ប្រទេសវៀតណាម ៖ ប្រាក់ចំណូលសរុបនៅត្រីមាសទី១ដើមឆ្នាំនេះ មានចំនួន២៣០,៥ទ្រីលានដុង (១០,៣ប៊ីលានដុល្លារ) ស្មើនឹង២២,៧% នៃគោលដៅប្រាក់ចំណូលសរុបនៅឆ្នាំនេះ ។ មិនតែប៉ុណ្ណោះ វាបានកើនឡើង០,៣% បើធៀបនឹងរយៈពេលដូចគ្នាកាលពីឆ្នាំមុន ។ នេះបើតាមប្រសាសន៍របស់អ្នកគ្រប់គ្រងការិយាល័យ លោក Ngo Chi Tung ប្រចាំក្រសួងហិរញ្ញវត្ថុ ។
ក្នុងចំណោមប្រាក់ចំណូលសរុបសម្រាប់ត្រីមាសទី១ ប្រាក់ចំណូលក្នុងស្រុកសរុបមានចំនួន១៩៤ទ្រីលានដុង (៨,៧ប៊ីលានដុល្លារ) ឬស្មើនឹង២៤,៧% នៃការព្យាករប្រាក់ចំណូលប្រចាំឆ្នាំ និងមានអត្រាខ្ពស់ជាង១០% បើធៀបនឹងរយៈពេលដូចគ្នាកាលពីឆ្នាំមុន ។ ប៉ុន្តែក្រសួងហិរញ្ញវត្ថុឲ្យដឹងថា ការព្យាករនៃប្រាក់ចំណូលដែលបានមកពីការនាំចេញប្រេងឆៅ មានទឹកប្រាក់៩ទ្រីលានដុង ហើយមានអត្រាត្រឹមតែ១៦,៤%ប៉ុណ្ណោះ ដែលតិចជាងពាក់កណ្តាលនៃប្រាក់ចំណូលសរុប បើធៀបនឹងរយៈពេលដូចគ្នា កាលពីក្នុងឆ្នាំ២០១៥ ។
លោក Ngo Chi Tung ឲ្យដឹងទៀតថា ៖ « សកម្មភាពនាំចេញ នាំចូលមានទឹកប្រាក់ចំនួន៥៤,៦ទ្រីលានដុងនៃថវិកាសរុប ស្មើនឹងអត្រា១១,៥% ទាបជាងបើធៀបនឹងរយៈពេលដូចគ្នាកាលពីឆ្នាំមុន និងស្មើនឹង២០,២% នៃប្រាក់ចំណូលដែលបានព្យាករ » ។ លោកថា ៖ « លទ្ធផលនៃប្រាក់ចំណូលនាត្រីមាសទី១នេះ ដោយសារតែទំនាក់ទំនងយ៉ាងជិតស្និទ្ធ និងមានប្រសិទ្ធភាពរវាងអាជ្ញាធរក្នុងស្រុកដែលបានពង្រឹងវិធានការប្រមូលថវិកា និងពន្ធនៅដើមឆ្នាំនេះ ដើម្បីការពារប្រាក់ពន្ធដែលមិនទាន់បង់នៅត្រឹមពាក់កណ្តាល និងនៅដំណាច់ឆ្នាំនេះ » ។
ក្រសួងហិរញ្ញវត្ថុបានឲ្យដឹងថា ការចំណាយថវិកាសរុបនៅត្រីមាសទី១ ស្មើនឹង២៧៧,៥ទ្រីលានដុង ឬស្មើនឹង២២%នៃគោលដៅគ្រោងចំណាយនៅឆ្នាំនេះ និងកើនឡើង៥,៤% បើធៀបនឹងរយៈពេលដូចគ្នាកាលពីឆ្នាំមុន ។ ក្នុងនោះដែរ ការចំណាយលើសកំណត់មានទឹកប្រាក់ប្រមាណ៤៧ទ្រីលានដុង ឬស្មើនឹង១៨,៥% នៃការព្យាករសរុប។
ជាផ្នែកមួយនៃការប្រមូលទុនថវិការដ្ឋ ដែលបានចេញផ្សាយដោយក្រសួងហិរញ្ញវត្ថុ កាលពីថ្ងៃទី២៥ មីនា គឺមានចំនួន៧០ទ្រីលានដុងនៃបំណុលរបស់រដ្ឋាភិបាលសម្រាប់ទូទាត់ការចំណាយថវិកាលើសកំណត់ និងគ្របដណ្តប់ការចំណាយសម្រាប់ការវិនិយោគ និងការអភិវឌ្ឍ ៕
ចែករំលែកព័តមាននេះ