា ក្រៅពីបំពេញតាមតម្រូវការរបស់អតិថិជន និងស្តាប់អតិថិជននោះ ហត្ថាកសិករ បានបង្កើតកម្មវិធីថ្មីមួយទៀត ដែលផ្តល់ប្រយោជន៍ច្រើនជូនអតិថិជនដែលដាក់ប្រាក់បញ្ញើសន្សំមានកាលកំណត់ដែលមានឈ្មោះថា ដាក់បាន ដាក់បាន កម្មវិធីនេះ អតិថិជនគ្រាន់តែដាក់ប្រាក់បញ្ញើមានកាលកំណត់ចាប់ពី២.០០០ដុល្លារអាមេរិកឡើងទៅនោះ អតិថិជននឹងបានរង្វាន់ភ្លាមៗ ដូចជា ម៉ាស៊ីនបោកខោអាវ ទូរទស្សន៍ កង្ហារត្រជាក់ ឆ្នាំងដាំបាយអគ្គិសនី ព្រមទាំងទទួលបានសន្លឹកឆ្នោតដែលមានឱកាសឈ្នះបន្តោងខ្សែ.កមាសសរុប២៣តម្លឹង និងផ្តល់ជូនអត្រាការប្រាក់រហូតដល់ទៅ៩.៨ភាគរយប្រចាំឆ្នាំទៀតផង។
ឱកាសរៀបចំទទួលទេវតាឆ្នាំថ្មីនេះ ក៏មានការសម្ដែងជារបាំត្រុដិ ក្នុងន័យដើម្បីបណ្តេញឧបទ្រពចង្រៃ ឆ្នាំចាស់ចេញឲ្យអស់ ហើយទទួលមកវិញ នូវសិរីសួស្តីមង្គល ជោគជ័យក្នុងឆ្នាំថ្មីទាំងអស់គ្នា ព្រមទាំងមានការលេងល្បែងប្រជាប្រិយ ក្នុងន័យដើម្បីលើកកម្ពស់វប្បធម៌ប្រពៃណីជាតិឲ្យកាន់តែរឹងមាំ ស្របពេលជាមួយគ្នានោះដែរ នៅពេលល្ងាចក៏មានការពិសាអាហាជុំគ្នា និងការប្រគុំតន្ត្រីរាំលេងកម្សាន្តបែបលក្ខណៈប្រពៃណីជាតិ ដើម្បីរឹតចំណងមិត្តភាពឲ្យកាន់តែមានភាពស្និតស្នាលរវាងបុគ្គលិក និងមានការផ្តល់ជារង្វាន់ផ្សងសំណាងដ៏ច្រើនសន្ធឹកសន្ធាប់ សម្រាប់បុគ្គលិកដែលបានចូលរួមមានដូចជាម៉ាស៊ីន បោកខោអាវ កង្ហារបញ្ឈរ ឆ្នាំងដាំបាយអគ្គិសនី និងរង្វាន់ផ្សេងៗជាច្រើនទៀត។
គួរបញ្ជាក់ផងដែរថា គិតត្រឹមខែមីនា ឆ្នាំ២០១៦ ហត្ថាកសិករ មានសម្ពាធឥណទានក្នុងដៃអតិថិជនជាង៣៨៦លានដុល្លារ និងមានចំនួនអ្នកខ្ចីប្រាក់សរុប១១២.៩៣១នាក់ ព្រមទាំងមានសមតុល្យប្រាក់បញ្ញើសន្សំជាង២៦៣លានដុល្លារ ដោយមានអ្នកសន្សំប្រាក់ចំនួន២១៩.៦៨១នាក់ ។ បន្ថែមពីនេះទៀត ហត្ថាកសិករ មានការិយាល័យកំពុងប្រតិបត្តិការចំនួន១៥១ និងមានម៉ាស៊ីនអេធីអឹម ចំនួន១១៥គ្រឿង ដែលកំពុងដាក់ឱ្យដំណើរការទូទាំងប្រទេសកម្ពុជា។
ចែករំលែកព័តមាននេះ