ប្រទេសកូរ៉េខាងត្បូង ៖ សេដ្ឋកិច្ចកូរ៉េខាងត្បូងបានបង្ហាញសញ្ញារើបឡើងវិញពីខែកុម្ភៈកន្លងមក ប៉ុន្តែវានៅតែមាននិន្នាការមិនសូវល្អ និងបានកើនឡើងនូវហានិភ័យ ។ នេះបើតាមអនុរដ្ឋមន្ត្រីក្រសួងហិរញ្ញវត្ថុ
ប្រទេសកូរ៉េខាងត្បូង ៖ សេដ្ឋកិច្ចកូរ៉េខាងត្បូងបានបង្ហាញសញ្ញារើបឡើងវិញពីខែកុម្ភៈកន្លងមក ប៉ុន្តែវានៅតែមាននិន្នាការមិនសូវល្អ និងបានកើនឡើងនូវហានិភ័យ ។ នេះបើតាមអនុរដ្ឋមន្ត្រីក្រសួងហិរញ្ញវត្ថុ បានឲ្យដឹងកាលពីថ្ងៃទី៤ មេសា កន្លងមក ។
លោក Choi Sang-mok អនុរដ្ឋមន្ត្រីក្រសួងហិរញ្ញវត្ថុ ថ្លែងថា ៖ « យើងឃើញថា សេដ្ឋកិច្ចជាតិមានដំណើរការយ៉ាងត្រដាបត្រដួសនៅត្រីមាសទី១ ខណៈការជះឥទ្ធិពលនៃគោលនយោបាយដំណាច់ឆ្នាំមិនធ្វើឲ្យមានកំណើនសេដ្ឋកិច្ចឡើយ ។ ប៉ុន្តែយើងកត់សម្គាល់ឃើញថា នៅចុងត្រីមាសទី១ឆ្នាំនេះ មានសញ្ញារើបឡើងវិញ ជាពិសេស នៅខែកុម្ភៈតែម្តង ។ ទោះជាយ៉ាងណា វាពិតជាពិបាកណាស់ដែល និយាយថា សេដ្ឋកិច្ចរបស់យើងមាននិន្នាការរើបឡើងវិញនោះ » ។
លោកបន្តថា ៖ « រដ្ឋាភិបាលក៏បានទទួលស្គាល់ពីភាពផុយស្រួយនៃការរើបឡើងវិញនៃសេដ្ឋកិច្ចជាតិដែរ ប៉ុន្តែរដ្ឋាភិបាលមិនទាន់មានផែនការពិនិត្យកែប្រែឡើងវិញសម្រាប់ការព្យាកររបស់ខ្លួននៅឆ្នាំនេះ ដែលមានអត្រា៣,១% ទេ។ ជាក់ស្តែង ក្រសួងហិរញ្ញវត្ថុនឹងចុះផ្សាយពីការព្យាករសេដ្ឋកិច្ចនៅពាក់កណ្តាលឆ្នាំនេះ » ។
ទោះជាយ៉ាងណា ធនាគារជាតិកូរ៉េខាងត្បូង គ្រោងនឹងពិនិត្យកែប្រែការព្យាករនៅដំណាច់ខែនេះ និងត្រូវបានគេរំពឹងថា អាចនឹងកាត់បន្ថយអត្រាកំណើនសេដ្ឋកិច្ចរបស់ខ្លួន៣% ខណៈទេសាភិបាលបានឲ្យដឹងកាលពីសប្តាហ៍មុនថា កំណើនផលិតផលក្នុងស្រុកសរុបនៅឆ្នាំនេះ ហាក់ដូចជាធ្លាក់ចុះក្រោមអត្រា៣%ទៅទៀត ។
លោក Choi Sang-mok បន្ថែមថា ៖ « យោបល់របស់រដ្ឋមន្ត្រីហិរញ្ញវត្ថុកាលពីដើមឆ្នាំនេះ គឺរដ្ឋាភិបាលប្រហែលនឹងប្រកាសផ្លាស់ប្តូរមួយចំនួនទៅលើការគ្រប់គ្រងមូលធនរបស់ខ្លួន ដែលមានស្រាប់នៅដំណាច់ខែមិថុនានេះ ក្នុងករណីលទ្ធភាពនៃការលំហូរទុន ។ ជាមួយគ្នានេះ ការឡើងចុះនៃទីផ្សារហិរញ្ញវត្ថុសកល គឺមិនមែនជាបញ្ហារបស់កូរ៉េខាងត្បូងតែម្នាក់ឯងឡើយ ខណៈមន្ត្រីរដ្ឋាភិបាលកំពុងតែឃ្លាំមើលការអភិវឌ្ឍផងដែរ » ។
លោកអនុរដ្ឋមន្ត្រីបញ្ជាក់ថា ៖ « ទីផ្សារអចលនទ្រព្យហាក់គ្មានការប្រែប្រួលអ្វីខ្លាំងឡើយ បន្ទាប់ពីរដ្ឋាភិបាលបានដាក់គោលនយោបាយមួយចំនួនកាលពីឆ្នាំ២០១៥ ដើម្បីសា្តរស្ថានភាពទីផ្សារលំនៅឋានឡើងវិញ » ៕
ចែករំលែកព័តមាននេះ