ខេត្ដកំពង់ស្ពឺ ៖ សង្ឃវ័យចំណាស់មួយអង្គបានទទួលអនិច្ចកម្មនៅលើរថយន្ដរត់ឈ្នួលមួយគ្រឿងពេលទៅដល់មុខវត្ដពេជ្រនិល ក្នុងឃុំត្រែងត្រយឹង ស្រុកភ្នំស្រួច ក្រោយពេលដែលសង្ឃអង្គនោះបានឆាន់អស់ស្រាបៀរក្រោនចំនួនពីរកំប៉ុងរួចមក ។ទាក់ទិននឹងករណីខាងលើនេះ មន្ដ្រីប៉ូលិសនៃអធិការដ្ឋានស្រុកភ្នំស្រួចបានឱ្យដឹងថា សង្ឃវ័យចំណាស់មានជន្មាយុ៨០ឆ្នាំ នេះពុំមានវត្ដគង់នៅពិតប្រាកដទេ បាននិមន្ដមកពីវត្ដប្រាក់សំបូរនៅជិតភ្នំព្រាបអ៊ិន ក្នុងឃុំតាំងស្យា ស្រុកភ្នំស្រួច ដែលគេបានស្គាល់ព្រះនាមថា លោកតាកែវ ភួង ក្នុងគោលបំណងនិមន្ដទៅវត្ដពេជ្រនិល ក្នុងឃុំត្រែងត្រយឹង ។ ប៉ុន្ដែមុនពេលនិមន្ដឡើងតាក់ស៊ី លោកតាកែវ ភួង បានទិញស្រាបៀរក្រោនចំនួន២កំប៉ុងដែលគេដាក់លក់នៅក្បែរវត្ដប្រាក់សំបូរនោះ ។ ពេលឆាន់ស្រាបៀរក្រោនអស់២កំប៉ុងហើយ លោកតាក៏ឡើងរថយន្ដឈ្នួ្ទលជិះសំដៅទៅវត្ដពេជ្រនិលតែម្ដង ។
លុះទៅដល់ចំណុចមុខវត្ដពេជ្រនិល អ្នកបើកបរក៏បញ្ឈប់រថយន្ដ ហើយសួរទៅលោកតា តែលោកតាកែវ ភួង បានលាចាកលោកទៅហើយដោយពុំដឹងជាទទួលអនិច្ចធម្មតាំងពីពេលណាមកទេ ។ ពេលដឹងថា លោកតាកែវ ភួង បានអនិច្ចធម្មហើយ អ្នកបើកបរថយន្ដឈ្នួលបានដឹកយកសពលោកតាត្រឡប់មកវត្ដប្រាក់សំបូរហៅភ្នំព្រាបអ៊ិនវិញដែលមានសាច់សាលោហិតរបស់លោកមកនាំសពបន្ដទៅវត្ដគិរីអណ្ដែតក្នុងឃុំធម្ម.តាអរ ស្រុកសំរោងទងវិញ ដើម្បី ធ្វើបុណ្យនៅស្រុកកំណើត ។មន្ដ្រីប៉ូលិសបាននិយាយថា ក្រោយពីបានធ្វើការត្រួតពិនិត្យសពលោកតារួចរាល់ហើយឃើញថា គ្មានរបួសស្នាមអ្វីដែលពាក់ព័ន្ធនឹងអំពើឃាតកម្មឡើយតែនេះពិតជាបណ្ដាលមកពីការសេពស្រាបៀរអស់២កំប៉ុងទើបសន្លប់ហើយទទួលអនិច្ចធម្មយ៉ាងស្ងៀមស្ងាត់លើរថយន្ដតែម្ដង ។
ចែករំលែកព័តមាននេះ