ខេត្តកណ្តាល ៖ មានការភ្ញាក់ផ្អើលមួយទាំងកណ្តាលអធ្រាត្រ ខណៈកម្លាំងព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាលដឹកនាំដោយលោកវរសេនីយ៌ឯក ឡាក់ ម៉េងធី នាយការិយាល័យ បានសហការជាមួយកម្លាំងចម្រុះនៃអធិការដ្ឋាននគរបាលក្រុងតាខ្មៅធ្វើការឡោមព័ទ្ធ ចុះបង្ក្រាបភោជនីយដ្ឋាន អាយផាប់ ដែលផ្គើន និងវិធានការរដ្ឋបាលនៃជំងឺកូវីដ១៩ ដោយលួចបើកទទួលភ្ញៀវ និងមានការប្រគុំតន្ត្រីជាវង់ មានសម្លេងលឺៗចេញមកខាងក្រៅ ដោយធ្វើការឃាត់ខ្លួនមនុស្ស០៦នាក់ ។
ការចុះបង្ក្រាបនេះធ្វើឡើងនៅយប់ថ្ងៃទី២៦ ខែតុលា ឆ្នាំ២០២១ ក្នុងភោជនីយដ្ឋាន អាយ ផាប់ ស្ថិតនៅផ្លូវបេតុង ភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល នៅរាត្រីយប់ ថ្ងៃទី២៦ ខែតុលា ឆ្នាំ២០២១ ។
បើតាមការបញ្ជាក់ពីលោកវរសេនីយ៌ឯក ឡាក់ ម៉េងធី នាយការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកណ្តាលបានប្រាប់អោយដឹង នៅព្រឹកថ្ងៃទី២៧ ខែតុលា ឆ្នាំ២០២១ នេះថា ប្រតិបត្តិការនេះបានឃាត់ខ្លួនបុគ្គលិក៤នាក់ អ្នកចម្រៀង២នាក់ ចំណែកម្ចាស់ទីតាំង និងភ្ញៀវបានរត់គេចខ្លូនតាមទ្វារក្រោយអស់បន្សល់ទុករថយន្ត០៦គ្រឿង ម៉ូតូ១៤គ្រឿង ។
លោកបានបន្តទៀតថា ទីតាំងភោជនីយដ្ឋាន អាយ ផាប់ បានបិទបណ្តោះអាសន្នហើយ ។ ដោយឡែកម្ចាស់ទីតាំង សមត្ថកិច្ចកំពុងតាមស្វែងរក និងកសាងសំណុំរឿងបញ្ជូនទៅតុលាការចាត់ការបន្តរតាមនីតិវិធីច្បាប់ ៕
ចែករំលែកព័តមាននេះ