រាជធានីភ្នំពេញ ៖ ទ្រូម៉ាន់នីដែលជាក្រុមហ៊ុនវេរលុយដ៏ល្បីល្បាញមួយបានរៀបចំកម្មវិធីប្រគំតន្ត្រីទ្រូម៉ាន់នីខ្នាតយក្សមួយនៅមជ្ឈមណ្ឌលកោះពេជ្រ កាលពីល្ងាចថ្ងៃទី ៣១ មីនា ២០១៦ ដោយមានការចូលរួមពីតារាចម្រៀងល្បីៗ ប្រចាំព្រះរាជាណាចក្រកម្ពុជា ដូចជា លោក ខេមរៈ សិរីមន្ត កញ្ញា ឱក សុគន្ធកញ្ញា លោក ខេម និងមានការចូលរួមសម្ដែងពីក្រុមកំប្លែងរបស់ស្ថានីយទូរទស្សន៍ស៊ីធីអិនផងដែរ ។
នៅក្នុងសន្និសីទសារព័ត៌មានមួយនៅសណ្ឋាគារស៊ូហ្វីតែល មុនកម្មវិធីប្រគំតន្ត្រីចាប់ផ្ដើម លោក គង់ មាន នាយកគ្រប់គ្រងទូទៅក្រុមហ៊ុនទ្រូម៉ាន់នីប្រចាំប្រទេសកម្ពុជាបានថ្លែងថា ក្រុមហ៊ុនទ្រូម៉ាន់នីមានដៃគូសហការជាមួយធនាគារហ្វីលីពបានទទួលអាជ្ញាប័ណ្ណពីធនាគារជាតិនៃកម្ពុជាដើម្បីបម្រើសេវាហិរញ្ញវត្ថុដ៏សម្បូរបែបដូចជាវេរលុយ ដាក់លុយ ដកលុយ បង់វិក្កយបត្រ បើកប្រាក់បៀវត្ស និងបញ្ចូលទឹកប្រាក់តាមទូរស័ព្ទ ។ មូលហេតុដែលយើងឈានជើងចូលប្រឡូកក្នុងទីផ្សារកម្ពុជាគឺដោយសារយើងមើលឃើញថា ប្រជាជនកម្ពុជា៩០%មិនវេរលុយតាមធនាគារនោះទេ ដែលជាហានិភ័យមួយសម្រាប់ពួកគាត់ចំពោះការបាត់បង់ជាយថាហេតុ ។ ដូច្នេះយើងមកទីនេះ ដើម្បីជួយសម្រួលតាមរយៈសេវាកម្មទាំងអស់នេះឲ្យបានកាន់តែរហ័ស ងាយស្រួល ព្រមទាំងមានសុវត្ថិភាពទៀតផង ដូចទៅនឹងពាក្យស្លោករបស់ក្រុមហ៊ុនយើងគឺ «ដាក់ស្រួល ដកស្រួល និងមានសុវត្ថិភាព» ។ ហើយដើម្បីឱ្យដំណឹងនេះបានជ្រួតជ្រាបដល់ពលរដ្ឋកម្ពុជា ទើបយើងរៀបចំព្រឹត្តិការណ៍ប្រគំតន្ត្រីដ៏ធំនេះជូនពួកគាត់ ។
លោក គង់ មាន បន្តថា ឥឡូវនេះយើងមានភ្នាក់ងារដល់ទៅ៥០០០កន្លែងក្នុងខេត្តចំនួន២៥ លើទឹកដីកម្ពុជា ហើយយើងនឹងពង្រីកបន្ថែមឱ្យកាន់តែច្រើនទៀតដើម្បីឱ្យអ្នកប្រើប្រាស់សេវាកម្មយើងងាយស្វែងរក និងចរាចរសាច់ប្រាក់បានកាន់តែរហ័ស ។ លើសពីនេះទៅទៀត ក្រុមហ៊ុនទ្រូម៉ាន់នី មានការិយាល័យនៅ៦ប្រទេសដូចជា ប្រទេសកម្ពុជា ថៃ មីយ៉ាន់ម៉ា ឥណ្ឌូណេស៊ី ហ្វីលីពីន និងវៀតណាម ហើយក្រុមហ៊ុនក៏នឹងពង្រីកអាជីវកម្មខ្លួននៅគ្រប់ប្រទេសទាំងអស់ទូទាំងអាស៊ាននៅចុងឆ្នាំ២០១៦ ខាងមុខនេះផងដែរ ។
លោក ហាន់ ពេងក្វាន់ នាយកគ្រប់គ្រងទូទៅធនាគារហ្វីលីព បានឱ្យដឹងថា ក្រុមហ៊ុនទ្រូម៉ាន់នី និងធនាគារហ្វីលីពគឺជាដៃគូសហការដ៏សក្តិសមបំផុតទាំងគុណភាពនៃសេវាកម្ម ទស្សនវិស័យ និងគោលដៅផែនការនាពេលអនាគត ។ ឥឡូវនេះ ធនាគារលោកមានបុគ្គលិកបម្រើការ៣.៥០០នាក់ ហើយមានអតិថិជនដល់ទៅ៩សែននាក់ទូទាំងពិភពលោក ដែលសរុបជាទឹកប្រាក់មានដល់ទៅ៣០ពាន់លានដុល្លារ ។
លោកបន្តថា ធនាគារហ្វីលីព គឺជាផ្នែកមួយរបស់ក្រុមហ៊ុនហ្វីលីពខេបពីថលគ្រុប (Phillip Capital Group) ដែលមានមូលដ្ឋាននៅប្រទេសសិង្ហបុរី ហើយចាប់កំណើតតាំងពីឆ្នាំ ១៩៧៥ មកម្ល៉េះ។ យើងមានសេចក្តីសោមនស្សរីករាយយ៉ាងខ្លាំងដែលធនាគារហ្វីលីពរបស់យើងបានចាប់ដៃគូសហការជាមួយក្រុមហ៊ុនទ្រូម៉ាន់នី ដែលទទួលបានអាជ្ញាប័ណ្ណពីធនាគារជាតិនៃកម្ពុជា ដើម្បីឲ្យក្រុមហ៊ុនទ្រូម៉ាន់នីអាចជួយសម្រួលដល់ការរស់នៅរបស់ប្រជាជនកម្ពុជាឲ្យកាន់តែល្អប្រសើរ ។
គួរបញ្ជាក់ថា ក្រុមហ៊ុនទ្រូម៉ាន់នីនៅកម្ពុជាផ្តល់នូវតម្លៃសេវាកម្មដែលសមរម្យបំផុត ធ្វើយ៉ាងណាដើម្បីធ្វើឱ្យជីវិតរស់នៅប្រចាំថ្ងៃរបស់ប្រជាជនកម្ពុជាកាន់តែមានភាពល្អប្រសើរ ។ ក្រុមហ៊ុនគ្មានទស្សនវិស័យប្រកួតប្រជែងតម្លៃជាមួយក្រុមហ៊ុនដទៃនោះទេ គឺផ្តោតសំខាន់តែលើគុណភាព សេវាកម្ម តែប៉ុណ្ណោះ ៕
ចែករំលែកព័តមាននេះ