រាជធានីភ្នំពេញ៖ រហូតដល់ម៉ោងជាង ៩យប់ ថ្ងៃទី២៧តុលានេះ ទឹកស្ទឹងព្រែកត្នោត បានឡើងលិចកាន់តែជ្រៅលើផ្លូវលេខ២១៧ ហៅផ្លូវចំការដូង ត្រង់ចំណុចភ្លើងស្តុបព្រែកជ្រៃ ឬស្តុបបាគូ ក្នុងភូមិបាគូ…
រាជធានីភ្នំពេញ៖ រហូតដល់ម៉ោងជាង ៩យប់ ថ្ងៃទី២៧តុលានេះ ទឹកស្ទឹងព្រែកត្នោត បានឡើងលិចកាន់តែជ្រៅលើផ្លូវលេខ២១៧ ហៅផ្លូវចំការដូង ត្រង់ចំណុចភ្លើងស្តុបព្រែកជ្រៃ ឬស្តុបបាគូ ក្នុងភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ។ ទឹកឡើងលឿនលើសក្បាលជង្គង់ហើយ ចរាចរណ៍ត្រូវបានផ្អាក មិនអាចធ្វើដំណើរឆ្លងកាត់បានទេ លើកំណាត់ផ្លូវលេខ២១៧ ពីភ្លើងស្តុបបាគូ ទៅស្ពានព្រែកជ្រៃ។ ចំណែកពីស្ពានព្រែកជ្រៃ ទៅរង្វង់កួរស្រូវ ទឹកមិនទាន់ឡើងលិចទេ តែចរាចរណ៍ ត្រូវបានបិទ មិនឲ្យឆ្លងកាត់ផ្លូវលេខ២១៧ នេះទេ។
ទឹកជំនន់ស្ទឹងព្រែកត្នោត ឡើងលិចកំណាត់ផ្លូវលេខ២១៧នេះ ចាប់តាំងពីម៉ោង ៦ល្ងាចថ្ងៃទី២៧ ខែតុលា ឆ្នាំ២០២១។ រហូតដល់ម៉ោង ១០យប់ ថ្ងៃទី២៧តុលានេះ ជំនន់ទឹកភ្លៀងលើកំណាត់ផ្លូវ២១៧ កន្លែងខ្លះឡើងដល់លើក្បាលជង្គង់ហើយ។ ភ្លើងអគ្គិសនី ត្រូវបានកាត់ផ្តាច់ទាំងស្រុង នៅចំណុចទឹកលិចនោះ។ នៅក្នុងភូមិ ទឹកលិចធ្ងន់ធ្ងរ ហើយទឹកហូរ កំពុងហូរចាក់ទៅបឹងជើងឯក។ ប្រជាពលរដ្ឋជាច្រើន ជម្លៀសចេញពីផ្ទះលិចទឹក។
អាជ្ញាធរសមត្ថកិច្ច បានឲ្យដឹងថា ទឹកដែលហូរលើផ្លូវលេខ២១៧ ហៅផ្លូវចំការដូង និងលិចលំនៅដ្ឋានជាច្រើនខ្នងនេះ ពុំមែនដោយសារតែការបាក់ទំនប់ស្ទឹងព្រែកត្នោតនោះទេ គឺព្រោះតែកម្រិតទឹកស្ទឹង កើនឡើងឥតឈប់ឈរ និងបានហៀរចេញពីស្ទឹង ហូរចូលផ្ទះ និងលិចផ្លូវនេះតែម្ដង។ នេះគឺជាការព្រួយបារម្ភជាថ្មីអំពីការជន់លិច ប្រសិនបើទឹកស្ទឹង នៅតែបន្តកើនឡើងឥតឈប់បែបនេះ គឺនឹងត្រូវលិចលង់ ដូចគ្នាទៅនឹងឆ្នាំ២០២០ កន្លងទៅមិនខានឡើយ។ កាលពីឆ្នាំមុន នៅចំណុចទឹកលិចកំណាត់ផ្លូវលេខ២១៧ រហូតដល់រង្វង់មូលកួរស្រូវ គឺត្រូវជិះទូក ដោយទឹកឡើងលិចដល់ត្រឹមចង្កេះ និងកន្លែងខ្លះដល់ត្រឹមទ្រូង៕ យន់ ស៊ីថា
ចែករំលែកព័តមាននេះ