បុរសម្នាក់បានរងការបា.ញ់ប្រហារពីភាគីជាខ្មាញ់កាំភ្លើង បណ្តាលរងរបួសធ្ងន់ ហើយត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ដោយសារផ្តើមចេញពីរឿងគ្រោះថា្នក់ចរាចរណ៍បន្តិចបន្តួចនៅក្នុងមជ្ឈមណ្ឌលកោះពេជ្រ ទល់មុខនឹងសាលា
រាជធានីភ្នំពេញ ៖ បុរសម្នាក់បានរងការបាញ់ប្រហារពីភាគីជាខ្មាញ់កាំភ្លើង បណ្តាលរងរបួសធ្ងន់ ហើយត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ដោយសារផ្តើមចេញពីរឿងគ្រោះថា្នក់ចរាចរណ៍បន្តិចបន្តួចនៅក្នុងមជ្ឈមណ្ឌលកោះពេជ្រ ទល់មុខនឹងសាលាអន្តរជាតិ «ស្កូល» ស្ថិតក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង៨និង៣០នាទីយប់ថ្ងៃទី២៩ ខែតុលា ឆ្នាំ២០២១
ជនរងគ្រោះត្រូវបានអោយស្គាល់ឈ្មោះថា ស៊ុំ ពិសិដ្ឋ ភេទប្រុស អាយុ៣៨ឆ្នាំ មុខរបរបើករថយន្តតាក់ស៊ី ស្នាក់នៅបុរីហុកឆេង ស្ថិតក្នុងសង្កាត់ដង្កោ ខណ្ឌដង្កោ ដោយជិះរថយន្ដម៉ាកតូយូតាព្រុស ពណ៌ទឹកប្រាក់ ពាក់ស្លាកលេខ ភ្នំពេញ 2AY 3468 ជាមធ្យោបាយ រងរបួសភ្លៅខាងស្តាំ និងខាងឆ្វេងបញ្ឆិតនឹងប្រដាប់.ភេទ ។ ដោយឡែកខ្មាញ់កាំភ្លើងវិញមិនទាន់ស្គាល់អត្តសញ្ញាណទេ គ្រាន់តែដឹងថា ភេទប្រុស ជិះរថយន្តម៉ាកតូយូតាព្រុស មួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2AW 1458 បន្ទាប់ពីបាញ់ប្រហារជនរងគ្រោះហើយ ក៏បានរត់គេចខ្លួនបាត់ស្រមោលតែម្តង ។
យោងតាមប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេបានឃើញបុរសជាជនរងគ្រោះបានបើករថយន្តម៉ាក តូយូតាព្រុស ពណ៌ទឹកប្រាក់ មួយគ្រឿង ធ្វើដំណើរចូលតាមស្ពានឥន្ទធនូ ទៅក្នុងមជ្ឈមណ្ឌលកោះពេជ្រ គាប់ជួនពេលនោះក៏ស្រាប់តែមានបុរសម្នាក់ទៀតជាខ្មាញ់កាំភ្លើង បានបើករថយន្តម៉ាក តូយូតាព្រុស ដូចគ្នា ក្នុងទិសដៅស្របគ្នា ហើយបត់ឆ្វេង ក៏ជ្រុលទៅកៀររថយន្តរបស់ជនរងគ្រោះ បណ្តាលអោយបាក់កញ្ចក់មើលក្រោយចំហៀងខាងឆ្វេង ។
ប្រភពដដែលបន្តថា ក្រោយពេលកើតហេតុរួច រថយន្តបង្កក៏ព្យាយាមបើករថយន្តចេញ តែត្រូវជនរងគ្រោះបានបើករថយន្តដេញតាមកាក់ជាប់នៅកន្លែងកើតហេតុ ក្រោយមកក៏ចុះពីលើរថយន្ត ហើយក៏មានការទាស់ពាក្យសម្ដីគ្នាបន្តិចបន្តួច រហូតធ្វើឱ្យជនបង្កដកកាំភ្លើងខ្លី រួចបាញ់ប្រហារទៅលើជនរងគ្រោះចំនួន៥គ្រាប់ បណ្ដាលអោយត្រូវជនរងគ្រោះចំនួន២គ្រាប់ ចំភ្លៅក្រលៀនខាងស្តាំ១គ្រាប់ និងមួយគ្រាប់ទៀតចំបញ្ឆិតនឹងប្រដាប់១គ្រាប់ បណ្ដាលឲ្យដេកដួលនៅលើចិញ្ចើមផ្លូវរងរបួសធ្ងន់ ចំណែកជនបង្កដែលជាខ្មាញ់កាំភ្លើងវិញ ក៏បានបើករថយន្តរត់គេចខ្លួនបាត់ស្រមោលតែម្តងទៅ ។
ក្នុងហេតុការណ៍ខាងលើនេះដែរ លុះបន្តិចក្រោយក៏មានការភ្ញាក់ផ្អើលដល់សមត្ថកិច្ចមូលដ្ឋាន ក៏ដូចជាកម្លាំងកងរាជអាវុធហត្ថខណ្ឌចំការមន ចុះទៅកន្លែងកើតហេតុ ព្រមទាំងបានទាក់ទងរថយន្ដសង្គ្រោះអោយមកដឹកជនរងគ្រោះយកទៅព្យាបាលនៅគ្លីនិកឯកជនភ្លាមៗផងដែរ ។
បើតាមសមត្ថកិច្ចបានអោយដឹងថា ករណីខាងលើនេះ គឺផ្ដើមចេញមុនដំបូង ដោយសាររថយន្ត២គ្រឿង គឺជនរងគ្រោះជិះរថយន្តតូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ ២AY- ៣៤៦៨ បើកក្នុងកោះពេជ្រ ហើយក៏មានរថយន្ត១គ្រឿងទៀតម៉ាកតូយូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ ២AW-១៤៥៨ ស្រវឹងស្រាបើកមកកៀររថយន្តបុរសជនរងគ្រោះ បណ្ដាលបាក់កញ្ចក់រថយន្តខាងឆ្វេង ហើយក៏បានឈប់សម្របសម្រួលគ្នាដែរ តែភាគីខាងរងគ្រោះទាមទារថ្លៃខូចខាតរថយន្តចំនួន៥០ដុល្លារ ចំណែកជនបង្កអោយតែ១០ដុល្លារ រួចក៏ឡើងឡានបើកបន្តដំណើរទៅមុខទៀត ។
សមត្ថកិច្ចបន្តថា ចំណែកជនរងគ្រោះវិញក៏បានបើករថយន្តដេញតាម និងបានបើករថយន្តទៅកាក់ខាងមុខ ដើម្បីអោយបុរសបើករថយន្តបង្កនោះបើកទ្វារចុះពីរថយន្ត ដើម្បីសម្រួលគ្នាទៀត ទើបកើតចេញជាជម្លោះ រហូតដល់ជនបង្កបានចូលទៅក្នុងរថយន្តរួចយកកាំភ្លើងបាញ់បុរសជនរងគ្រោះចំនួន៥គ្រាប់ តែត្រូវជនរងគ្រោះតែ២កន្លែង ធ្វើឱ្យរបួសលើភ្លៅខាងស្តាំ និងខាងឆ្វេង និងបញ្ឆិតប្រដាប់.ភេទ បណ្ដាលជនរងគ្រោះដេកដួលនៅថ្នល់ ហើយជនបង្កក៏បើករថយន្តគេចពីកន្លែងកើតហេតុ ដោយយករថយន្តប្លុងចោលនៅម្ដុំសាលាក្រុងបរិវេណក្នុងកោះពេជ្រដដែល រួចក៏រត់គេចខ្លួនបាត់ស្រមោលតែម្តង ។
បន្ទាប់ពីបញ្ជូនជនរងគ្រោះទៅសង្គ្រោះហើយ សមត្ថកិច្ចក៏បានរកឃើញសំបកកន្ទុះចំនួន៥គ្រាប់ ជាមួយនឹងរថយន្តរបស់ជនរងគ្រោះ រួចយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរង់ចាំសមត្ថកិច្ចធ្វើការស្រាវជ្រាវ និងឈានទៅរកចាប់ខ្លួនជនបង្ក មកចាត់ការតាមផ្លូវច្បាប់ផងដែរ ។
ក្នុងនោះផងដែរ សមត្ថកិច្ចក៏បានធ្វើការស្រាវជ្រាវរយៈពេលជិត៤ម៉ោង ទើបរកឃើញរថយន្តដែលគេស្គាល់ស្លាកលេខ ហើយត្រូវជនបង្កជិះយកទៅទុកប្លុងចោលជិតផ្សារស៊ីធីម៉ល ក្នុងមជ្ឈមណ្ឌលកោះពេជ្រ ទើបកម្លាំងសមត្ថកិច្ចមូលដ្ឋាន ធ្វើការស្ទូចយករថយន្តបង្កទៅរក្សាទុកនៅប៉ុស្តិ៍នគរបាលរដ្ឋបាលទន្លេបាសាក់ ដើម្បីធ្វើការស្រាវជ្រាវបន្តទៀត ៕
ចែករំលែកព័តមាននេះ