រាជធានីភ្នំពេញ ៖ ការប្រកួតអុកចត្រង្គអង្គរសង្ក្រាន្ដវគ្គជម្រុះចុងក្រោយបានឈានដល់ទីបញ្ចប់ហើយ កាលពីព្រឹកថ្ងៃទី៨ មេសា កន្លងមកនេះ នៅទីស្នាក់ការគណៈកម្មាធិការជាតិអូឡាំពិកកម្ពុជា ។ ឆ្លងកាត់ការប្រកួតយ៉ាងស្វិតស្វាញ
រាជធានីភ្នំពេញ ៖ ការប្រកួតអុកចត្រង្គអង្គរសង្ក្រាន្ដវគ្គជម្រុះចុងក្រោយបានឈានដល់ទីបញ្ចប់ហើយ កាលពីព្រឹកថ្ងៃទី៨ មេសា កន្លងមកនេះ នៅទីស្នាក់ការគណៈកម្មាធិការជាតិអូឡាំពិកកម្ពុជា ។ ឆ្លងកាត់ការប្រកួតយ៉ាងស្វិតស្វាញអស់រយៈពេលពេញមួយព្រឹកទីបំផុតគេបានរកឃើញជើងខ្លាំងចំនួន៨រូប ដែលត្រូវឡើងទៅប្រកួតនៅវគ្គផ្ដាច់ព្រ័ត្រឯខេត្តសៀមរាប ក្នុងថ្ងៃបុណ្យចូលឆ្នាំ ។ បេក្ខភាពទាំង៨រូបដែលមានមុខប្រកួតនៅវគ្គផ្ដាច់ព្រ័ត្រមាន លោករៀម វាសនា, ហូយ សុខណា, នូច័ន្ទ ផានិត, សៅ ម៉ិចសុភា, សេង សុធា, ហេង សៅឌី, រស់ រិទ្ធីយ៉ា និង ម៉េង សេរីសម្បត្តិ ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានមានប្រសាសន៍ផ្ដាំផ្ញើដល់កីឡាករទាំងអស់ត្រូវគោរពវិន័យឱ្យបានល្អ មិនឱ្យលេចឮពាក្យភ្នាល់ឡើយ។ ម្យ៉ាងវិញទៀត ប្រសិនបើគណៈកម្មការរៀបចំការប្រកួតចាប់ភស្ដុតាងបាននឹងឱ្យចាញ់ដោយស្វ័យប្រវត្តិ ។ លោកបានបញ្ជាក់ថា ការប្រកួតនេះគឺជាព្រឹត្តិការណ៍ជាតិ ហើយលោកនឹងត្រៀមប្រមូលផ្ដុំស្ដេចអុកគ្រប់ជំនាន់រៀបចំចងក្រងជាឯកសារសម្រាប់ផ្សព្វផ្សាយដល់បណ្ដាប្រទេសមួយចំនួនដូចជាវៀតណាមជាដើម ដើម្បីឱ្យគេមកប្រកួតនៅពេលដែលកម្ពុជាធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣ ។ សព្វថ្ងៃនេះ ប្រទេសថៃគេមានកីឡាករខ្លាំងៗច្រើនព្រោះគេដើរមុនយើង ប៉ុន្តែសម្រាប់ប្រទេស
មួយចំនួនទៀតដូចជាឡាវ និងភូមា គឺប្រហាក់ប្រហែលនឹងយើងដែរ ដូច្នេះក្នុងនាមជាម្ចាស់ផ្ទះយើងត្រូវតែដណ្ដើមមេដាយឱ្យបានច្រើន។ លោកបញ្ជាក់ថា ទម្រាំដល់ឆ្នាំ២០២៣ លោកអាចស្វែងរកអ្នកពូកែលេងអុកបានច្រើនតាមរយៈការផ្សព្វផ្សាយដល់មហាជនឱ្យចូលរួមទូលំទូលាយនៅតាមបណ្ដាខេត្តក្រុងទូទាំងប្រទេស ៕
ចែករំលែកព័តមាននេះ