រាជធានីភ្នំពេញ ៖ ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានដាក់បទបញ្ជាដល់កម្លាំងការិយាល័យនគរបាលសណ្តាប់ធ្នាប់សាធារណៈ សហការជាមួយកម្លាំងអធិការដ្ឋាននគរបាលខណ្ឌទាំង១៤ ត្រូវបង្កើនការចេញពង្រឹងអនុវត្ត រៀបចំសណ្តាប់ធ្នាប់ នៅតាមបណ្តាផ្លូវនានា ក្នុងរាជធានីភ្នំពេញ ឲ្យមានរបៀបរយល្អ ក្នុងការជួយដោះស្រាយបញ្ហាកកស្ទះចរាចរណ៍ និងនាំមកនូវសុវត្ថិភាពចរាចរណ៍ ។
ការដាក់បទបញ្ជាជំរុញការចេញរៀបចំសណ្តាប់ធ្នាប់សាធារណៈ ពីសំណាក់លោកឧត្តមសេនីយ៍ឯក ស ថេត បានធ្វើឡើងនៅក្នុងកិច្ចប្រជុំបូកសរុបត្រួតពិនិត្យលទ្ធផលការងារសន្តិសុខ សណ្តាប់ធ្នាប់ សុវត្ថិភាពសង្គម របស់ស្នងការដ្ឋាននគរបាលរាជធានីភ្នំពេញប្រចាំខែតុលា និងលើកទិសដៅការងារបន្តសម្រាប់ខែវិច្ឆិកា តាមប្រព័ន្ធវីដេអូ ZOOM MEETNIG នៅព្រឹកថ្ងៃទី០៣ ខែវិច្ឆិកា ឆ្នាំ២០២១ ។
តាមការសង្កេត ខណៈប្រមុខរាជរដ្ឋាភិបាលកម្ពុជា ប្រកាសឲ្យបើកដំណើរការប្រទេសឡើងវិញលើគ្រប់វិស័យ ចាប់តាំងពីថ្ងៃទី០១ ខែវិច្ឆិកា ឆ្នាំ២០២១ គេមើលឃើញថា នៅរាជធានីភ្នំពេញ នឹងចាប់ផ្តើមមានបញ្ហាប្រឈមការកកស្ទះចរាចរណ៍ ដោយការធ្វើដំណើរយ៉ាងកកកុញរបស់ប្រជាពលរដ្ឋ ក្នុងការបំពេញភារកិច្ចការងារ ការប្រកបមុខរបររកស៊ី និងការចូលរៀនឡើងវិញរបស់សិស្ស និស្សិតជាដើម ។
លោកស្នងការ បានណែនាំឲ្យមានការអនុវត្តច្បាប់ ចំពោះមធ្យោបាយទាំងឡាយណា ដែលឈប់ចតលើទ្រូងផ្លូវខុសច្បាប់ ត្រូវស្ទូចនាំមកផាកពិន័យតាមច្បាប់ និងការចេញអនុវត្តជាប្រចាំ ដើម្បីធានាថា គោលដៅចុះរៀបចំសណ្តាប់ធ្នាប់នោះ វាស្អាតល្អបានយូរអង្វែងហើយ ពីព្រោះនេះ ជាការសំណូមពររបស់ប្រជាពលរដ្ឋ ដើម្បីឱ្យជួយដោះស្រាយទៅលើការរៀបចំសណ្តាប់ធ្នាប់នេះឱ្យបានល្អ ។
ជុំវិញការចេញដោះស្រាយបញ្ហាសណ្តាប់ធ្នាស់សាធារណៈ នេះផងដែរ លោកឧត្តមសេនីយ៍ត្រី សែម គន្ធា ស្នងការរងទទួលផែនការងារនគរបាលសណ្តាប់ធ្នាប់សាធារណៈ បានលើកឡើងថា កន្លងមកការងារនេះ កម្លាំងការិយាល័យនគរបាលណ្តាប់ធ្នាប់បានសហការជាមួយកម្លាំងតាមអធិការដ្ឋាននគរបាលខណ្ឌ ចុះរៀបចំសណ្តាប់ធ្នាប់នៅតាមបណ្តាផ្លូវមួយចំនួន ដែលមិនរៀបរយ ដូចជានៅម្តុំផ្សារអូរប្ញស្សី ខណ្ឌ៧មករា មហាវិថីម៉ៅសេទុង ខណ្ឌទួលគោក ម្តុំផ្សារសាំហាន់ ខណ្ឌប្ញស្សីកែវ និងបណ្តាផ្លូវខ្លះក្នុងខណ្ឌដូនពេញផងដែរ ។
ដោយកន្លងមក គោលដៅមួយកម្លាំងបានចុះរៀបចំបានល្អហើយ ប៉ុន្តែប្រៀបបានដូចវែកចក នៅពេលកម្លាំងសមត្ថកិច្ចដកថយ០២ ទៅ០៣ថ្ងៃក្រោយមក ក៏ប្រជាពលរដ្ឋនាំគ្នាមកលក់ដូរប្រកបមុខរបរនៅលើទ្រូងផ្លូវនេះឡើងវិញ ។
ប៉ុន្តែទោះបីយ៉ាងណា កម្លាំងការិយាល័យនគរបាលសណ្តាប់ធ្នាប់ និងចុះសហការជាមួយកម្លាំងតាមអធិការដ្ឋាននគរបាលខណ្ឌទាំង១៤ បន្តចុះអនុវត្តការងារនេះ ឲ្យមានប្រសិទ្ធភាព និងឲ្យចំទិសដៅ ៕
ចែករំលែកព័តមាននេះ