ប្រទេសមីយ៉ាន់ម៉ា ៖ វិស័យទេសចរណ៍នឹងកើនឡើងខ្លាំងនៅឆ្នាំខាងមុខ នេះគួរតែអរគុណដល់ស្ថិរភាពនយោបាយរបស់មីយ៉ាន់ម៉ា ក្រោយការបោះឆ្នោតជ្រើសរើសរដ្ឋាភិបាលកាលពីខែវិច្ឆិកាកន្លងមក ។ នេះបើតាមក្រសួងទេសចរណ៍ និងសណ្ឋាគារមីយ៉ាន់ម៉ា ។
ក្រសួងទេសចរណ៍បានព្យាករថា ចំនួនភ្ញៀវទេសចរអន្តរជាតិនឹងកើនឡើង៦លាននាក់នៅក្នុងឆ្នាំ២០១៦នេះ ពោលគឺលើសកាលពីឆ្នាំមុន ដែលមានត្រឹមតែ៤,៦៨លាននាក់ប៉ុណ្ណោះ ។
លោករដ្ឋមន្ត្រី Htay Aung បានប្រាប់មីយ៉ាន់ម៉ាថែមស៍ កាលពីថ្ងៃទី១៨ មីនា ថា ៖ « លោកមានជំនឿថា វិស័យទេសចរណ៍នឹងកើនឡើង២៥% នៅក្នុងឆ្នាំនេះ ។ ពួកយើងនឹងរង់ចាំស្វាគមន៍ភ្ញៀវទេសចរចំនួន៦លាននាក់ក្នុងឆ្នាំនេះ ប្រសិនបើស្ថានភាពទេសចរណ៍អាចរក្សាជំហររបស់ខ្លួនជាមួយនឹងនិរន្តរភាព និងស្ថិរភាពរបស់មីយ៉ាន់ម៉ា។ វិស័យទេសចរណ៍ គឺជាវិស័យដ៏សំខាន់របស់មីយ៉ាន់ម៉ា » ។
ចំណែកអគ្គនាយកគ្រប់គ្រងក្រុមហ៊ុនទេសចរណ៍ Mandalay លោក Khin Zaw ថ្លែងថា ៖ « មីយ៉ាន់ម៉ាគួរតែអភិវឌ្ឍន៍ហេដ្ឋារចនាសម្ព័ន្ធរបស់ខ្លួនរួមមាន ព្រលានយន្តហោះ និងធនធានមនុស្សផងដែរ មុនពេលមានកំណើនបដិសណ្ឋារកិច្ចដ៏ច្រើននៅព្រលានយន្តហោះ » ។
« តាមរយៈបទពិសោធន៍លើវិស័យទេសចរណ៍រយៈពេល២៨ឆ្នាំរបស់ខ្ញុំ គឺយើងមិនទាន់មានសមត្ថភាពគ្រប់គ្រាន់សម្រាប់ទាក់ទាញភ្ញៀវទេសចរទាំង៦លាននាក់នោះនៅឡើយទេ។ ដូច្នេះ យើងត្រូវបន្ថែមមន្ត្រីអន្តោប្រវេសន៍ និងជ្រើសរើសមគ្គទេសក៍ទេសចរណ៍មកហ្វឹកហាត់បន្ថែមទៀត និងត្រូវធ្វើឲ្យប្រសើរឡើងផ្នែកសណ្ឋាគារផងដែរ ជាជាងការផ្តោតទៅលើចំនួនភ្ញៀវទេសចរ ។ ម្យ៉ាងទៀត ក្រសួងគួរតែយកចិត្តទុកដាក់លើការទាក់ទាញភ្ញៀវទេសចរបន្ថែមក្នុងរដូវកាលដែលភ្ញៀវទេសចរធ្លាក់ចុះទាប ចាប់ពីខែឧសភា ដល់ខែកញ្ញា » ។ នេះបើតាមប្រសាសន៍របស់លោក Khin Zaw ។
លោកបញ្ជាក់ទៀតថា ៖ « យើងត្រូវតែបង្កើតទីផ្សារទេសចរណ៍ឱ្យបានពេញមួយឆ្នាំ ដើម្បីកាត់បន្ថយគម្លាតតម្លៃនៅក្នុងរដូវកាលទេសចរណ៍ធ្លាក់ទាប ។ វិស័យទេសចរណ៍មីយ៉ាន់ម៉ា គឺមានតម្លៃថ្លៃខ្លាំងណាស់សម្រាប់ភ្ញៀវទេសចរ » ។
លោកក៏បានជំរុញដល់រដ្ឋាភិបាលសម្ព័ន្ធដើម្បីប្រជាធិបតេយ្យផងដែរ ក្នុងការផ្តោតទៅលើការអភិវឌ្ឍវិស័យទេសចរណ៍ដែលមានប្រយោជន៍ដល់សហគមន៍ ។ ជំហានសំខាន់បំផុត គឺតែងតាំងរដ្ឋមន្ត្រីម្នាក់ដែលពោរពេញទៅដោយបទពិសោធន៍ ។
បើតាមប្រសាសន៍របស់លោកស្រី Daw Aye Sandar អ្នករៀបចំប្រតិបត្តិការទេសចរណ៍ និងជាអគ្គនាយកនៃក្រុមហ៊ុន Mother Irrawaddy ថ្លែងថា ៖ « ខ្ញុំជឿជាក់ថា នៅឆ្នាំនេះនឹងមានភ្ញៀវទេសចរចំនួន៦លាននាក់ ដោយសារតែស្ថិរភាពនយោបាយរបស់មីយ៉ាន់ម៉ាល្អប្រសើរ ហើយរដ្ឋាភិបាលថ្មីនឹងអនុវត្តគោលនយោបាយល្អបំផុតសម្រាប់វិស័យទេសចរណ៍នេះ » ៕
ចែករំលែកព័តមាននេះ