ខេត្តសៀមរាប ៖ ទីបំផុត លោក ហូយ សុខណា ដែលឆ្នាំមុនជាប់ចំណាត់ថ្នាក់លេខ៤នោះពេលនេះបានក្លាយជាស្ដេចអុកចត្រង្គអង្គរសង្ក្រាន្ដប្រចាំឆ្នាំ២០១៦ បន្ទាប់ពីប្រកួតឈ្នះលោក សេង សុធា ក្នុងវគ្គផ្ដាច់ព្រ័ត្រនៅមុខប្រាសាទអង្គរវត្ដ
ខេត្តសៀមរាប ៖ ទីបំផុត លោក ហូយ សុខណា ដែលឆ្នាំមុនជាប់ចំណាត់ថ្នាក់លេខ៤នោះពេលនេះបានក្លាយជាស្ដេចអុកចត្រង្គអង្គរសង្ក្រាន្ដប្រចាំឆ្នាំ២០១៦ បន្ទាប់ពីប្រកួតឈ្នះលោក សេង សុធា ក្នុងវគ្គផ្ដាច់ព្រ័ត្រនៅមុខប្រាសាទអង្គរវត្ដ កាលពីព្រឹកថ្ងៃទី១៦ មេសា កន្លងទៅថ្មីៗនេះ ។
លោក ហូយ សុខណា បានយកឈ្នះលោក ហេង សុធា ចំនួន២ក្ដារទល់នឹង១ក្តារដែលការប្រកួតតម្រូវឱ្យលេង៣ក្ដារ ហើយបើអ្នកណាឈ្នះ២ក្ដារជាប់គ្នានោះត្រូវចាត់ទុកជាអ្នកឈ្នះតែម្តង ។ ការប្រកួតនៅវគ្គផ្ដាប់ព្រ័ត្រនេះ បានប្រព្រឹត្តទៅក្រោមអធិបតីភាពលោករដ្ឋ្មន្ត្រីថោង ខុន ប្រធានគណៈកមា្មធិការជាតិអូឡាំពិកកម្ពុជា លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក សាយ សំអាល់ រដ្ឋមន្ដ្រីក្រសួងបរិស្ថាន និងមានការចូលរួមពីថ្នាក់ដឹកនាំជាច្រើនរូបទៀត ។
លោក ហូយ សុខណា គឺជាអ្នកនិយមចូលចិត្តលេងអុកមួយរូបដែលមានស្រុកកំណើតនៅភូមិឆ្លូង ឃុំឆ្លូង ស្រុកឆ្លូង ខេត្តក្រចេះ។ អ្វីដែលធ្វើឱ្យរូបលោករំភើបបំផុតនោះ គឺនៅពេលលោកមានឱកាសចូលរួមប្រកួតវគ្គជម្រុះជាមួយជើងខ្លាំងរហូតដល់ទៅ១២៨រូប ។ លោកសម្រេចចិត្តចូលរួមប្រកួតដោយមិនមានការរារែកឡើយ បើទោះជាត្រូវជួបប្រកួតជាមួយបេក្ខជនដែលសុទ្ធតែជាជើងខ្លាំងដូចជាស្ដេចអុក២ជំនាន់ឈាវ បូរ៉ា និងអ្នកលេងអុកប្រកបដោយល្បិចខ្ពស់ជាច្រើនរូបទៀត ដូចជាឆយ វីរ៉ា ស្ដេចអុកឆ្នាំ២០១០ គ្រួច ចិន្ដារិទ្ធជើងឯករងឆ្នាំ២០១៤ និងសុខ ភារ៉ា ជើងឯករងឆ្នាំ២០១៥ ខណៈរូបលោកធ្លាប់ជាប់ចំណាត់ថ្នាក់លេខ៤កាលពីឆ្នាំ២០១៥ប៉ុណ្ណោះ។ លោកកាន់តែមានសង្ឃឹមថែមទៀតនៅពេលលោកប្រជែងយកឈ្នះជើងខ្លាំងៗជាច្រើនរូបដើម្បីបានឡើងមកប្រកួតនៅក្នុងវគ្គ៨នាក់ចុងក្រោយនៅមុខប្រាសាទអង្គរវត្តបន្ទាប់មកបានបន្តយកឈ្នះកីឡាករ សេង សុធា នៅវគ្គផ្ដាច់ព្រ័ត្រដើម្បីគ្រងតំណែងជាស្ដេចអុកចត្រង្គអង្គរសង្ក្រាន្ដប្រចាំឆ្នាំ២០១៦។
សូមបញ្ជាក់ថា លោក ហូយ សុខណា អាយុ៤១ឆ្នាំ សព្វថ្ងៃជាអាជីវកររស់នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ បានក្លាយជាស្ដេចអុកចត្រង្គអង្គរសង្ក្រាន្ដប្រចាំឆ្នាំ២០១៦ ទទួលបានប្រាក់រង្វាន់សរុបចំនួន៣២លានរៀល ក្នុងនោះរង្វាន់របស់សម្ដេចតេជោសែន នាយករដ្ឋមន្ដ្រីនៃព្រះរាជាណាចក្រកម្ពុជា ចំនួន១២លានរៀល ។ ចំណាត់ថ្នាក់លេខ២ លោក សេង សុធា ទទួលបាន២០លានរៀល ក្នុងនោះរង្វាន់របស់សម្ដេចតេជោសែន ១២លានរៀល ។ ចំណាត់ថ្នាក់លេខ៣ លោក នូ ច័ន្ទផានិត ទទួលបាន១២លានរៀល ក្នុងនោះរង្វាន់របស់សម្ដេចតេជោសែន ៨លានរៀល និងចំណាត់ថ្នាក់លេខ៤ លោក រស់ រិទ្ធីយ៉ា ទទួលបានប្រាក់រង្វាន់លើកទឹកចិត្តចំនួន៦លានរៀលក្នុងនោះរង្វាន់របស់សម្ដេចតេជោសែន ៤លានរៀល ។ ចំណែកអ្នកជាប់ចំណាត់ថ្នាក់ពីលេខ៥ដល់លេខ៨ ទទួលបានប្រាក់រង្វាន់លើកទឹកចិត្តពីសំណាក់សម្ដេចតេជោសែន ម្នាក់ៗចំនួន២លានរៀលផងដែរ ៕
ចែករំលែកព័តមាននេះ