រាជធានីភ្នំពេញ ៖ ក្នុងប៉ុន្មានថ្ងៃនេះ គេកត់សម្គាល់ថា កីឡាករ៤រូបបានបង្ហាញការត្រៀមខ្លួនដោយការតាំងចិត្តយ៉ាងខ្លាំង ដើម្បីឈានទៅប្រជែងយកជើងឯក និងចំណាត់ថ្នាក់លេខ៣នៅក្នុងព្រឹត្តិការណ៍Tiffy Fight នៅលើសង្វៀនទូរទស្សន៍ប៉ុស្ដិ៍លេខ៥ ។ កីឡាករពេជ្រ ម្ទេសខ្លាំង និង ឡូញ វ៉ាន់ឌី គឺជាបេក្ខភាព២រូបដែលមានឈ្មោះឡើងប្រជែងយកជើងឯកដូចគ្នានៅថ្ងៃអាទិត្យ ទី១០ មេសា សប្ដាហ៍នេះ ។
ក្នុងពេលជាមួយគ្នានេះ គេឃើញស្ថានីយទូរទស្សន៍ប៉ុស្ដិ៍លេខ៥ បានជួបសម្ភាសន៍ និងចុះថតផ្ទាល់ជាមួយសកម្មភាពហ្វឹកហាត់របស់បេក្ខភាព៤រូបចុងក្រោយយ៉ាងស្វិតស្វាញ ដោយកីឡាករម្នាក់ៗក្រៅពីស្ដែងឱ្យឃើញនូវការប្រឹងប្រែង ក៏បង្ហាញនូវឆន្ទះចង់អង្គុយកៅអីលេខ១ និងលេខ៣រៀងៗខ្លួនផងដែរ។ កីឡាករទាំង៤នោះរួមមាន ជើងខ្លាំងពេជ្រ ម្ទេសខ្មាំង មកពីក្លិបអារុណរះកីឡា កីឡាករយិន បូរិន មកពីក្លិបអាស៊ីកីឡា កីឡាករចាន់ គង់រាជ មកពីក្លិបតាព្រហ្មមានជ័យ និងកីឡាករឡូញ វ៉ាន់ឌី មកពីក្លិបពន្លឺវិបុលរិទ្ធី ។ នៅល្ងាចថ្ងៃអាទិត្យចុងសប្ដាហ៍នេះ អ្នកទាំង៤នឹងជួបប្រកួតគ្នាដោយអ្នកឈ្នះម្នាក់នឹងកាន់ពានជើងឯក ហើយអ្នកឈ្នះម្នាក់ទៀត នឹងទទួលបានចំណាត់ថ្នាក់លេខ៣ដើម្បីកុំឱ្យអន់ពេក ។ អ៊ីចឹងហើយទើបគេឃើញកីឡាករទាំង៤រូប សុទ្ធតែបានបង្ហាញនូវការត្រៀមខ្លួនដោយសារតែពួកគេសុទ្ធតែចង់ឈ្នះគ្នាក្នុងពេលដែលការប្រកួតទាំងមូលក៏មានអ្នកចាប់អារម្មណ៍លើសលប់ ព្រោះតែចាត់ទុកជាព្រឹត្តិការណ៍សំខាន់សម្រាប់ការប្រដាល់ ។
កីឡាករពេជ្រ ម្ទេសខ្មាំង នឹងជួបប្រកួតជាមួយកីឡាករ ឡូញ វ៉ាន់ឌី ដណ្ដើមយកជើងឯកបន្ទាប់២សប្ដាហ៍មុន ពួកគេសុទ្ធតែឈ្នះកីឡាករជាជើងខ្លាំងគឺ យិន បូរិន និងចាន់ គង់រាជ ទាំងលំបាក ។ រវាង២នាក់នេះ បើផ្អែកតាមភាពជាក់ស្ដែងកីឡាករពេជ្រ ម្ទេសខ្មាំងមានសន្ទុះខ្លាំងជាង ដោយសារតែការប្រកួតកន្លងមក គេមានថ្វីដៃល្អនិងមុតស្រួច ដែលមើលទៅគូប្រកួតរបស់គេទំនងមិនមែនជាដៃគូនោះទេ។ កីឡាករវ័យក្មេងរូបនេះធ្វើឱ្យអ្នកតាមដានយល់ថា នឹងកាន់ពានជើងឯកនៅប៉ុស្ដិ៍លេខ៥វគ្គនេះដោយមិនលំបាកនោះទេ ដោយសារតែយិន បូរិន មានថ្វីដៃល្អជាងឡូញ វ៉ាន់ឌី ផង ក៏នៅតែបានត្រឹមកំដររេញជាមួយពេជ្រ ម្ទេសខ្មាំង។ បើទោះជាកីឡាករឡូញ វ៉ាន់ឌី មានការត្រៀមទុកពីចម្ងាយ ប៉ុន្តែគេនៅតែមើលឃើញថាកីឡាកររូបនេះនៅមានបទពិសោធន៍ និងបច្ចេកទេសមិនទាន់ល្អដូចគ្នានឹងពេជ្រ ម្ទេសខ្មាំងនោះឡើយ ។ ម្យ៉ាងកីឡាករពេជ្រ ម្ទេសខ្មាំង ក៏បានអះអាងថា មានការត្រៀមខ្លួនពីចម្ងាយដូចគ្នាដែរ ដោយសារតែគេមិនចង់ជួបរឿងស៊យដូចកីឡាករឈាង ហុង ដែលមានជំនឿចិត្តថានឹងបានកាន់ពានកាលពីរដូវកាលមុន ប៉ុន្តែចុងក្រោយក៏ត្រូវកីឡាករជាគូប្រកួតវាយឲ្យរបូតឱកាសនៅក្នុងព្រឹត្តិការណ៍ជើងឯកស៊ីម៉ងត៍អូដ្ឋ។
មិនគិតរឿងត្រៀមទុកក្នុងការហ្វឹកហាត់ ក៏កីឡាករឡូញ វ៉ាន់ឌី នៅតែមានជំហររឹងប៉ឹងមិនដល់គូប្រកួតនោះដែរ ជាពិសេសសមត្ថភាពប្រើកែង ម៉ាត់ និងទាត់របស់គេនោះ។ ពេជ្រ ម្ទេសខ្មាំង គឺជាកីឡាករដែលមានអ្នកទុកចិត្តក្នុងភាគរយច្រើន ដោយក្នុងចំណោមកីឡាករដែលចូលប្រកួតតាំងពីដើមទីចំនួន៣២រូប គេមានក្រេឌីតល្អ ហើយបានឈានឡើងវគ្គផ្ដាច់ព្រ័ត្រមិនខុសពីការប៉ាន់ស្មាននោះឡើយ។ ការប្រកួតរបស់ពួកគេ នឹងចាប់ផ្ដើមឡើងនៅសង្វៀនជ្រោយចង្វាប៉ុស្ដិ៍លេខ៥ចាប់ពីម៉ោង៥ល្ងាចតទៅ ដោយមានការរំពឹងថា អ្នកទស្សនានឹងកកកុញសង្វៀនដោយសារតែអ្នកគាំទ្រសុទ្ធតែចង់ដឹងថារវាងពេជ្រ ម្ទេសខ្មាំង និងឡូញ វ៉ាន់ឌី ពិតជាកីឡាករល្បីជាងឈ្នះពាន ឬអាចជាកីឡាករស្រករក្រោយមានសំណាង។
ទោះបីយ៉ាងណា មិនមានន័យថាអ្នកខ្លាំងទើបឈ្នះនោះទេ ដោយសារការប្រកួតជាក់ស្ដែងវាត្រូវអាស្រ័យលើភាពចៃដន្យ និងសំណាងនៅក្នុងនោះដែរ។ ជាបទពិសោធន៍ កីឡាករខ្លះមានសមត្ថភាពតិចជាងគូប្រកួតទេ ប៉ុន្តែអាចធ្វើឲ្យជើងខ្លាំងបរាជ័យបាន បើចំណុចខ្សោយរបស់ជើងខ្លាំងត្រូវបានអ្នកខ្សោយចាប់បាន។ ម្យ៉ាង កីឡាករឡូញ វ៉ាន់ឌី មិនមែនជើងខ្សោយនោះទេ គេគ្រាន់តែល្បីឈ្មោះក្រោយបន្តិច និងមានបទពិសោធន៍លើរេញតិចជាងពេជ្រ ម្ទេសខ្មាំងតិចតួចប៉ុណ្ណោះ។ បើគេមិនល្អ គេមិនអាចឆ្លងផុតដំណាក់កាលតាំងពី៣២នាក់ ឈានដល់២នាក់ចុងក្រោយ ដើម្បីដណ្ដើមគ្នាយកជើងឯកនោះឡើយ ។ អ្នកគាំទ្ររបស់ ពេជ្រ ម្ទេសខ្មាំង មិនជឿថា គេនឹងភ្លាត់ស្នៀតសម្រាប់ការប្រកួតដ៏សំខាន់នៅថ្ងៃអាទិត្យ ប៉ុន្តែភាគីខាងឡូញ វ៉ាន់ឌី ក៏មិនជឿថា គេចាញ់ងាយៗក្រោមដៃគូប្រកួតនោះដែរ ។
សម្រាប់កីឡាករជើងខ្លាំង ចាន់ គង់រាជ គេត្រូវប៉ះគ្នាជាមួយយិន បូរិន ជារៀមច្បង ដណ្ដើមគ្នាយកលេខ៣ ។ រវាងអ្នកទាំងពីរ ម្នាក់វ័យក្មេងជើងខ្លាំង ហើយម្នាក់ទៀតជាជើងខ្លាំងវ័យជ្រេ និងល្បីឈ្មោះយូរហើយ។ យ៉ាងណាក៏ដោយកីឡាករចាន់ គង់រាជ ដូចជាមានអ្នកទុកចិត្តជាងបន្តិច ដោយសារតែក្រៅពីច្បាស់កែង ម៉ាត់ និងជង្គង់ ក៏មើលទៅរហ័សមិនធម្មតាផងដែរ ។
លោក សេង កដិកា អ្នករៀបចំការប្រកួតប្រចាំនៅប៉ុស្ដិ៍លេខ៥បានអះអាងថា ការប្រកួតនៅថ្ងៃអាទិត្យនេះ គឺជាការប្រកួតវគ្គបញ្ចប់ដែលរវាងពេជ្រ ម្ទេសខ្មាំង និងឡូញ វ៉ាន់ឌី នឹងមានម្នាក់អង្គុយតំណែងជើងឯក និងរវាងយិន បូរិន និងចាន់ គង់រាជ នឹងមានម្នាក់ឈរលេខ៣។ លោកថា ចំណាត់ថ្នាក់លេខ១ទទួលបានពានធំមួយ ថវិកា៤ពាន់ដុល្លារ លេខ២បាន២ពាន់ដុល្លារពានកិត្តិយសមួយ លេខ៣បាន៧៥០ដុល្លារអមដោយពានកិត្តិយសមួយ និងចំណាត់ថ្នាក់លេខ៤ទទួលបានតែ៥០០ដុល្លារ ។ លោកថា កីឡាករទាំង៤រូប មិនមានអ្នកណាមិនមានការត្រៀមទុកនោះទេ ដោយសារតែម្នាក់ៗសុទ្ធតែគិតថា នោះជាការប្រកួតដ៏សំខាន់លើកចុងក្រោយរបស់ព្រឹត្តិការណ៍ជើងឯក ។ ដោយឡែកនៅថ្ងៃសៅរ៍ទី៩ មេសា ចាប់ពីម៉ោង៥ល្ងាចនោះដែរ លោកថាក៏មានការប្រកួតជម្រុះជើងឯកសន្សំពិន្ទុនៅក្នុងព្រឹត្តិការណ៍ប្រដាល់ស៊ីម៉ង់ត៍អូដ្ឋជុំទី៣ក្នុងពូល ដើម្បីសម្រេចចុងក្រោយថា កីឡាករខ្មែរ ឬបរទេសនឹងបានឆ្លងពូលនោះផងដែរ ៕
ចែករំលែកព័តមាននេះ