រាជធានីភ្នំពេញ ៖ ឯកអគ្គរដ្ឋទូតអាមេរិកបានអបអរសាទរដល់រាជរដ្ឋាភិបាលកម្ពុជាបានខិតខំចាក់វ៉ាក់សាំងប្រឆាំងកូវីដ-១៩ ជូនពលរដ្ឋបានក្នុងកម្រិតខ្ពស់ និងឈានដល់ការបើកដំណើរការសកម្មភាពសង្គម និងសេដ្ឋកិច្ចជាបណ្តើរៗឡើងវិញ ។ ការសាទរនេះធ្វើឡើង ក្នុងជំនួបពិភាក្សារវាងសម្តេចអគ្គមហាពញាចក្រី ហេង…
រាជធានីភ្នំពេញ ៖ ឯកអគ្គរដ្ឋទូតអាមេរិកបានអបអរសាទរដល់រាជរដ្ឋាភិបាលកម្ពុជាបានខិតខំចាក់វ៉ាក់សាំងប្រឆាំងកូវីដ-១៩ ជូនពលរដ្ឋបានក្នុងកម្រិតខ្ពស់ និងឈានដល់ការបើកដំណើរការសកម្មភាពសង្គម និងសេដ្ឋកិច្ចជាបណ្តើរៗឡើងវិញ ។
ការសាទរនេះធ្វើឡើង ក្នុងជំនួបពិភាក្សារវាងសម្តេចអគ្គមហាពញាចក្រី ហេង សំរិន ប្រធានរដ្ឋសភាបានអនុញ្ញាតឱ្យឯកឧត្តម Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាចូលជួបពិភាក្សាការងារនៅវិមានរដ្ឋសភា នាព្រឹកថ្ងៃទី២៨ ខែតុលា ឆ្នាំ២០២១ ។
ក្នុងជំនួបសម្តេច ហេង សំរិន បានសម្តែងការកោតសរសើរឯកឧត្តមឯកអគ្គរដ្ឋទូតដែលបានខិតខំប្រឹងប្រែងនៅក្នុងការបំពេញបេសកកម្មការទូតនៅកម្ពុជាក្នុងរយៈពេលពីរឆ្នាំមកនេះធ្វើឲ្យកិច្ចសហប្រតិបត្តិការជាច្រើនវិស័យរវាងប្រទេសទាំងពីរបានជំរុញ និងលើកកម្ពស់មានការវិវឌ្ឍរីកចម្រើន ។
សម្តេចជឿជាក់ថា ទំនាក់ទំនងប្រជាជនទាំងពីរប្រទេសក៏ដូចជាកិច្ចសហប្រតិបត្តិការរវាងកម្ពុជា និងអាមេរិកដែលមានជាង៧០ឆ្នាំមកនេះនឹងកាន់តែរីកលូតលាស់ប្រកបដោយផ្លែផ្កាថែមទៀត ។
ចំណែកឯកឧត្តម Patrick Murphy អបអរសាទរដល់រាជរដ្ឋាភិបាលកម្ពុជាបានខិតខំចាក់វ៉ាក់សាំងប្រឆាំងកូវីដ-១៩ ជូនពលរដ្ឋបានក្នុងកម្រិតខ្ពស់ និងឈានដល់ការបើកដំណើរការសកម្មភាពសង្គម និងសេដ្ឋកិច្ចជាបណ្តើរៗឡើងវិញ ។
ឯកឧត្តមបានបញ្ជាក់ថា« សហរដ្ឋអាមេរិកជាប្រទេសមួយដែលចូលរួមយ៉ាងសកម្មនៅក្នុងវិស័យសុខាភិបាលនៅកម្ពុជា ពិសេសនៅកំឡុងពេលនៃការរាតត្បាតជំងឺកូវីដ១៩នេះអាមេរិកបានផ្តល់វ៉ាក់សាំងJohnson & Johnson ជូនកម្ពុជាប្រមាណជាង១លានដូសតាមយន្តការអង្គការសុខភាពពិភពលោក» ។
ជាមួយគ្នានោះដែរ សម្តេច ហេង សំរិន បានថ្លែងអរគុណយ៉ាងជ្រា លជ្រៅចំពោះសហរដ្ឋអាមេរិកដែលបានផ្តល់ជំនួយអភិវឌ្ឍន៍ដល់កម្ពុជាមានជាអាទិ៍លើវិស័យសុខាភិបាល អប់រំ បរិស្ថាន វប្បធម៌ កសិកម្ម និងការបោសសំអាតមីនជាដើមនោះ ពិសេសវ៉ាក់សាំងប្រឆាំងកូវីដ-១៩ ។
ជាចុងបញ្ចប់ សម្តេចបានលើកទឹកចិត្តដល់សហរដ្ឋអាមេរិកបន្តផ្តល់អាហារូបករណ៍ និងឱកាសបណ្តុះបណ្តាលដល់និស្សិត និងអ្នកដឹកនាំវ័យក្មេងកម្ពុជា ដោយកម្ពុជាផ្តល់អាទិភាពដល់សេដ្ឋកិច្ច ផ្អែកលើចំណេះដឹង ៕
ចែករំលែកព័តមាននេះ