រាជធានីភ្នំពេញ ៖ ជារៀងរាល់ឆ្នាំ សមាជិករបស់សមាគមអ្នកសាងសង់កម្ពុជា តែងតែរៀបចំពិធីជួបជុំយ៉ាងហោចណាស់ក៏បីដងដែរក្នុងមួយឆ្នាំ ដើម្បីផ្លាស់ប្តូរយោបល់ និងធ្វើធុរកិច្ចរវាងគ្នានិងគ្នា ក្នុងគោលបំណងជំរុញឱ្យវិស័យសំណង់នៅកម្ពុជាកាន់តែមានការរីកចម្រើនជាបន្តបន្ទាប់ ។ ក្នុងនោះដែរ សមាគមអ្នកសាងសង់កម្ពុជា ក៏តែងតែរៀបចំព្រឹត្តិការណ៍តាំងបង្ហាញពិព័រណ៍នៅរៀងរាល់ចុងឆ្នាំ ដើម្បីឱ្យក្រុមហ៊ុនសំណង់ដែលជាសមាជិក និងក្រុមហ៊ុនសំណង់អន្តរជាតិអាចបង្ហាញពីផលិតផល និងសេវាកម្មរបស់ខ្លួនឱ្យគ្នាទៅវិញទៅមកផងដែរ ។
លោកឧកញ៉ា ពុង ឃាវសែ ប្រធានសមាគមអ្នកសាងសង់កម្ពុជា បានថ្លែងទៅកាន់សមាជិកនៅក្នុងពិធីជួបជុំមួយកាលពីរាត្រីថ្ងៃទី៣០ មីនា នៅភោជនីយដ្ឋានទន្លេបាសាក់២ ថា ៖ « ការជួបជុំសមាជិករបស់សមាគមអ្នកសាងសង់កម្ពុជានៅពេលនេះ គឺជាលើកទី៥ហើយក្នុងគោលបំណងរកផលប្រយោជន៍ជូនសមាជិក និងផ្ដល់ឱកាសឱ្យសមាជិកសមាគម ម្ចាស់គម្រោងសាងសង់ធំៗ អ្នកផ្គត់ផ្គង់សម្ភារបរិក្ខារ ឧបករណ៍ និងគ្រឿងចក្រសំណង់ ជាពិសេស អ្នកវិនិយោគ និងអភិវឌ្ឍន៍វិស័យសំណង់ទាំងអស់មានឱកាសបានជួបជុំសំណេះសំណាលពិភាក្សា និងទំនាក់ទំនងធុរកិច្ចជាមួយគ្នាផ្ទាល់ » ។
លោកឧកញ៉ាបន្តថា ៖ « វិស័យសំណង់រីកលូតលាស់ទៅបាន ក៏ត្រូវអាស្រ័យលើរដ្ឋាភិបាលបង្កបរិយាកាសសម្រាប់អ្នកវិនិយោគដែរ ដូចជាស្ថិរភាពនយោបាយ ស្ថិរភាពសេដ្ឋកិច្ចជាដើម ហើយបន្តមកទៀត គឺត្រូវកៀរគរវិនិយោទុនក្រៅស្រុកឱ្យមកបណ្ដាក់ទុនក្នុងប្រទេសកម្ពុជា។ រហូតមកទល់ពេលនេះ តាមស្ថិតិក្រៅផ្លូវការមួយ គឺទុនក្នុងវិស័យសំណង់សរុបរបស់កម្ពុជាមានប្រមាណជាង៣ពាន់លានដុល្លារអាមេរិកក្នុងឆ្នាំ២០១៥ ។ បើសង្កេតមើលក្នុងចំណោមនោះ មានទុនមកពីក្រៅច្រើនជាងទុនក្នុងស្រុក ដោយសារតែវិនិយោគិនក្រៅស្រុក គេសម្លឹងមើលអគារខ្ពស់ៗចាប់ពី២០ជាន់ ដល់ជាង៥០ជាន់ » ។
ក្នុងវិស័យសំណង់នេះដែរ ក៏បានជួយផ្ដល់ការងារជាច្រើនដល់ប្រជាពលរដ្ឋកម្ពុជា ដោយត្រូវការចាប់ពីកម្មករដល់វិស្វករផងដែរ និងអាចឱ្យប្រជាពលរដ្ឋទទួលបានប្រាក់កម្រៃសមរម្យ សម្រាប់ផ្គត់ផ្គង់ក្នុងជីវភាពប្រចាំថ្ងៃ ។ លោកឧកញ៉ាលើកឡើងថា ៖ « យើងមិនដឹងពីចំនួនពិតប្រាកដថា វិស័យសំណង់កម្ពុជាជួយផ្ដល់ការងារជូនពលរដ្ឋប៉ុន្មាននោះទេ តែវាបានផ្ដល់ប្រមាណ៣០ម៉ឺននាក់ ដោយគ្រាន់តែការដ្ឋានសំណង់ក្នុងទីក្រុងកោះពេជ្រមួយមានកម្មករប្រមាណជិត៥ពាន់នាក់ទៅហើយ » ។
លោកឧកញ៉ាបន្ថែមថា ៖ « សមាគមនឹងខិតខំធ្វើយ៉ាងណាដើម្បីស្វែងរក និងផ្ដល់ផលប្រយោជន៍ជូនសមាជិកតាមរយៈការជួយសម្របសម្រួលផ្សព្វផ្សាយព័ត៌មានអំពីធុរកិច្ច និងកិច្ចការទំនាក់ទំនងរបស់សមាជិកនីមួយៗគ្រប់មធ្យោបាយទាំងអស់ និងរៀបចំឱ្យមានកម្មវិធីផ្សេងៗ ជាពិសេស រៀបចំឱ្យមានការដាក់តាំងបង្ហាញពីផលិតផល និងសេវាកម្មរបស់សមាជិកនីមួយៗក្នុងពិធីតាំងពិព័រណ៍ឧស្សាហកម្មសំណង់កម្ពុជា ដែលសមាគមតែងតែរៀបចំជារៀងរាល់ចុងឆ្នាំ ក្នុងកម្មវិធីមហាសន្និបាតបូកសរុបសកម្មភាពការងារប្រចាំឆ្នាំរបស់សមាគម » ។
គួរបញ្ជាក់ថា សមាគមអ្នកសាងសង់កម្ពុជាបច្ចុប្បន្ន មានសមាជិកប្រមាណ១១៣ក្រុមហ៊ុន ក្នុងនោះមានក្រុមហ៊ុនប្រកបអាជីវកម្មសិក្សាគម្រោងប្លង់ ក្រុមហ៊ុនសាងសង់គ្រប់ប្រភេទ ក្រុមហ៊ុនលក់សម្ភារបរិក្ខារ ឧបករណ៍គ្រឿងចក្រសំណង់គ្រប់ប្រភេទ ក្រុមហ៊ុនអចលនទ្រព្យ រោងចក្រផលិតបេតុង ក្រុមហ៊ុនដំឡើងប្រព័ន្ធអគ្គិសនី ទឹក ម៉ាស៊ីនត្រជាក់ ក្រុមហ៊ុនធានារ៉ាប់រង ក្រុមហ៊ុនដឹកជញ្ជូន និងក្រុមហ៊ុនជាច្រើនទៀតដែលបម្រើឱ្យវិស័យសំណង់ ៕
ចែករំលែកព័តមាននេះ