រាជធានីភ្នំពេញ ៖ សាលាអន្តរជាតិ សឹង្ហបុរី (SIS) បានរៀបចំព្រឹត្តិការណ៍ តាំងបង្ហាញម្ហូប និងបង្អែមខ្មែរជាច្រើនមុខ នៅក្នុងពិធីអបអរសាទរបុណ្យចូលឆ្នាំប្រពៃណីជាតិខ្មែរខាងមុខ និងមានការសម្ដែងរបាំប្រពៃណីទាក់ទង
រាជធានីភ្នំពេញ ៖ សាលាអន្តរជាតិ សឹង្ហបុរី (SIS) បានរៀបចំព្រឹត្តិការណ៍ តាំងបង្ហាញម្ហូប និងបង្អែមខ្មែរជាច្រើនមុខ នៅក្នុងពិធីអបអរសាទរបុណ្យចូលឆ្នាំប្រពៃណីជាតិខ្មែរខាងមុខ និងមានការសម្ដែងរបាំប្រពៃណីទាក់ទងនឹងពិធីបុណ្យចូលឆ្នាំខ្មែរផងដែរ ។ ពិធីនេះធ្វើឡើងកាលពីព្រឹកថ្ងៃទី០២ មេសា ២០១៦ នៅសាសាអន្តរជាតិ សឹង្ហបុរី ។
តំណាងសាលាអន្តរជាតិ សឹង្ហបុរី បានឱ្យដឹងថា ជារៀងរាល់ឆ្នាំ សាលាអន្តរជាតិតែងតែរៀបចំអោយសិស្សានុសិស្ស លោកគ្រូអ្នកគ្រូដឹកនាំ ទាំងផ្នែកចំណេះដឹងទូទៅខ្មែរ ផ្នែកភាសាអង្គគ្លេស ទាំងពីរសាខា បានចូលរួមប្រកួតប្រជែងក្នុងការតាំងពិព័រណ៍ ម្ហូបអាហារខ្មែរ និងបង្អែមជាតិ ដោយមានម្ហូបខ្មែរ ចំនួន៦៦មុខ និង បង្អែមខ្មែរចំនួន៦៦ផងដែរ ។
តំណាងសាលារូបនេះ បន្តថា កម្មវិធីនេះធ្វើឡើងក្នុងគោលបំណង ដើម្បីលើកទឹកចិត្តដល់លោកគ្រូអ្នកគ្រូ និងសិស្សានុសិស្សទាំងអស់ ដែលស្រឡាញ់មុខវិជ្ជាធ្វើម្ហូបខ្មែរ និងបង្អែមជាតិ និងបង្កើតនូវឱកាសសប្បាយរីករាយដល់សិស្ស និង បុគ្គលិកក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខ ក៏ដូចជាពង្រឹងនូវភាពសាមគ្គីភាព រវាងលោកគ្រូអ្នកគ្រូ សិស្សនុសិស្ស បុគ្គលិក និងទទួលនូវពរជ័យឆ្នាំថ្មី ឆ្នាំវក ឱ្យបានសុខសប្បាយទាំងអស់គ្នា ។
នៅក្នុងនោះដែរ លោកស្រីបណ្ឌិត ងឿន ផល្លីនពោធិតា នាយិកាសាលាអន្តរជាតិ សឹង្ហបុរី (SIS) ក៏បានចូលរួម និងទស្សនានូវមុខម្ហូបជាច្រើន ដាក់តាំងនៅក្នុងពិធីនោះ ដែលជាស្នាដៃរបស់សិស្ស និងលោកគ្រូអ្នកគ្រូ នៅក្នុងសាលាអន្តរជាតិ សឹង្ហបុរី ។
លោកស្រីបណ្ឌិត មានប្រសាសន៍ថា លោកស្រីពិតជាមានសេចក្តីរំភើប និងសប្បាយរីករាយណាស់ ដែលបានឃើញ សិស្សានុសិស្ស និងលោកគ្រូ អ្នកគ្រូ សហការគ្នា ក្នុងការរៀបចំមុខម្ហូបជាច្រើន មកដាក់តាំងបង្ហាញនាឱកាសពេលនេះ ។ នេះជាការបង្ហាញពីការសាមគ្គីភាពគ្នារវាង គ្រូ និងសិស្សហើយក៏ជាការបង្កើនទំនាក់ទំនងរវាងគ្រូ និងសិស្សផងដែរ ៕
ចែករំលែកព័តមាននេះ